ବିଇଓ ଙ୍କ କାର୍ୟ୍ୟାଳୟ ରେ ଲାଞ୍ଚ କାରବାର କୁ ନେଇ ଶିକ୍ଷକ ମହଲ ରେ ଅସନ୍ତୋଷ !
ଏଥର ସମ୍ଭାଳ ବ୍ୟୁରୋ (କେନ୍ଦୁଝର) – ହାଟଡିହି ବ୍ଲକ ଶିକ୍ଷା ଅଧିକାରୀଙ୍କ କାର୍ୟ୍ୟାଳୟରେ ଲାଞ୍ଚ କାରବାରକୁ ନେଇ ଶିକ୍ଷକ ମହଲରେ ଅସନ୍ତୋଷ ପ୍ରକାଶ ପାଇଛି। ଖବରରୁ ଜଣାଯାଇଛି ଯେ ବ୍ଲକ କାର୍ୟ୍ୟାଳୟର ଜଣେ କର୍ମଚାରୀ ଶିକ୍ଷକ ମାନଙ୍କ ଏରିୟର ଓ ଶିକ୍ଷୟତ୍ରୀ ମାନଙ୍କ ପ୍ରସବ କାଳୀନ ଛୁଟି ମଞ୍ଜୁର ପାଇଁ ହଜାରେ ଟଙ୍କାରୁ ଦୁଇ ହଜାର ଟଙ୍କା ପର୍ୟ୍ୟନ୍ତ ଲାଞ୍ଚ ଆଦାୟ କରୁଛନ୍ତି। ଯଦି କେହି ଶିକ୍ଷକ ଲାଞ୍ଚ ଦେଉ ନାହାନ୍ତି ତାଙ୍କ ଫାଇଲ କାମକୁ ଅଧାପନ୍ତରିଆ କରି ପକାଇ ଦେଉଛନ୍ତି। ଦୀର୍ଘ ମାସ ହେଲା ଏପରି ଚାଲିଥିବାବେଳେ ଗତ ଦୁଇଦିନ ତଳେ ଏହାକୁନେଇ ଜଣେ ଶିକ୍ଷକଙ୍କ ସହିତ ସଂପୃକ୍ତ କର୍ମଚାରୀଙ୍କର ପାଟିତୁଣ୍ଡ ହେବାପରେ ଘଟଣା ଲୋକଲୋଚନକୁ ଆସିଛି। ଏହାର ଉଚ୍ଚ ସ୍ତରୀୟ ତଦନ୍ତ କରାଯାଇ ସଂପୃକ୍ତ କର୍ମଚାରୀଙ୍କ ବିରୁଦ୍ଧରେ କାର୍ୟ୍ୟାନୁଷ୍ଠାନ ଗ୍ରହଣ କରିବାକୁ ଶିକ୍ଷକ ମାନେ ଦାବି କରିଛନ୍ତି। ଏ ସମ୍ପର୍କରେ ବ୍ଲକ ଶିକ୍ଷା ଅଧିକାରୀ ଶରତ ଚନ୍ଦ୍ର ରାଉତଙ୍କୁ ପଚାରିବାରେ ସେ ଅଭିଯୋଗ ପାଇବାପରେ ଆଜି ସଂପୃକ୍ତ କର୍ମଚାରୀଙ୍କୁ ସ୍ଥାନାନ୍ତରିତ କରାଯାଇଛି, ଏବଂ ଶିକ୍ଷକ ମାନଙ୍କୁ ଗୋଟିଏବି ଟଙ୍କା ଲାଞ୍ଚ ନଦେବାକୁ କୁହାଯାଇଛି। ଯଦି କହି କର୍ମଚାରୀ ଲାଞ୍ଚ ନେଉଥିବା ଅଭିଯୋଗ ଆସେ ତେବେ ଦୃଢ଼ କାର୍ୟ୍ୟାନୁଷ୍ଠାନ ଗ୍ରହଣ କରାଯିବ ବୋଲି ସେ କହିଛନ୍ତି। ଏଠାରେ ସୂଚନାଯୋଗ୍ୟ ଯେ ଗତବର୍ଷ କାର୍ୟ୍ୟାଳୟର ଜଣେ କିରାଣୀ ଓ ଚତୁର୍ଥଶ୍ରେଣୀ କର୍ମଚାରୀ ଏହିପରି ଲାଞ୍ଚ ଆଦାୟ କରୁଥିବା ଅଭିଯୋଗ ପାଇ କେନ୍ଦୁଝର ଜିଲ୍ଲା ଶିକ୍ଷା ଅଧିକାରୀ ରାତି ଅଧିଆ ତଦନ୍ତ କରିଥିଲେ। ପରବର୍ତ୍ତୀ ସମୟରେ କାର୍ୟ୍ୟଳୟର ମୁଖ୍ୟ କିରାଣୀ ଲାଞ୍ଚ ନେବାବେଳେ ଭିଜିଲାନସ ହାତରେ ଧରାପଡି ଥିଲେ।