ବିଜୟରୁ ନୂଆ ବର୍ଷ ଆରମ୍ଭ କଲା ଟିମ୍ ଇଣ୍ଡିଆ ।
ଏଥର ସମ୍ଭାଳ ବ୍ୟୁରୋ (ଭୂବନେଶ୍ବର): ବିଜୟରୁ ନୂଆବର୍ଷର ଶୁଭାରମ୍ଭ କରିଛି ଟିମ୍ ଇଣ୍ଡିଆ। ପ୍ରଥମ ମ୍ୟାଚ୍ ବର୍ଷା ଯୋଗୁ ଧୋଇ ହୋଇଯିବା ପରେ ଏଠାରେ ଅନୁଷ୍ଠିତ ଦ୍ୱିତୀୟ ଟି-୨୦ ମ୍ୟାଚରେ ବିରାଟ୍ କୋହଲିଙ୍କ ନେତୃତ୍ୱାଧୀନ ଭାରତୀୟ ଟିମ୍ ୭ ୱିକେଟରେ ଶ୍ରୀଲଙ୍କାକୁ ପରାସ୍ତ କରିଛି। ସ୍ଥାନୀୟ ହୋଲକର ଷ୍ଟାଡିୟମରେ ଖେଳାଯାଇଥିବା ଏହି ମ୍ୟାଚରେ ଶ୍ରୀଲଙ୍କା ଟିମ୍ ଘରୋଇ ଦଳର ବୋଲିଂ ଆକ୍ରମଣର ସାମ୍ନା କରିନପାରି ନିର୍ଦ୍ଧାରିତ ୨୦ ଓଭରରେ ୯ ୱିକେଟ୍ ହରାଇ ୧୪୨ ରନ୍ କରିଥିଲା। ଜବାବରେ ଭାରତ ୧୭.୩ ଓଭରରେ ୩ ୱିକେଟ୍ ହରାଇ ୧୪୩ ରନ୍ କରି ବିଜୟୀ ହୋଇଛି। ଏହି ବିଜୟ ସହ ଭାରତ ତିନିମ୍ୟାଚ୍ ବିଶିଷ୍ଟ ସିରିଜରେ ୧-୦ରେ ଆଗୁଆ ହୋଇଛି। ସିରିଜର ତୃତୀୟ ତଥା ଅନ୍ତିମ ମ୍ୟାଚ୍ ୧୦ ତାରିଖରେ ରାଞ୍ଚିରେ ଖେଳାଯିବ।
୧୪୩ ରନର ଲକ୍ଷ୍ୟର ପିଛା କରୁଥିବା ଭାରତକୁ ଭଲ ଷ୍ଟାର୍ଟ ଦେଇଥିଲେ ଓପ୍ନର ରାହୁଲ୍ ଓ ଧୱନ୍। ଦୁହେଁ ଆରମ୍ଭରୁ ଦ୍ରୁତ ରନ୍ କରିଥିଲେ ଏବଂ ପ୍ରଥମ ୱିକେଟ୍ ପାଇଁ ୭୧ ରନର ଯୋଗଦାନ କରିଥିଲେ। ଇନଫର୍ମ ରାହୁଲ୍ ନିଜର ଚିରାଚରିତ ବ୍ୟାଟିଂ ଜାରି ରଖି ଦ୍ରୁତ ୪୫ (୩୨ ବଲ୍, ୬ ଚୌକା) ରନ୍ କରି ପ୍ୟାଭିଲିୟନ୍ ଫେରିଥିଲେ। ପ୍ରତ୍ୟାବର୍ତ୍ତନ ମ୍ୟାଚ୍ ଖେଳୁଥିବା ଧୱନ୍ ମଧ୍ୟ ଭଲ ବ୍ୟାଟିଂ କରିଥିଲେ। ସେ ବ୍ୟକ୍ତିଗତ ୩୨ (୨୯ ବଲ୍, ୨ ଚୌକା) ରନ୍ କରିଥିବା ବେଳେ ୱାନିନ୍ଦୁ ହସରଙ୍ଗାଙ୍କ ଶିକାର ହୋଇଥିଲେ।
ଏହା ପରେ କ୍ୟାପଟେନ୍ ବିରାଟ୍ କୋହଲି ଓ ଶ୍ରେୟସ୍ ଆୟର୍ ରନ୍ ଗତି ଜାରି ରଖିଥିଲେ ଏବଂ ଟିମକୁ ବିଜୟ ନିକଟତର କରାଇଥିଲେ। ଦୁହେଁ ତୃତୀୟ ୱିକେଟ୍ ପାଇଁ ୫୧ ରନର ମହତ୍ତ୍ୱପୂର୍ଣ୍ଣ ଭାଗୀଦାରୀ କରିଥିଲେ। ଆୟର୍ ୨୬ ବଲରେ ୩ ଚୌକା ଓ ୧ ଛକା ସହ ୩୪ ରନ୍ କରି ଆଉଟ୍ ହେବା ପରେ କୋହଲି ଓ ଋଷଭ ପନ୍ତ ଟିମକୁ ବିଜୟୀ କରାଇଥିଲେ। କୋହଲି ୩୦ (୧୭ ବଲ୍, ୧ ଚୌକା, ୨ ଛକା) ଓ ପନ୍ତ ୧ ରନ୍ କରି ଅପରାଜିତ ଥିଲେ। ଶ୍ରୀଲଙ୍କା ପକ୍ଷରୁ ହସରଙ୍ଗା ୨ଟି ଓ ଲାହିରୁ କୁମାରା ଗୋଟିଏ ୱିକେଟ୍ ନେଇଥିଲେ।
