ଏଥର ସମ୍ଭାଳ ବ୍ୟୁରୋ (ଭୁବନେଶ୍ୱର) – ସାରୁଅ ଜମି କେଳେଙ୍କାରୀ ମାମଲାରେ ଓଡ଼ିଶା ଇନଫ୍ରାଟେକ୍ ପ୍ରାଇଭେଟ୍ ଲିମିଟେଡ଼ କମ୍ପାନୀର ନିର୍ଦ୍ଦେଶକ ତଥା ବୈଜୟନ୍ତ ପଣ୍ଡାଙ୍କ ଡାହାଣ ହାତ ମନୋରଞ୍ଜନ ଷଡ଼ଙ୍ଗୀ ଏବେ ଝାରପଡ଼ା ଜେଲ୍ ରେ । କମ୍ପାନୀ ଏଜେଣ୍ଟ ଶିବ ପ୍ରସାଦ ହରିଚନ୍ଦନ ବି ଜେଲ୍ ଯାଇଛନ୍ତି । କମ୍ପାନୀର ଅନ୍ୟତମ ନିର୍ଦ୍ଦେଶକ ଥିବା ବିଭୁ ପ୍ରସାଦ ରଥଙ୍କୁ ଆଜି କ୍ରାଇବ୍ରାଞ୍ଚ ପୁଲିସ ୩ ଘଣ୍ଟା ଧରି ଜେରା କରିଛି । ମନୋରଞ୍ଜନ ଷଡ଼ଙ୍ଗୀଙ୍କ ଭଳି ତାଙ୍କର ଅବସ୍ଥା ହେବ କି ନାଁ ଆଗକୁ ଜଣାପଡ଼ିବ । ଏପଟେ ସାରୁଅରେ ଦଳିତଙ୍କ ଜମି ହାତେଇବା ପାଇଁ ପଣ୍ଡା କମ୍ପାନୀର ଯାବତୀୟ କାରନାମାର ପର୍ଦ୍ଦାଫାସ କରିଛି କ୍ରାଇମବ୍ରାଞ୍ଚ ଅର୍ଥନୈତିକ ଅପରାଧା ଶାଖା । ଏଡିଜି ସୌମେନ୍ଦ୍ର ପ୍ରିୟଦର୍ଶୀ ଆଜି ଏକ ସାମ୍ବାଦିକ ସମ୍ମିଳନୀରେ ଏହାର ସବିଶେଷ ତଥ୍ୟ ରଖିଛନ୍ତି । ଏଥିସହ କେଳେଙ୍କାରୀର ମୁଖ୍ୟ ଖଳନାୟକ ଭାବେ କମ୍ପାନୀର ପ୍ରମୋଟର ବୈଜୟନ୍ତ ପଣ୍ଡା ଓ ଜାଗୀ ପଣ୍ଡାଙ୍କ ମୁଖା ଖୋଲିଯାଇଛି । ଇଓଡବ୍ଲୁ ତଦନ୍ତରୁ ଜଣାପଡ଼ିଛି ଯେ ବୈଜୟନ୍ତ ଓ ଜାଗୀ ପଣ୍ଡାଙ୍କ ପ୍ରମୁଖ ଅଂଶୀଦାର ଥିବା ଓଡ଼ିଶା ଇନଫ୍ରାଟେକ୍ ପ୍ରାଇଭେଟ୍ ଲିମିଟେଡ଼ କମ୍ପାନୀ ଦଳିତଙ୍କ ଜମିକୁ ବେଆଇନ ଉପାୟରେ ହାତେଇଛନ୍ତି । ଫ୍ରଡ୍, ଚିଟିଂ ଏବଂ ଧମକକୁ ହତିଆର କରାଯାଇଛି । ଓଡ଼ିଶା ଲ୍ୟାଣ୍ଡ ରିଫର୍ମସ୍ ଆକ୍ଟ(ଓଏଲଆର)ର ନିୟମାବଳୀକୁ ଶ୍ରାଦ୍ଧ ଚଢ଼େଇ ଗରିବ ଅନୁସୂଚିତ ବର୍ଗର ଲୋକଙ୍କଠାରୁ ପଣ୍ଡା କମ୍ପାନୀ ସିଧାସଳଖ ଜମି ନେଇଛି । ସଂସ୍ଥାର ନିର୍ଦ୍ଦେଶକ ବିଭୁ ରଥଙ୍କ ଡ୍ରାଇଭର ରବି ସେଠୀଙ୍କୁ ଏଥିରେ କେବଳ ମୋହରା କରାଯାଇଛି । ଏଡିଜି କହିଛନ୍ତି, ବର୍ତ୍ତମାନ ସୁଦ୍ଧା ହୋଇଥିବା ତଦନ୍ତରୁ ୨୦୧୦ ରୁ ୨୦୧୩ ମସିହା ମଧ୍ୟରେ ୭.