ଏଥର ସମ୍ଭାଳ ବ୍ୟୁରୋ (ନୂଆଦିଲ୍ଲୀ) – ମହମାରୀ କରୋନା ସମୟରେ ଗଙ୍ଗା ନଦୀରେ ଶହଶହ ଶବ ଭାସିବା ଘଟଣାକୁ ବେଶ ଗୁରୁତ୍ୱର ସହ ନେଇଛନ୍ତି ଜାତୀୟ ମାନବାଧିକାର କମିଶନ। ଘଟଣାକୁ କେନ୍ଦ୍ର କରି ଆଜି ଏନଏଚ୍ଆରସି କେନ୍ଦ୍ର ସରକାରଙ୍କ ସମେତ ବିହାର ଓ ଉତ୍ତର ପ୍ରଦେଶ ସରକାରଙ୍କୁ ଜବାବ ତଲବ କରିଛନ୍ତି। କମିଶନଙ୍କ ପକ୍ଷରୁ ବିହାର ଓ ଉତ୍ତର ପ୍ରଦେଶର ମୁଖ୍ୟ ଶାସନ ସଚିବଙ୍କ ସମେତ କେନ୍ଦ୍ର ଜଳ ଶକ୍ତି ମନ୍ତ୍ରଣାଳୟର ସଚିବଙ୍କୁ ନୋଟିସ କରାଯାଇଛି। ଗଙ୍ଗା ନଦୀରେ ଶବ ଭାସିବା ଘଟଣାରେ କ’ଣ ସବୁ ପଦକ୍ଷେପ ନିଆଯାଇଛି, ତା’ର ଜବାବ ୪ ସପ୍ତାହ ମଧ୍ୟରେ ଦେବାକୁ କମିଶନ କହିଛନ୍ତି। ନୋଟିସ୍ରେ କମିଶନ କହିଛନ୍ତି, ଆମକୁ ଲାଗୁଛି ସରକାରୀ ଅଧିକାରୀମାନେ ଲୋକଙ୍କୁ ଠିକ୍ ଭାବେ ସତର୍କ କରଇବାରେ ବିଫଳ ହୋଇଛନ୍ତି। ଅର୍ଦ୍ଧଦଗ୍ଧ କିମ୍ବା ପୂରା ଶବକୁ ଗଙ୍ଗା ନଦୀକୁ ଫୋପାଡ଼ିବା କାମ ଉପରେ ରୋକ ଲଗାଇବାକୁ ସେମାନେ ବୋଧେ କୌଣସି ପଦକ୍ଷେପ ନେଇନାହାନ୍ତି। ଗଙ୍ଗା ନଦୀରେ ଶବ ଫୋପାଡ଼ିବା ସଂପୂର୍ଣ୍ଣ ଭାବେ ଜଲ ଶକ୍ତି ମନ୍ତ୍ରଣାଳୟ ପକ୍ଷରୁ ନ୍ୟାଶନାଲ ମିଶନ ଫର କ୍ଲିନ ଗଙ୍ଗା ପାଇଁ ଜାରି ଗାଇଡାଲାଇନକୁ ଉଲ୍ଲଙ୍ଘନ କରୁଛି ବୋଲି ନୋଟିସ୍ରେ କୁହାଯାଇଛି। ମନ୍ତ୍ରଣାଳୟ ଜାରି କରିଥିବା ଗାଇଡାଲଇନ ଅନୁଯାୟୀ, କୌଣସି ବ୍ୟକ୍ତି କିମ୍ବା ସଂସ୍ଥା ଏମିତି କିଛି ପଦକ୍ଷେପ, ବ୍ୟବସ୍ଥା କିମ୍ବା କାର୍ଯ୍ୟ କରିବେ ନାହିଁ, ଯାହା ଦ୍ୱାରା ଗଙ୍ଗା ନଦୀ ପ୍ରଦୂଷିତ ହେବ। ଯିଏ ଏପରି କରିବ, ତାଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ମଧ୍ୟ ମନ୍ତ୍ରଣାଳୟ କହିଥିଲା। ଏବେ ଏହାକୁ ଖୋଲାଖୋଲି ଉଲ୍ଲଙ୍ଘନ କରାଯାଇ ଲୋକମାନେ ମନିଇଚ୍ଛା ଶବ ନଦୀରେ ଫିଙ୍ଗିବାରେ ଲାଗିଛନ୍ତି। ଉତ୍ତର ପ୍ରଦେଶ ଓ ବିହାରର ଏକାଧିକ ସ୍ଥାନ ଦେଇ ପ୍ରବାହିତ ଗଙ୍ଗା ନଦୀ କୂଳରୁ ଶବ ମିଳିବା ପରେ ସମସ୍ତଙ୍କ ଚିନ୍ତା ବଢ଼ିଛି। କରୋନା ରୋଗୀଙ୍କ ଶବକୁ ଲୋକମାନେ ଗଙ୍ଗାରେ ଭସାଇ ଦେଉଥିବା ମଧ୍ୟ ଅଭିଯୋଗ ହୋଇଛି। ଏହାଦ୍ୱାରା ସଂକ୍ରମଣ ବ୍ୟାପିବାର ଆଶଙ୍କା ଥିବା ମଧ୍ୟ କୁହାଯାଉଛି।