ପୂର୍ବରୁ ଟିମ୍ ଇଣ୍ଡିଆ କ୍ୟାପଟେନ୍ କୋହଲି ଟସ୍ ଜିତି ଫିଲ୍ଡିଂ ନିଷ୍ପତ୍ତି ନେଇଥିଲେ। ଶ୍ରୀଲଙ୍କାର ଦୁଇ ଓପ୍ନର ଦନୁସ୍କା ଗୁଣତିଳକ ଓ ଅଭିସ୍କା ଫର୍ଣ୍ଣାଣ୍ଡୋ ଭଲ ଆରମ୍ଭ କରିଥିଲେ ଏବଂ ପ୍ରଥମ ୱିକେଟ୍ ପାଇଁ ୩୮ ରନ୍ ଯୋଡ଼ିଥିଲେ। ଯୁବ ବ୍ୟାଟ୍ସମ୍ୟାନ୍ ଫର୍ଣ୍ଣାଣ୍ଡୋ ୨୨ ରନ୍ କରି ୱାଶିଂଟନ୍ ସୁନ୍ଦରଙ୍କ ଶିକାର ହୋଇଥିଲେ। ଅନ୍ୟତମ ଓପନିଂ ବ୍ୟାଟ୍ସମ୍ୟାନ୍ ଗୁଣତିଳକ (୨୦)ଙ୍କୁ ଯୁବ ପେସର ନଭଦୀପ ସାଇନି କ୍ଲିନ୍ ବୋଲ୍ଡ କରିଥିଲେ। ବାମହାତୀ ବ୍ୟାଟ୍ସମ୍ୟାନ୍ କୁଶଲ ପରେରା ଭାରତୀୟ ବୋଲରଙ୍କୁ ଆକ୍ରମଣ କରିଥିଲେ ହେଁ, ତାଙ୍କୁ ଅନ୍ୟ ପଟୁ ସେଭଳି ସହଯୋଗ ମିଳିନଥିଲା। ଚତୁର୍ଥ ସ୍ଥାନରେ ବ୍ୟାଟିଂ କରିବାକୁ ଆସିଥିବା ଓଶାଡା ଫର୍ଣ୍ଣାଣ୍ଡେ (୧୦)ଙ୍କୁ କୁଲଦୀପ ଯାଦବ ଋଷଭ ପନ୍ତଙ୍କ ଦ୍ୱାରା ଷ୍ଟମ୍ପ ଆଉଟ୍ କରାଇଥିଲେ। ଏହା ପରେ ପରେରାଙ୍କୁ ମଧ୍ୟ କୁଲଦୀପ ନିଜର ଶିକାର ବନାଇ ଶ୍ରୀଲଙ୍କା ରନରେ ଅଙ୍କୁଶ ଲଗାଇଥିଲେ।
ପରେରା ୨୮ ବଲରେ ୩ ଛକା ସହ ୩୪ ରନ୍ କରିଥିଲେ। ଭାନୁକା ରାଜପାକସା (୯)ଙ୍କୁ ସାଇନି ଏବଂ ଦାସୁନ୍ ଶନକା (୭)ଙ୍କୁ ପ୍ରତ୍ୟାବର୍ତ୍ତନକାରୀ ଯଶପ୍ରୀତ ବୁମ୍ରା ପ୍ୟାଭିଲିୟନ୍ ପଠାଇଥିଲେ। ଏହା ପରେ ଶାର୍ଦ୍ଦୁଲ ଠାକୁର ଇନିଂସର ୧୯ତମ ଓଭରରେ ତିନୋଟି ୱିକେଟ୍ ନେଇ ଶ୍ରୀଲଙ୍କାକୁ ବଡ଼ ସ୍କୋରରୁ ରୋକିଥିଲେ। ସେ ଏହି ଓଭରର ଦ୍ୱିତୀୟ ବଲରେ ଧନଞ୍ଜୟ ଡି’ସିଲଭା (୧୭), ପଞ୍ଚମ ବଲରେ ଇସୁରୁ ଉଦାନା (୧) ଏବଂ ଷଷ୍ଠ ବଲରେ (୦) କ୍ୟାପଟେନ୍ ଲସିଥ୍ ମାଲିଙ୍ଗାଙ୍କୁ ଆଉଟ୍ କରିଥିଲେ।
ପରବର୍ତ୍ତୀ ମ୍ୟାଚରେ ଶାର୍ଦ୍ଦୁଲଙ୍କ ପାଖରେ ହ୍ୟାଟ୍ରିକ୍ ସଫଳତା ନେବାର ସୁଯୋଗ ରହିବ। ଶେଷଭାଗରେ ୱାନିନ୍ଦୁ ହସରଙ୍ଗା ୧୦ ବଲରେ ଅପରାଜିତ ୧୬ (୩ ଚୌକା) ରନ୍ କରି ଶ୍ରୀଲଙ୍କାର ସମ୍ମାନ ରକ୍ଷା କରିଥିଲେ। ଭାରତ ପକ୍ଷରୁ ଶାର୍ଦ୍ଦୁଲ ଠାକୁର ୨୩ ରନ୍ ଦେଇ ୩ଟି ୱିକେଟ୍ ନେଇଥିବା ବେଳେ ସାଇନି ଓ କୁଲଦୀପ ୨ଟି ଲେଖାଏ ୱିକେଟ୍ ହାସଲ କରିଥିଲେ। ବୁମ୍ରା ନିଜର ପ୍ରତ୍ୟାବର୍ତ୍ତନ ମୁକାବିଲାରେ ୩୨ ରନ୍ ଦେଇ ଗୋଟିଏ ସଫଳତା ପାଇଥିଲେ।