!!! ରାୟଗଡା ଜିଲ୍ଲା ଗୁଣପୁର ରୁ ଉପଖଣ୍ଡ ପ୍ରତିନିଧି ବାସନ୍ତୀ କୁମାରୀ ପାଟ୍ଟଯୋଶୀ ଙ୍କ ରିପୋର୍ଟ !!!
ଏଥର ସମ୍ଭାଳ (ଗୁଣପୁର)– ମୁଣ୍ଡ ଉପରେ ଡହଡ଼ହ ଖରା । ଅସହ୍ୟ ଗ୍ରୀଷ୍ମପ୍ରବାହ ରେ ଅସ୍ତବ୍ୟସ୍ତ ଜନଜୀବନ । ଏଭଳି ସ୍ଥିତିରେ ପାନୀୟ ଜଳର ସମସ୍ୟା ଲୋକଙ୍କ କଷ୍ଟକୁ ଆହୁରି ଦ୍ବିଗୁଣିତ କରିଛି । ରାୟଗଡା ଜିଲ୍ଲା ଗୁଣୁପୁର ବ୍ଳକ ଭୀମପୁର ପଞ୍ଚାୟତ ଅନ୍ତର୍ଗତ ଫୁଲଫୁଟି ଗ୍ରାମରେ ଦେଖା ଦେଇଛି ପିଇବା ପାଣି ର ସମସ୍ୟା । ଗ୍ରାମରେ ଥିବା ତିନୋଟି ନଳକୂପ ଅଚଳ । ସୋଲାର ପାଇପ କାମ କରୁନାହିଁ । ଏଭଳି ସ୍ଥିତିରେ ଗ୍ରାମବାସୀ ନଦୀ କୁ ଯାଇ ଚୁଆ କରି ପାଣି ଆଣୁଛନ୍ତି । ସରକାର ବିଶୁଦ୍ଧ ପାନୀୟ ଜଳ ଯୋଗାଣ ପାଇଁ କୋଟି କୋଟି ଟଙ୍କାର ଅର୍ଥ ବ୍ୟୟ କରି ବିଭିନ୍ନ ପାନୀୟ ଜଳ ପ୍ରକଳ୍ପ କରୁଥିବା ବେଳେ ଉପଯୁକ୍ତ ଦାୟିତ୍ୱ ହୀନତା ଓ ପ୍ରଶାସନିକ ଅବହେଳା ଯୋଗୁଁ ପ୍ରକଳ୍ପ ଗୁଡିକ ବିଫଳତା ହେଉଥିବା ଜଣାପଡିଛି । ଆଜି ଗ୍ରାମବାସୀ ମାନେ ଭୀମପୁର ସରପଞ୍ଚ ଙ୍କ ନେତୃତ୍ୱରେ ଉପଜିଲ୍ଲାପାଳ ଙ୍କ କାର୍ଯ୍ୟାଳୟ ସମ୍ମୁଖରେ ହାଣ୍ଡି, ମାଠିଆ, ବାଲ୍ଟି ଧରି ଧାରଣା ରେ ବସିରହିଥିଲେ । ତେବେ ଉପଜିଲ୍ଲାପାଳ ଙ୍କ କାର୍ଯ୍ୟାଳୟ ରୁ କୌଣସି ଅଧିକାରୀ ନ ଆସିବାରୁ ଜିଲ୍ଲାପାଳ ଙ୍କୁ ଫୋନ ଯୋଗେ ସମସ୍ୟା ସମ୍ପର୍କରେ ଅବଗତ କରାଇଥିଲେ ଗ୍ରାମବାସୀ । ରାୟଗଡା ଜିଲ୍ଲାପାଳ ସରୋଜ କୁମାର ମିଶ୍ର ତୁରନ୍ତ ଏ ନେଇ ଆବଶ୍ୟକ ପଦକ୍ଷେପ ଗ୍ରହଣ କରିବେ ବୋଲି ଗ୍ରାମବାସୀ ଙ୍କୁ ପ୍ରତିଶ୍ରୁତି ଦେଇଥିଲେ । କେବେ ଦୂର ହେବ ଗ୍ରାମବାସୀ ଙ୍କ ସମସ୍ୟା ତାହା ଏବେ ଦେଖିବାକୁ ରହିଲା ।
