!!! ରାୟଗଡା ରୁ ଜିଲ୍ଲା ପ୍ରତିନିଧି ବଳରାମ ମଲ୍ଲିକଙ୍କ ରିପୋର୍ଟ !!!
ଏଥର ସମ୍ଭାଳ (ରାୟଗଡା)- ବୟସ ଛୁଇଁଲାଣି ୯୦ ପାଖାପାଖି । ସ୍ୱାମୀ ତାଙ୍କର ଥିଲେ ଜଣେ ସ୍ୱାଧୀନତା ସଂଗ୍ରାମୀ । ୧୯୪୨ ମସିହା ଭାରତ ଛାଡ଼ ଆନ୍ଦୋଳନରେ ସାମିଲ ହୋଇଥିଲେ । ହେଲେ ତାଙ୍କ ମୃତ୍ୟୁ ପରେ ତାଙ୍କ ପତ୍ନୀ ଙ୍କୁ ଆଜିଯାଏଁ ମିଳି ପାରୁନି ସ୍ୱାଧୀନତା ସଂଗ୍ରାମୀ ଭତ୍ତା । ଏବୃଦ୍ଧା ଜଣକ ହେଉଛନ୍ତି ରାୟଗଡା ଜିଲ୍ଲା ରାମନଗୁଡା ବ୍ଲକ୍ କୁଜେନ୍ଦ୍ରି ଗ୍ରାମର ମାଙ୍ଗି ଶବର । ବୟସ ପାଖାପାଖି ୯୦ ଛୁଇଁଲାଣି । ଚମଧୁଡୁ ଧୁଡୁ ଅଣ୍ଟା ନଇଁ ଗଲାଣି । ହେଲେ ଆପଣ ଜାଣି ଆଶ୍ଚର୍ଯ୍ୟ ହେବେ ଏ ବୃଦ୍ଧା ହେଉଛନ୍ତି ଜଣେ ସ୍ୱାଧୀନତା ସଂଗ୍ରାମୀଙ୍କ ପତ୍ନୀ । ୧୯୪୨ ମସିହାରେ ଗାନ୍ଧିଙ୍କ ଡାକରା ଓ କୋରାପୁଟ ଗାନ୍ଧୀ କୁହାଯାଉଥିବା ବିଶ୍ୱନାଥ ପଟ୍ଟନାୟକ ଙ୍କ ପ୍ରେରଣା ରେ ସ୍ଵାମୀ ତୁଡୁକୁ ଶବର ଭାରତ ଛାଡ଼ ଆନ୍ଦୋଳନ ରେ ଯୋଗ ଦେଇଥିଲେ । ରମାନଗୁଡା ବ୍ଲକ୍ ର କୁଜେନ୍ଦ୍ରି, ଗୁଲୁମୁଣ୍ଡା, ଆଚବା,ନାରାୟଣ ଗୁଡା, ଗୁଲୁଣ୍ଠି ଏଭଳି ଅନେକ ଗ୍ରାମର ପ୍ରାୟ ୫୦ ଆଦିବାସୀ ପୁରୁଷ ଓ ମହିଳା ଏହି ସ୍ୱାଧୀନତା ସଂଗ୍ରାମ ରେ ଯୋଗ ଦେଇ ମା ମାଟି ପାଇଁ ସଂଗ୍ରାମ କରିଥିବା ଜଣାପଡେ ।
କୁଜେନ୍ଦ୍ରି ସ୍ଥିତ ବାଇରୁ ଗମାଙ୍ଗ ଆଶ୍ରମ ପରିସରରେ ଥିବା ସ୍ୱାଧୀନତା ସଂଗ୍ରାମୀ ସ୍ମୃତିପୀଠ ରେ ଏହି ବୃଦ୍ଧା ଙ୍କ ସ୍ୱାମୀ ତୁଡୁକୁ ଶବର ଙ୍କ ନାମ ଉଲ୍ଲେଖ କରାଯାଇଛି । ଦେଶ ସ୍ୱାଧୀନତା ପାଇବା ପରେ ତୁଡୁକୁ ଶବର ଙ୍କୁ ସେ ସମୟରେ ୪୦ ରୁ ୫୦ ଟଙ୍କା ସ୍ୱାଧୀନତା ସଂଗ୍ରାମୀ ଭତ୍ତା ମିଳୁଥିବା ଗ୍ରାମବାସୀ କହିଛନ୍ତି । ତାଙ୍କ ମୃତ୍ୟୁ ପରେ ତାଙ୍କ ପତ୍ନୀ ମାଙ୍ଗି ଶବର ଙ୍କୁ ଏହି ଭତ୍ତା ଟଙ୍କା ମିଳିବା କଥା । ହେଲେ ଆଜି ପର୍ଯ୍ୟନ୍ତ ସ୍ୱାଧୀନତା ସଂଗ୍ରାମୀ ଭତ୍ତା ତାଙ୍କୁ ମିଳି ନାହିଁ । ବର୍ତ୍ତମାନ ସେ ତାଙ୍କର ଭଙ୍ଗା ଦଦରା ଘରେ ଏକୁଟିଆ ପଡ଼ି ରହିଛନ୍ତି । ମଝିରେ ମଝିରେ ସ୍ୱାମୀଙ୍କ କର୍ମ ସ୍ଥଳୀ ବାଇରୁ ଗମାଙ୍ଗ ଙ୍କ ଆଶ୍ରମ କୁ ଆସି ସ୍ମୃତିପୀଠ ନିକଟରେ ଅତୀତର ଗୌରବମୟ ଗାଥା କୁ ମନେପକାଇ ପୁଣି ଘରକୁ ଫେରି ଯାଆନ୍ତି । ବର୍ତ୍ତମାନ ଆମ ଦେଶ ସ୍ବାଧୀନତାର ଅମୃତ ମହୋତ୍ସବ ପାଳନ କରୁଥିବା ବେଳେ ମାଙ୍ଗି ଶବରଙ୍କ ପ୍ରତି ଅବହେଳା ପ୍ରଶାସନିକ ଉଦାସୀନତା କୁ ସ୍ପଷ୍ଟ ପ୍ରମାଣିତ କରିଛି । ଏନେଇ ରମାନଗୁଡା ବ୍ଲକ୍ ଅଧ୍ୟକ୍ଷ ରବିଶଙ୍କର ଗମାଙ୍ଗ ଙ୍କୁ ଅବଗତ କରାଇବାରୁ ଏମିତି ଅନେକ ସ୍ୱାଧୀନତା ସଂଗ୍ରାମୀ ଙ୍କ ନାମ ଲୋକଲୋଚନକୁ ଆସିପାରି ନାହିଁ ଏନେଇ ଜିଲ୍ଲା ପ୍ରଶାସନ ସହ ଆଲୋଚନା କରି ମାଙ୍ଗି ଶବର କିଭଳି ସ୍ୱାଧୀନତା ସଂଗ୍ରାମୀ ଭତ୍ତା ପାଇପାରିବେ ବ୍ୟବସ୍ଥା ଗ୍ରହଣ କରିବି ବୋଲି କହିଛନ୍ତି । ତେବେ ଦେଖାଯାଉ କେବେ ତାଙ୍କୁ ଏହି ଭତ୍ତା ଟଙ୍କା ମିଳୁଛି ।
