ଏଥର ସମ୍ଭାଳ ବ୍ୟୁରୋ(ଗୁଣପୁର)- ରାୟଗଡ଼ା ଜିଲ୍ଲା ଗୁଣପୁର ସମନ୍ୱିତ ଆଦିବାସୀ ଯୋଜନାର ର ଅଧିକାରୀ ଭାବେ ଶାନ୍ତି ପ୍ରଭା ପ୍ରଧାନ ଏବଂ ଗୁଣପୁର ବିଡିଓ ଭାବେ ସୁଶ୍ରୀ ପ୍ରଭାତି ଝୋଡିଆ ଦାୟିତ୍ଵ ଗ୍ରହଣ କରିବା ପରେ ସାଧାରଣରେ ଚର୍ଚ୍ଚାକୁ ଆସିଛନ୍ତି ଶ୍ରୀମତୀ ପ୍ରଧାନ ଓ ସୁଶ୍ରୀ ଝୋଡିଆ। ବିଜେଡି ନେତା ଙ୍କ ଇସରାରେ ଚାଲିବା ଭଳି କିଛି ସରକାରୀ କର୍ମଚାରୀ ଏବଂ ପ୍ରଶାସକ ଓ ପ୍ରଶାସିକା ଙ୍କୁ ଜିଲ୍ଲାର ବିଭିନ୍ନ କାର୍ଯ୍ୟାଳୟରେ ଅବସ୍ଥାପିତ କରିବାରେ ଲାଗିଲା ବିଜେଡି । ସେଥି ମଧ୍ୟରୁ ଶ୍ରୀମତୀ ପ୍ରଧାନ ଓ ସୁଶ୍ରୀ ଝୋଡ଼ିଆ । ଗୁଣପୁର ପୌର ପରିଷଦର ତତ୍କାଳୀନ ଅଧ୍ୟକ୍ଷ ସାନ ଭାଇନା ଓରଫ ଶିବ ପ୍ରସାଦ ଗୌଡ଼ ଜିଲ୍ଲାର ଭାଇନା ଙ୍କ ବିପକ୍ଷରେ ଯାଉଥିବା ଅନୁମାନ କରି ସୁଧୀର ଏବଂ ସାନ ଗୌଡ଼ ଙ୍କ ମଧ୍ୟରେ ତିକ୍ତତା ବଢିଲା । ସୁଧୀର ସଂଗଠନକୁ ଚାଲେଞ୍ଜ କରି ସାନ ଗୌଡ ପଞ୍ଚାୟତ ନିର୍ବାଚନ ରେ ହାତେଇ ନେଲେ ଗୁଣପୁର ସମିତି ଏବଂ ପୌର ପରିଷଦ । ଏହାପରେ ବଢିଲା ଉଭୟଙ୍କ ମଧ୍ୟରେ ତିକ୍ତତା । ସାନ ଗୌଡ଼ ଙ୍କୁ ଚେକ୍ ଦେବା ଲାଗି ସମିତିରେ ଯୋଖି ଦେଲେ ପ୍ରଶାସିକା ଭାବେ ଅଙ୍ଗୁଳି ନିର୍ଦ୍ଦେଶରେ ଚାଲୁଥିବା ଶାନ୍ତି ପ୍ରଭା ଙ୍କୁ । ସେହି ଦିନରୁ ଅଶାନ୍ତ ପରିବେଶରେ ଗତି କରିଥିଲା ଗୁଣପୁର ବ୍ଲକ । ଏଭଳି କି କୋର୍ଟ ଦ୍ଵାର ପର୍ଯ୍ୟନ୍ତ ଗଲା ଅଶାନ୍ତ ର ନିଆଁ । ବ୍ଲକର ଉନ୍ନୟନ କାର୍ଯ୍ୟରେ ବାଧା ସୃଷ୍ଟି ହେଲା । ଏମିତିକି ପୌର ପରିଷଦର କାର୍ଯ୍ୟରେ ମଧ୍ୟ ଚେକ୍ ଦେବା ଆରମ୍ଭ ହେଲା । ଏହା ପଦାକୁ ଆସିଲା ଯେତେବେଳେ ଜିଲ୍ଲାପାଳ ଗୁଣପୁର ଆଦର୍ଶ ବିଦ୍ୟାଳୟ ପରିଦର୍ଶନ ରେ ଆସି ପୌର ପରିଷଦ କରିବାକୁ ଥିବା ଏହାର ଉନ୍ନୟନ ମୂଳକ କିଛି କାମକୁ ସିଧାସଳଖ ବିଡିଓ ଶାନ୍ତି ପ୍ରଭା ଙ୍କୁ କରିବାକୁ କହିଲେ । ପୌର ପରିଷଦ କରିବାକୁ ଥିବା କାମକୁ ବ୍ଲକ ମାଧ୍ୟମରେ କରାଇବାକୁ ଦେବା ନିର୍ଦ୍ଦେଶ କଥାଟିକୁ ଯେତିକି ଲୋକ ଲୋଚନକୁ ଆଣି ପାରିନଥିଲା ତାହା ସଂପୂର୍ଣ ସ୍ପଷ୍ଟ କରିଥିଲା ବ୍ଲକ ର ପ୍ରଶାସିକା ଦାୟିତ୍ବରେ ଖଞ୍ଜି ଯାଇଥିବା ଶାନ୍ତି ପ୍ରଭା ଙ୍କୁ । ଶାନ୍ତି ପ୍ରଭାଙ୍କ ଚାକିରୀରେ ପଦୋନ୍ନତି ଆସିବାର ଜଣାଯିବା ପରେ ତାଙ୍କ ପାଇଁ ଗୁଣପୁର ଆଇ ଟି ଡି ଏ ଅଧିକାରୀ ର ପଦବୀକୁ ସୁରକ୍ଷିତ ରଖାଯାଇ ବାରମ୍ବାର ଅଧିକାରୀ ଙ୍କୁ ଅଦଳ ବଦଳ କରାଗଲା । ଏଥିରେ ଶାନ୍ତି ପ୍ରଭା ଙ୍କୁ ଆଗାମୀ ଦିନରେ ଅଧିକାରିଣୀ ଭାବେ ଅବସ୍ଥାପିତ କରି ଏହି ବିଭାଗକୁ ପୁଣି ନିଜ ଅକ୍ତିଆର କୁ ଆଣିବା କୁ କଥା ଦେଇଥିବା ସୁଧୀର ଭାଇନା ତାଙ୍କରି କଥା ରଖିଲେ । ଭିନ୍ନ ଭିନ୍ନ ଗୋଟି ଚଳାଇ ହାତେଇ ନେଲେ ଆଇଟିଡିଏ କୁ । ଗୁଣପୁର ଏବଂ ରାମନାଗୁଡ଼ା ରେ ଭଇନାଙ୍କ ପତିଆରା କମିବାକୁ ଲାଗିବାରୁ ସେଠାରେ ବିଭାଗୀୟ ପ୍ରଶାସିକା ଭାବେ ଅବସ୍ଥାପିତ କରାଗଲା ସୁଶ୍ରୀ ପ୍ରଭାତି ଝୋଡିଆ ଙ୍କୁ । ରାୟଗଡ଼ା ଜିଲ୍ଲାରୁ ବଦଳି ହୋଇ ଯାଇଥିବା ସୁଶ୍ରୀ ଝୋଡିଆ ଙ୍କୁ ପୁନର୍ବାର ଅଣାଗଲା ବ୍ଲକ ଅଧିକାରିଣୀ ଭାବେ । ଏପଟେ ରାମନାଗୁଡା ରେ ଅଧ୍ୟକ୍ଷ ରବି ଗମାଙ୍ଗ ଏବଂ ସେପଟେ ଗୁଣପୁର ରେ ସାନ ଗୌଡ଼ ଙ୍କୁ ଚେକ୍ ଦେବା ସହ ଗୁଣପୁର ପୌର ପରିଷଦ ଓ ସମିତିରେ ସମସ୍ତ ଉନ୍ନୟନ କାର୍ଯ୍ୟର ସବୁ ଠିକାଦାରୀ କାମକୁ ହାତେଇ ନେବା ପାଇଁ ହାତବାରିଶି ସାଜିଥିବା ସୁଶ୍ରୀ ଝୋଡିଆ ଙ୍କୁ ତିନୋଟି ଦାୟିତ୍ବରେ ରଖାଗଲା । ଯଦ୍ୱାରା ରାମାନାଗୁଡା ବ୍ଲକ ଓ ଗୁଣପୁର ପୌର ପରିଷଦ ରେ ବହୁ ଦ୍ରୁତ ଗତିରେ ଆଗେଇ ଯାଉଥିବା ଉନ୍ନୟନ ମୂଳକ କାର୍ଯ୍ୟ ଗୁଡିକ ସୁଶ୍ରୀ ଝୋଡିଆ ବିଡିଓ ଏବଂ ନିର୍ବାହୀ ଅଧିକାରୀ କାର୍ଯ୍ୟ ରେ ଯୋଗ ଦେବା ପରେ ସବୁ ଅଧ ପାନ୍ତାରିଆ ହୋଇ ପଡିରହିଲା । ଏହା ଜନ ସାଧାରଣ ଙ୍କ ନିମନ୍ତେ ଅଭିଶ୍ୟାପ । ଏଭଳି ସବୁ ସଙ୍ଗୀନ ଅଭିଯୋଗ ସୁଧୀର ବିରୋଧୀ ଗୋଷ୍ଠୀ ଆଣୁଥିବା ବେଳେ,ଭାଇନା ତାଙ୍କର କଥାକୁ ରଖିଥିବା ଭାଇନା ଙ୍କ ଚେଲା ଚାମୁଣ୍ଡା ମାନେ କହୁଥିବା କଥା ସାଧାରଣରେ ବଡ ଚର୍ଚ୍ଚାର ବିଷୟ ପାଲଟିଛି । ଏହାକୁ ନେଇ ବୁଦ୍ଧିଜୀବୀ ମାନେ ମତ ପ୍ରକାଶ କରିଛନ୍ତି,”ସବୁ ନବୀନ ଙ୍କ ଶାସନ କାଳରେ ସମ୍ଭବ,କେବଳ ପରିସ୍ଥିତିକୁ ଆପଣେଇ ଚାଲିବା ଭଲ ; କାହାକୁ କହିବା ଆପଣା ସୁନା ତ ଭେଣ୍ଡି “। ସେ ଯାହା ହେଉନା କାହିଁକି ଆମ୍ଭ ମତରେ,ଜିଲ୍ଲାରୁ ପ୍ରଶାସିକା ଙ୍କ ମୋହ ତୁଟୁ ନଥିବା କଥାଟି ଯେତିକି ସ୍ପଷ୍ଟ ନୁହଁ ତା’ଠାରୁ ଅଧିକ ଗୁରୁତ୍ବ ହେଉଛି ରାଜନୈତିକ ଅଭିସନ୍ଧି l କିନ୍ତୁ ଏସବୁ ଜିଲ୍ଲା ବାସୀଙ୍କ ପ୍ରତି ଶୁଭଙ୍କର ନୁହଁ। ଏଥିପ୍ରତି ରାଜ୍ୟ ପ୍ରଶାସନ ଏବଂ ରାଜ୍ୟ ନେତୃବୃନ୍ଦ ଦୃଷ୍ଟି ନଦେଲେ ଆଗାମୀ ଦିନରେ ଏହା ଏକ ବଡ ବିସ୍ଫୋରଣ ପାଲଟି ରାଜ୍ୟ ରାଜନୀତି କୁ ଚହଲାଇ ଦେବା ସମ୍ଭାବନାକୁ ଦୂରେଇ ହେବନି । ବିଜେଡ଼ି ହାତରୁ ଖସି ଆସୁଥିବା ଏହି ନିର୍ବାଚନ ମଣ୍ଡଳୀକୁ ବିରୋଧୀ ପାର୍ଟି ସୁବିଧାରେ ଅକ୍ତିଆର କରିନେବ ।
