ଓଡ଼ିଶାର ଅଚ୍ଛେଦିନ୍‌ ଆସିଗଲା କହିଲେ ଗୃହମନ୍ତ୍ରୀ ଅମିତ ଶାହ…!

ଏଥର ସମ୍ଭାଳ ବ୍ୟୁରୋ(କଟକ)- ଓଡ଼ିଶାର ଅଚ୍ଛେଦିନ ଆସିଗଲା। ଓଡ଼ିଶାର ଜଣେ ଗରିବ ଆଦିବାସୀ ପରିବାରରେ ଜନ୍ମ ନେଇଥିବା ଦ୍ରୌପଦୀ ମୁର୍ମୁ ଆଜି ମହାମହିମ ରାଷ୍ଟ୍ରପତି। କେନ୍ଦ୍ର ଶିକ୍ଷା ମନ୍ତ୍ରୀ ଧର୍ମେନ୍ଦ୍ର ପ୍ରଧାନ, ଆରବିଆଇ ଗଭର୍ଣ୍ଣର ଓଡ଼ିଶାର ଶକ୍ତିକାନ୍ତ ଦାସ, ରେଳ ମନ୍ତ୍ରୀ ଅଶ୍ୱିନୀ ବୈଷ୍ଣବ ଓ କେନ୍ଦ୍ର ଆଦିବାସୀ ମନ୍ତ୍ରୀ ବିଶ୍ୱେଶ୍ୱର ଟୁଡ଼ୁ, ଏ ସମସ୍ତେ ଓଡ଼ିଆ। ଆଜି ପର୍ଯ୍ୟନ୍ତ ଇତିହାସରେ ଏପରି କେବେ ବି ଏତେ ସଂଖ୍ୟକ ଓଡ଼ିଆ କେନ୍ଦ୍ରରେ ପ୍ରତିନିଧିତ୍ୱ କରିନାହାନ୍ତି। ପ୍ରଜାତନ୍ତ୍ର ପ୍ରତିଷ୍ଠା ଉତ୍ସବରେ ମୁଖ୍ୟ ଅତିଥି ଭାବେ ଯୋଗ ଦେଇଥିବା କେନ୍ଦ୍ର ଗୃହମନ୍ତ୍ରୀ ଅମିତ ଶାହ ଏହା କହିଛନ୍ତି।ଜୟ ଜଗନ୍ନାଥ କହି ଶ୍ରୀ ଶାହ ଭାଷଣ ଆରମ୍ଭ କରିଥିଲେ। ସେ କହିଥିଲେ ଯେ ସେ ଯେବେ ବି ଓଡ଼ିଶା ଆସନ୍ତି ପ୍ରଥମେ ମହାପ୍ରଭୁଙ୍କୁ ପ୍ରଣାମ କରିଥାନ୍ତି। ଆଜି ସମସ୍ତ ଓଡ଼ିଶାବାସୀଙ୍କୁ ଅଭିନନ୍ଦନ ଜଣାଉଛନ୍ତି। ଦିନ ଥିଲା ସମ୍ବିଧାନ ସଭାରେ କେହିବି ଜନଜାତି ପ୍ରତିନିଧି ନ ଥିଲେ। ହେଲେ ସମୟ ବଦଳିଛି। ଏବେ ଓଡ଼ିଶା ମାଟିରେ ଜନ୍ମିତ ଦ୍ରୌପଦୀ ମୁର୍ମୁ ଆଜି ମହାମହିମ ରାଷ୍ଟ୍ରପତି ହୋଇଛନ୍ତି। ସାରା ଦେଶର ଆଦିବାସୀ ଓ ଗରିବଙ୍କ ପାଇଁ ଏହା ଗୌରବର କଥା। ଓଡ଼ିଶାର ଅଚ୍ଛେଦିନ୍ ଆସି ଯାଇଛି। ଅନେକ ଓଡ଼ିଆଙ୍କୁ କେନ୍ଦ୍ରରେ ପ୍ରତିନିଧିତ୍ୱ ସୁଯୋଗ ମିଳିଛି। ଓଡ଼ିଶା ଭିତରେ ବିକାଶର ଅପାର