୨୯୪ ଏକରର ଦଳିତଙ୍କ ଜମି ରବି ସେଠୀଙ୍କ ନାଁରେ ରେଜିଷ୍ଟ୍ରି ହୋଇଛି । ଯାହାକି ତାଙ୍କର ସମ୍ପୂର୍ଣ୍ଣ ଅଗୋଚରରେ । ପ୍ରାୟ ୨୦ ଲକ୍ଷ ଟଙ୍କାରେ ଏହା କିଣାଯାଇଥିଲା । ରବି ସେଠୀଙ୍କ ଇଚ୍ଛା ବିରୋଧରେ ଦଲିଲରେ କେବଳ ତାଙ୍କର ଦସ୍ତଖତ ନିଆଯାଇଥିଲା । ଦସ୍ତଖତ ନ କଲେ ଚାକିରି ନେଇଯିବାର ଧମକ ଦିଆଯାଇଥିଲା । ପରବର୍ତ୍ତୀ ସମୟରେ ୨୦୧୬ ଏବଂ ୨୦୧୯ ରେ ଉକ୍ତ ୭.୨୯୪ ଏକର ଜମି ରବି ସେଠୀଙ୍କଠାରୁ ଓଡ଼ିଶା ଇନଫ୍ରାଟେକ୍ କମ୍ପାନୀ କିଣିନେଇଥିଲା । ସେଲ୍ ଡିଡ୍ ରେ କନସିଡେରେସନ୍ ଆମାଉଣ୍ଟ ୬୫ ଲକ୍ଷ ଦର୍ଶାଯାଇଥିଲା । ଆଶ୍ଚର୍ଯ୍ୟର କଥା, ରବି ସେଠୀ କିନ୍ତୁ ଟଙ୍କାଟିଏ ପାଇ ନ ଥିଲେ । ଆହୁରି ଗୁରୁତ୍ୱପୂର୍ଣ୍ଣ କଥାଟି ହେଉଛି, ୨୦୧୦ ରୁ ଉକ୍ତ ଜମି ରବି ସେଠୀଙ୍କ ନାଁରେ କିଣାଯାଇଥିଲେ ମଧ୍ୟ ସେ କେବେ ଦଖଲରେ ନ ଥିଲେ । ଖାଲି ସେତିକି କୁହେଁ, ଜମି କିଣାରେ ବ୍ୟାପକ ଜାଲିଆତି ଏବଂ ବେନାମୀ ଅର୍ଥ କାରବାର ହୋଇଥିବା ତଦନ୍ତରୁ ସ୍ପଷ୍ଟ ହୋଇଛି । ଏହି ବେନାମୀ ଅର୍ଥ କାରବାରର ତଦନ୍ତ ଆୟକର ବିଭାଗ ଦ୍ୱାରା କରାଯିବ ବୋଲି ଏଡିଜି କହିଛନ୍ତି । ଏସବୁ କେଳେଙ୍କାରୀର ମୁଖ୍ୟ କାର୍ପଟଦାର ବୈଜୟନ୍ତ ଓ ଜାଗୀ ପଣ୍ଡା ବୋଲି ତଦନ୍ତରୁ ସ୍ପଷ୍ଟ ହୋଇଯାଇଛି । କାରଣ ପଣ୍ଡା ଦମ୍ପତ୍ତିଙ୍କର ସେଥିରେ ପ୍ରମୁଖ ଅଂଶଧନ ରହିଛି । ବୈଜୟନ୍ତଙ୍କର ୩୫ ଲକ୍ଷ ୯୦ ହଜାର ସେୟାର୍ ଥିବା ବେଳେ ଜାଗୀଙ୍କର ରହିଛି ୧ ଲକ୍ଷ ୨୫ ହଜାର ୪୧୮ ସେୟାର । ତେଣୁ କମ୍ପାନୀ ମାଲିକ ଭାବେ ସେମାନେ ମାମଲାରୁ ଖସି ପାରିବେ ନାହିଁ ବୋଲି କ୍ରାଇମବ୍ରାଞ୍ଚର ଜଣେ ବରିଷ୍ଠ ଅଧିକାରୀଙ୍କ ସୂତ୍ରରୁ ଜଣାପଡ଼ିଛି । ସୂଚନାଥାଉକି, ନିର୍ମାଣ ଓ ରିଅଲ୍ ଇଷ୍ଟେଟ୍ କାରବାରରେ ସଂପୃକ୍ତ ଓଡ଼ିଶା ଇନଫ୍ରାଟେକ୍ କମ୍ପାନୀ ସାରୁଅରେ ଓଟିଭି ତରଙ୍ଗ ଫିଲ୍ମସିଟି ପ୍ରୋଜେକ୍ଟ ଦାୟିତ୍ୱ ନେଇଛି । ୨୦୧୦ ରେ ଜାଗୀ ପଣ୍ଡା ଏହାର ନିର୍ଦ୍ଦେଶକ ପଦ ଛାଡ଼ିବା ପରେ ମନୋରଞ୍ଜନ ଷଡ଼ଙ୍ଗୀ ଏବଂ ବିଭୁ ରଥ ନିର୍ଦ୍ଦେଶକ ରହିଥିଲେ । ବୈଜୟନ୍ତ ଓ ଜାଗୀଙ୍କର ଏମାନେ ଡାହାଣ ଓ ବାମ ହାତ ଭଳି କାର୍ଯ୍ୟ କରୁଥିଲେ । ବିଭୁ ରଥ ଏବେ ନିର୍ଦ୍ଦେଶକ ନାହାନ୍ତି ଏବଂ ବର୍ଷେ ତଳେ ପଣ୍ଡା କମ୍ପାନୀ ଛାଡ଼ି ଦେଇଛନ୍ତି ।
