ଶାଶ୍ଵତ ସଙ୍ଗୀତ ଶ୍ରୀମଦ୍ଭାଗବଦ୍ ଗୀତା ପୁସ୍ତକ ଲୋକାର୍ପିତ …!
!!! କଳାହାଣ୍ଡି ରୁ ଜିଲ୍ଲା ପ୍ରତିନିଧି ମୋନଜ କୁମାର ସିଂ ଙ୍କ ରିପୋର୍ଟ !!!
ଏଥର ସମ୍ଭାଳ (ଭବାନୀପାଟଣା)- ଶ୍ରୀମତୀ ସ୍ନେହଲତା ଷଡ଼ଙ୍ଗୀଙ୍କ ରଚିତ ପୁସ୍ତକ “ଶାଶ୍ଵତ ସଙ୍ଗୀତ ଶ୍ରୀମଦ୍ଭାଗବଦ୍ ଗୀତା” ଲୋକାର୍ପିତ ହୋଇଛି। ଭବାନୀପାଟଣା ସ୍ଥିତ ସତ୍ୟସାଇ ବିଦ୍ୟା ମନ୍ଦିରରେ ଆୟୋଜିତ ଲୋକାର୍ପଣ ଉତ୍ସବରେ ଭବାନୀପାଟଣା ଚିନ୍ମୟ ମିଶନର ମୁଖ୍ୟ ସ୍ବାମୀ ଅମେୟାନନ୍ଦ ଜି ମହାରାଜ, ସଂସ୍କୃତି ଗବେଷକ ତଥା ବରିଷ୍ଠ ସାମ୍ବାଦିକ ସତ୍ୟ ନାରାୟଣ ମହାପାତ୍ର, ଗୀତା ପ୍ରଚାର ସମିତି ଭବାନୀପାଟଣାର ପ୍ରତିଷ୍ଠାତା ସଭାପତି ଇଂ ନିରଞ୍ଜନ ପ୍ରଧାନ, ଅବସର ପ୍ରାପ୍ତ ହିନ୍ଦୁସ୍ଥାନ ଏରୋନେଟିକ୍ସ ର ପ୍ରକଳ୍ପ ଅଧିକାରୀ ଗୋପାଳ କୃଷ୍ଣ ଷଡ଼ଙ୍ଗୀ, ହିଲ୍ ଟାଉନ୍ ସିଭିଲ ସୋସାଇଟିର ସମ୍ପାଦକ ଜିତେନ୍ଦ୍ର ମୁଣ୍ଡ, ସତ୍ୟସାଇ ବିଦ୍ୟା ମନ୍ଦିରର ସମ୍ପାଦକ ସୁବ୍ରତ କୁମାର ଖାଡଙ୍ଗା ଓ ଶ୍ରୀରୂପା ପବ୍ଲିକେଶନର ଉପଦେଷ୍ଟା ଗାଳ୍ପିକ ସୁକାନ୍ତ କୁମାର ସାହୁ ଅତିଥି ଭାବରେ ଯୋଗଦେଇଥିଲେ। ଲେଖିକା ଶ୍ରୀମତୀ ସ୍ନେହଲତା ଷଡ଼ଙ୍ଗୀ ଦୀର୍ଘ ଛଅ ବର୍ଷ ଧରି ତପସ୍ୟା ଓ ସାଧନା ଦ୍ବାରା ଗୀତା ଭଳି ଏକ ପବିତ୍ର ଆଧ୍ୟାତ୍ମକ ଗ୍ରନ୍ଥ ଅନୁଦିତ ଓ ଟୀକା ପ୍ରସ୍ତୁତ କରିଛନ୍ତି। ଭଗବତ କୃପା ବିନା ଏହିଭଳି ଗ୍ରନ୍ଥ ରଚନା ସମ୍ଭବ ନୁହେଁ ବୋଲି ଅତିଥି ମାନେ ମତବ୍ୟକ୍ତ କରିବା ସହ ଗୀତା ସଂସାରର ସବୁଠୁ ଅମୂଲ୍ୟ ସମ୍ପଦ ଏବଂ ଏହା ପଠନ ଦ୍ଵାରା ମାନସିକ ଅବସାଦ, ଦୁଶ୍ଚିନ୍ତା ରୁ ନିଶ୍ଚୟ ମୁକ୍ତି ମିଳେ। ଏଣୁ ସମସ୍ତେ ପ୍ରତିଦିନ ଅନ୍ତତଃ ଗୀତାର ଗୋଟିଏ ଶ୍ଲୋକ ପାଠ କରି ତାହାର ଭାବାର୍ଥ ବୁଝି ନିଜ ଜୀବନରେ ପ୍ରୟୋଗ କରି ଶାନ୍ତିରେ ଜୀବନଯାପନ କରିବା ନିମନ୍ତେ ଅତିଥି ମାନେ ମତବ୍ୟକ୍ତ କରିଥିଲେ। ସୁଶ୍ରୀ ସୁନୟନା ମୁଣ୍ଡ ପ୍ରାରମ୍ଭିକ ସଙ୍ଗୀତ ଓ ସତ୍ୟସାଇ ସେବା ସମିତି ଭକ୍ତ ବୃନ୍ଦ ଭଜନ ପରିବେଷଣ କରିଥିଲେ। ମନୋଜ କୁମାର ମୁଣ୍ଡ ଅତିଥି ପରିଚୟ ପ୍ରଦାନ ଓ ସ୍ବାଗତ ଭାଷଣ ପ୍ରଦାନ କରିଥିଲେ। ଏହି ଅବସରରେ ବ୍ରାହ୍ମଣ ସମାଜର ଟ୍ରଷ୍ଟି ପ୍ରମୋଦ ଖମାରୀ ଓ କଳାହାଣ୍ଡି ଲେଖିକା ସଂଘ ପକ୍ଷରୁ ପୁସ୍ତକର ରଚୟିତା ସ୍ନେହଲତା ଷଡ଼ଙ୍ଗୀଙ୍କୁ ସମ୍ମାନିତ କରାଯାଇଥିଲା। ସେହିପରି ଲୋକାର୍ପଣ ଆୟୋଜକଙ୍କ ପକ୍ଷରୁ ଏକେଏନ ନ୍ୟୂଜ୍ ର ମୁଖ୍ୟ ସମ୍ପାଦକ ଅମିୟ କୁମାର ସାହୁଙ୍କୁ ସମ୍ମାନିତ କରାଯାଇଥିଲା। ଆକାଶବାଣୀ କଳାକାର ସୌରଭ ମହାପାତ୍ର ମଞ୍ଚ ପରିଚାଳନା କରିଥିବା ବେଳେ ହରିଶ୍ଚନ୍ଦ୍ର ମୁଣ୍ଡ ଧନ୍ୟବାଦ ଅର୍ପଣ କରିଥିଲେ।