ଏଥର ସମ୍ଭାଳ ବ୍ୟୁରୋ(ଭୁବନେଶ୍ଵର)- ଯୁକ୍ତ ଦୁଇ ଛାତ୍ରଛାତ୍ରୀଙ୍କୁ ପରୀକ୍ଷା ଚିନ୍ତା । କେଉଁ ଢାଞ୍ଚାରେ ପରୀକ୍ଷା ହେବ ? ସିଲାବସ କଣ ରହିବ? କେତେ ମାର୍କର ପରୀକ୍ଷା ଦେବାକୁ ପଡ଼ିବ? ପରୀକ୍ଷା ନିଜ କଲେଜରେ ହେବ ନା ପିଲାଙ୍କୁ ଅନ୍ୟତ୍ର ଯିବାକୁ ପଡିବ? ପ୍ରାକଟିକାଲ ପରୀକ୍ଷାର ନିୟମ ବଦଳିବ ନା ଅପରିବର୍ତ୍ତିତ ରହିବ ? ଛାତ୍ର ଓ ଅଭିଭାବକ, ସମସ୍ତଙ୍କ ମନରେ ଏବେ ଏଭଳି ଅନେକ ପ୍ରଶ୍ନ । କାରଣ ମାଟ୍ରିକ ଓ ଯୁକ୍ତ ଦୁଇ ଉଭୟ ସ୍କୁଲ ଓ ଗଣଶିକ୍ଷା ବିଭାଗରେ ଆସୁଛନ୍ତି । ତେବେ ମାଟ୍ରିକ୍ ପରୀକ୍ଷା ପରିଚାଳନା ନେଇ ଗଣଶିକ୍ଷା ବିଭାଗ ଇତି ମଧ୍ୟରେ ବିସ୍ତୃତ ଗାଇଡଲାଇନ ଜାରି କରିସାରିଛି । ମାତ୍ର ଯୁକ୍ତ ଦୁଇ ଲାଗି ଉଚ୍ଚ ମାଧମିକ ଶିକ୍ଷା ପରିଷଦ ପକ୍ଷରୁ ସେଭଳି କୌଣସି ଘୋଷଣା କରାଯାଇନାହିଁ । କରୋନା କଟକଣା ଭିତରେ ଶହେ ଦିନର କ୍ଲାସ କରି ପରୀକ୍ଷା ଲାଗି ନିଷ୍ପତ୍ତି ହୋଇଛି ସିନା ବ୍ୟବସ୍ଥାରେ ସ୍ପଷ୍ଟତା ଆସିନଥିବାରୁ ପିଲାଙ୍କ ମନରେ ଦ୍ୱଦ୍ୱ ବଢିବାରେ ଲାଗିଛି। ଏପଟେ ସ୍କୁଲ ଓ ଗଣଶିକ୍ଷା ବିଭାଗ ମାଟ୍ରିକ୍ ପରୀକ୍ଷା ଫି ଛାଡ଼ କରିଛି । ସେହିପରି ପିଲାଙ୍କୁ ପରୀକ୍ଷାରେ ସହାୟତା କରିବାକୁ ମାଗଣାରେ ପରୀକ୍ଷା ଦର୍ପଣ ଯୋଗାଇ ଦେବାକୁ ଘୋଷଣା ମଧ୍ୟ କରିଛି । ଏବେ ପ୍ରଶ୍ନ, ସମାନ ବିଭାଗ ଅଧିନରେ ଥିଲେ ମଧ୍ୟ ଯୁକ୍ତ ଦୁଇ ପରୀକ୍ଷାକୁ ନେଇ କାହିଁକି ଚିତ୍ର ସ୍ପଷ୍ଟ କରାଯାଉନି ? ମାଟ୍ରିକ୍ ଭଳି ଯୁକ୍ତ ଦୁଇ ପିଲାଙ୍କ ପରୀକ୍ଷା ଫି ଛାଡ଼ ସହିତ ସେମାନଙ୍କ ଲାଗି ବି ମାଗଣା ଟେଷ୍ଟ ପେପର ବ୍ୟବସ୍ଥା କରିବାକୁ ଅଭିଭାବକ ସଂଘ ଦାବି କରିଛି । ଅନ୍ୟପକ୍ଷରେ ଇତି ମଧ୍ୟରେ ସିବିଏସ୍ଇ ମଧ୍ୟ ଏହାର ପରୀକ୍ଷା ଗାଇଡଲାଇନ୍ ଜାରି କରି ସାରିଛି । ତେଣୁ ସିଏଚଏସଇ ମଧ୍ୟ ତୁରନ୍ତ ପିଲାଙ୍କ ଦ୍ୱନ୍ଦ୍ୱ ଦୂର କରିବା ଜରୁରୀ ବୋଲି ଶିକ୍ଷାବିତ୍ ମତ ଦେଇଛନ୍ତି । ତେବେ ଏନେଇ ସ୍କୁଲ ଓ ଗଣଶିକ୍ଷା କିମ୍ବା ସିଏଚଏସି ର ପ୍ରତିକ୍ରିୟା ମିଳିପାରିନାହିଁ । ମେ ୪ରୁ ଜୁନ୍ ୧୦ ମଧ୍ୟରେ ସିବିଏସି ଦଶମ ଏବଂ ଦ୍ୱାଦଶ ପରୀକ୍ଷା ଅନୁଷ୍ଠିତ ହେବ। ମାର୍ଚ୍ଚ ୧ରୁ ଉଭୟ ଶ୍ରେଣୀ ଲାଗି ପ୍ରାକ୍ଟିକାଲ ପରୀକ୍ଷା ହେବ । ଜାନୁଆରୀ ୮ରୁ ଆରମ୍ଭ ହୋଇଥିବା ଯୁକ୍ତ ଦୁଇ ଶେଷ ବର୍ଷର ଶିକ୍ଷାଦାନ ଏପ୍ରିଲ ୨୮ ଯାଏ ଚାଲିବ । ମେ ୧୫ରୁ ଜୁନ୍ ୧୧ ମଧ୍ୟରେ ପରୀକ୍ଷା ହେବ।ଏଣେ ଏପ୍ରିଲରେ ପ୍ରାକ୍ଟିକାଲ ପରୀକ୍ଷା ହେବାକୁ ଥିବା ବେଳେ ସିଏଚ୍ଏସ୍ଇ ପରୀକ୍ଷା ପ୍ରଣାଳୀ ଘୋଷଣା କରିନଥିବାରୁ କିଭଳି ନିଜକୁ ପ୍ରସ୍ତୁତ କରିବେ ତାକୁ ନେଇ ପିଲାଙ୍କ ଚିନ୍ତା ବଢିଛି।
