ଏଥର ସମ୍ଭାଳ ବ୍ୟୁରୋ(ଗୁଣପୁର)- ନିର୍ବାଚନ ପାଖେଇ ଆସୁଥିବା ବେଳେ ଗୁଣପୁର ନିର୍ବାଚନମଣ୍ଡଳୀ ରେ କଂଗ୍ରେସ ଶିବିର ହଠାତ୍ ଚଳଚଞ୍ଚଳ ହୋଇ ଉଠିଛି। କଂଗ୍ରେସ ର ବିଭିନ୍ନ ଆଶାୟୀ ପ୍ରାର୍ଥୀଙ୍କ ସମେତ ନେତାମାନେ ଏବେ ତୃଣମୂଳସ୍ତରରେ ସଙ୍ଗଠନ ସଜାଡିବା କାର୍ଯ୍ଯରେ ଲାଗି ପଡିଛନ୍ତି। ଗୁଡାରି ବ୍ଲକର ବିଭିନ୍ନ ପଞ୍ଚାୟତ ବୁଲି ପିସିସି ସଭ୍ୟ ତଥା ବରିଷ୍ଠ ନେତା ରଘୁପାତ୍ର ଓ ବ୍ଲକ ସଭାପତି ଭାସ୍କର ଜାଗାରାଙ୍ଗା ଘରେ ଘରେ କଂଗ୍ରେସ କାର୍ଯ୍ଯକ୍ରମ କରୁଥିବାର ଦେଖା ଯାଉଛି। ଯୁବନେତା ତଥା ଜିଲ୍ଲା ସଭାପତି ବିଜୟ ଗମାଙ୍ଗ ଙ୍କ ପୁଅ ଅବିନାଶ ଗମାଙ୍ଗ ଏହି ନିର୍ବାଚନ ମଣ୍ଡଳୀ ପାଇଁ କଂଗ୍ରେସ ର ଆଶାୟୀ ପ୍ରାର୍ଥି ହୋଇ ଉଭା ହବାପରେ ସ୍ଥାନୀୟ ଅଞ୍ଚଳରେ କଂଗ୍ରେସ ର ବିଭିନ୍ନ କାର୍ଯ୍ଯକ୍ରମ କୁ ତ୍ବରାନ୍ବିତ କରି ଯୁବ ସଙ୍ଗଠନ ସଜାଡିବା କାର୍ଯ୍ଯରେ ଲାଗି ପଡିଥିବା ଦେଖା ଯାଉଛି। ଦଳର ସଭା ସମିତି ଶୋଭାଯାତ୍ରା ବିକ୍ଷୋଭ ସବୁଠି ବିଜୟ ଓ ତାଙ୍କ ପୁଅଙ୍କୁ ସକ୍ରିୟ ଭୁମିକା ରେ ଦେଖିବାକୁ ମିଳୁଛି। ଅନ୍ଯପକ୍ଷେ ଗୁଡାରିରେ ସଙ୍ଗଠନକୁ ସକ୍ରିୟ କରିଥିବା ଭାସ୍କର ଜାଗାରାଙ୍ଗା ଗତ ଦୁଇଦିନ ତଳେ ତାଙ୍କ ସମର୍ଥକ ମାନଙ୍କ ସହ ଆସି ଜିଲ୍ଲା ସଭାପତି ବିଜୟ ଙ୍କ ନିକଟରେ ଦଳିୟ ଟିକଟ୍ ପାଇଁ ଆବେଦନ କରିଥିଲେ। ଗତକାଲି ଚନ୍ଦ୍ରପୁର ବ୍ଲକରେ ଆଉଜଣେ ଆଶାୟୀ ପ୍ରାର୍ଥୀ ସତ୍ଯଜିତ୍ ଗମାଙ୍ଗ କର୍ମି ସମ୍ମିଳନୀ କରି ବିଜେଡିରୁ କେତେକ ପ୍ରମୁଖ କର୍ମି ଓ ନେତାଙ୍କୁ କଂଗ୍ରେସ ରେ ମିଶାଇବା ପରେ ଆଜି ସେ କଂଗ୍ରେସ ଟିକଟ୍ ପାଇଁ ଗୁଣପୁର ପୂର୍ତ୍ତବିଭାଗ ଡାକବଙ୍ଗଳା ଠାରେ ଜିଲ୍ଲା ସଭାପତି ଙ୍କ ନିକଟରେ ଆବେଦନ କରିଛନ୍ତି। ଏହି ଆବେଦନ ବେଳେ ପଦ୍ମପୁର ବ୍ଲକ ସଭାପତି ସାହେବ ଶବର ଓ ଗୁଣୁପୁର ସାଂସଦ ପ୍ରତିନିଧି ଦିବସ ରାଇକା,ପୁଟାସିଂ ସମିତି ସଭ୍ୟ ସୁଲେମାନ ଗମାଙ୍ଗ, ଏଲଏମଡି କର୍ଡିନେଟର ତରଣୀ ଶତପଥୀ,ରଂଜିତ ଗଣ୍ଟା ଓ ସହଯୋଗୀ,ଗୁଡ଼ାରୀ ସାଂସଦ ପ୍ରତିନିଧି ପେଦିନା ରମେଶ,ଜିଲ୍ଲା କମିଟି ସମ୍ପାଦକ ଚନ୍ଦ୍ରପୁରର ମୁରାରୀ ଦଣ୍ଡସେନା , ଜିଲ୍ଲା କାର୍ଯ୍ଯ ନିର୍ବାହୀ ସଦଶ୍ଯ ରାମନାଗୁଡ଼ାର ରଂଜିତ ନାୟକ ବେହେରାଙ୍କ ସମେତ ବୁଗା ଶବର, ମାଝୀ ଶବର, ନବୀନ ଲିମା ଏବଂ ପାଞ୍ଚଟି ବ୍ଲକର ଶତାଧିକ ସମର୍ଥିତ କଂଗ୍ରେସ କର୍ମୀଙ୍କ ଉପସ୍ଥିତରେ ଏହି ଆବେଦନ କରିଥିଲେ। ପ୍ରତିଦିନ କଂଗ୍ରେସ ର ବିଭିନ୍ନ ବ୍ଲକର ପଞ୍ଚାୟତ ସ୍ତରରେ ନେତାମାନେ ଜନ ସମ୍ପର୍କ ସ୍ଥାପନ କାର୍ଯ୍ଯକ୍ରମ କରୁଥିବାର ମଧ୍ୟ ଦେଖା ଯାଉଛି। ଗତବର୍ଷ ଦଳିୟ କାର୍ଯ୍ଯକ୍ରମ ଗୁଡାକରେ ହାତ ଗଣତି କର୍ମିଙ୍କ ଉପସ୍ଥିତି ଦେଖିବାକୁ ମିଳୁଥିବା ବେଳେ ହଠାତ୍ ଦଳରେ ଏକାଧିକ ଯୁବନେତା ଆଶାୟୀ ପ୍ରାର୍ଥୀ ଭାବରେ ବାହାରି ସଙ୍ଗଠନକୁ ସଜାଡିବା କାର୍ଯ୍ୟରେ ଲାଗି ପଡିଥିବାର ଦେଖାଯିବା ସହ ପୁରୁଣା କଂଗ୍ରେସିଆ ନେତା ଓ କର୍ମି ମାନଙ୍କ ସକ୍ରିୟତା ଦେଖିବାକୁ ମିଳୁଛି। ଯାହାକି ରାଜନୈତିକ ମହଲରେ ଚର୍ଚ୍ଚା ଯୋର ଧରିଛି ।
