ଏଥର ସମ୍ଭାଳ ବ୍ୟୁରୋ (ଗୁଣପୁର)-ସ୍ଥାନୀୟ ଗାନ୍ଧି ପବ୍ଲିକ ସ୍କୁଲ ପରିସରରେ ଆଜି ଛାତ୍ରଛାତ୍ରୀ ମାନଙ୍କ ମଧ୍ୟରେ ନିଜର ନୂତନ ଚିନ୍ତାଧାରା ଓ ଷ୍ଟାର୍ଟଅପ ପ୍ରକଳ୍ପ ସମ୍ବନ୍ଧୀୟ ଏକ କାର୍ଯ୍ୟକ୍ରମ ଅନୁଷ୍ଠିତ ହୋଇଥିଲା । ଯେଉଁଥିରେ ବିଦ୍ୟାଳୟର ନବମରୁ ଦ୍ୱାଦଶ ଶ୍ରେଣୀର ସମସ୍ତ ଛାତ୍ରଛାତ୍ରୀ ଅଂଶଗ୍ରହଣ କରି ନୂଆ ଷ୍ଟାର୍ଟଅପ ବା ଆଇଡ଼ିଆ ପରିପ୍ରକାଶ କରିଥିଲେ ।ଓଡିଶା ସରକାରଙ୍କ ଅଣୁ, କ୍ଷୁଦ୍ର ଓ ମଧ୍ୟମ ଉଦ୍ୟୋଗ ବିଭାଗର ଓଡିଶା ଷ୍ଟାର୍ଟଅପ ଭ୍ରାମ୍ୟମାଣ ଭ୍ୟାନ୍ ସ୍କୁଲର ପରିସରରେ ଛାତ୍ରଛାତ୍ରୀଙ୍କ ଠାରୁ ଅଭିନବ ବିଚାର ସଂଗ୍ରହ କରିଥିଲା। ଦେବାଶିଷ ସିଂଦେଓ,ଗୌତମୀ ବିଡିକା ଏକାଦଶ ଶ୍ରେଣୀ, ଗୋବିନ୍ଦ ପାଢ଼ୀ ନବମ ଶ୍ରେଣୀ, କେ ଧନିସ୍ମା, ଓଁ ପ୍ରକାଶ ଦେଓ ଦଶମ ଶ୍ରେଣୀ, ପ୍ରିୟାଂଶୁ ଗମାଙ୍ଗ, ଶ୍ରାବଣୀ ସାହୁ ଦ୍ୱାଦଶ ଶ୍ରେଣୀ ର ଛାତ୍ରଛାତ୍ରୀମାନେ ନିଜର ନୂତନ ଚିନ୍ତାଧାରା ଓ ପ୍ରକଳ୍ପ ବିଷୟରେ କହିଥିଲେ ଏବଂ ଉକ୍ତ ପ୍ରକଳ୍ପକୁ ଓଡିଶା ଷ୍ଟାର୍ଟଅପ ଆପରେ ଡାଉନଲୋଡ କରି ସେମାନେ ପଞ୍ଜିକରଣ କରିବେ ।
ପରିଶେଷରେ ୨୦ଟି ବିଚାରଧାରାକୁ ଉପସ୍ଥାପନା ପାଇଁ ଭୁବନେଶ୍ୱରକୁ ଆମନ୍ତ୍ରିତ କରାଯିବ ଓ ପୁରସ୍କୃତ କରାଯିବ। ଏହା ଏକ ପ୍ରାରମ୍ଭ ମାତ୍ର। ବିଦ୍ୟାଳୟ ର ସମସ୍ତ ଛାତ୍ର ଛାତ୍ରୀ ଓଡିଶା ଷ୍ଟାର୍ଟଅପ ରେ ନିଜ ନିଜର ବିଚାର ଧାରା କୁ ପଞ୍ଜିକରଣ କରି ଏହି ଯାତ୍ରା ରେ ନିଜକୁ ସାମିଲ କରିପାରିବା ନିମନ୍ତେ ଇଛୁକ। ଏହିପରି ପରିପ୍ରେକ୍ଷୀରେ ବିଦ୍ୟାଳୟର ଅଧ୍ୟକ୍ଷ ସୁବ୍ରତ ରଞ୍ଜନ ପାଠୀ କହିଥିଲେ, ଓଡିଶା ଷ୍ଟାର୍ଟଅପର ଲକ୍ଷ୍ୟ ହେଉଛି ଛାତ୍ରଛାତ୍ରୀଙ୍କ ନବ ସୃଜନଶୀଳତାକୁ ପ୍ରେରଣା ଦେବା ଓ ସେମାନଙ୍କ ନୂଆ ବିଚାରଧାରାକୁ ଏକତ୍ରିତ କରିବା । ଜିଆଇଇଟି ବିଶ୍ୱବିଦ୍ୟାଳୟର ମହାନିର୍ଦ୍ଦେଶକ ଡ଼ଃ ଜଗଦୀଶ ପଣ୍ଡା କହିଥିଲେ ଏହି ଅଭିଯାନ ଛାତ୍ରଛାତ୍ରୀଙ୍କ ବିଚାର, ସୃଜନଶୀଳତାକୁ ଆଗେଇ ନେବା ସହିତ ଏକ ମାର୍ଗ ପ୍ରଦାନ କରି ସଶକ୍ତ କରିବ । ଏହି କାର୍ଯ୍ୟକ୍ରମରେ ସମସ୍ତ ଶିକ୍ଷକ ଶିକ୍ଷୟିତ୍ରୀ ଉପସ୍ଥିତ ଥିଲେ । ଜିଆଇଇଟି ବିଶ୍ୱବିଦ୍ୟାଳୟର ସଭାପତି ଡ଼ଃ ସତ୍ୟପ୍ରକାଶ ପଣ୍ଡା ଉପସଭାପତି ଡ଼ଃ ଚନ୍ଦ୍ରଧ୍ଵଜ ପଣ୍ଡା ଏହି କାର୍ଯ୍ୟକ୍ରମ ପାଇଁ ଅଭିନନ୍ଦନ ଜଣାଇଥିଲେ ।