ସମ୍ଭାବନା ରହିଛି। ବିସ୍ତୀର୍ଣ୍ଣ ସମୁଦ୍ର ଓ ବେଳାଭୂମି ସାଙ୍ଗକୁ ବ୍ୟପାର ସୁଯୋଗ ଏବଂ ପୂରା ଓଡ଼ିଶାର ଭୂ-ଭାଗ ଖଣିଜ ସଂପଦରେ ଭରପୂର ରହିଛି। ତେଣୁ ଓଡ଼ିଶାର ଉଜ୍ଜ୍ୱଳ ଭବିଷ୍ୟତ ସେ ଦେଖିପାରୁଛନ୍ତି। ପ୍ରଜାତନ୍ତ୍ର ପ୍ରତିଷ୍ଠାତା ଉତ୍କଳ କେଶରୀ ହରେକୃଷ୍ଣ ମହତାବଙ୍କୁ ଶ୍ରଦ୍ଧାଞ୍ଜଳି ଦେଇ କହିଛନ୍ତି, ସେ କେବଳ ଜଣେ ସ୍ୱାଧୀନତା ସଂଗ୍ରାମୀ ନ ଥିଲେ। ଦେଶ ସ୍ୱାଧୀନତା ହାସଲ ପରେ ମୁମ୍ବାଇର ଗଭର୍ଣ୍ଣର ହୋଇ ମୁଣ୍ଡ ଟେକିଥିବା ଗଣଆନ୍ଦୋଳନ ସମସ୍ୟାର ସମାଧାନ କରିଥିଲେ। ଓଡ଼ିଶାର ମୁଖ୍ୟମନ୍ତ୍ରୀ ହୋଇ ବିକାଶର କାମ ଓ ପ୍ରଜାତନ୍ତ୍ରର ମୁଖ୍ୟ ଭାବେ ସ୍ୱତନ୍ତ୍ର ପ୍ରହରୀ ଭାବେ କାମ କରିଥିଲେ। ତାଙ୍କ ପରେ ତାଙ୍କ ପୁଅ ତଥା ବରିଷ୍ଠ ସାଂସଦ ଭର୍ତ୍ତୃହରି ମହତାବ ଏହି ରାସ୍ତାରେ ପାଦରଖି ଆଗେଇ ଚାଲିଛନ୍ତି। ଦେଶ ଅମୃତ ଉତ୍ସବ ପାଳନ କରୁଥିବା ବେଳେ ପ୍ରଜାତନ୍ତ୍ର ପ୍ରତିଷ୍ଠା ଉତ୍ସବ ୭୫ ବର୍ଷ ପୂର୍ତ୍ତି ପାଳନ ଏକ ଉତ୍ତମ ସଂଯୋଗ। ୧୯୪୭ରେ ସର୍ଦ୍ଦାର ପଟେଲ ସମସ୍ତଙ୍କୁ ଭାରତୀୟ ସଂଘରେ ଯୋଡ଼ିବାର ଦାୟିତ୍ୱ ହରେକୃଷ୍ଣ ମହତାବଙ୍କୁ ଦେଇଥିଲେ। ସେବେଠାରୁ ସେ ହୀରାକୁଦ ନଦୀ ବନ୍ଧ ନିର୍ମାଣ, କେନ୍ଦ୍ର ମନ୍ତ୍ରୀର ଭୂମିକା ଓ ଓଡ଼ିଶାର କୃଷି ଓ ସଂସ୍କୃତିର ବିକାଶରେ ଯୋଗଦାନ ଦେଇଥିଲେ। ସଂସ୍କୃତିର ବିକାଶ ବିନା ବିକାଶ ଅଧୁରା। ଓଡ଼ିଶାର ସଂସ୍କୃତି ଖୁବ୍ ବଡ଼। ଭାଷା, ଗୀତ, ନାଟ୍ୟକଳା ଓ ସାହିତ୍ୟ ଏଠାର ଉତ୍କୃଷ୍ଟ। ହିନ୍ଦିକୁ ରାଜଭାଷାର ପରିଚୟ ଦେବା ନିମନ୍ତେ ସେ ଖୁବ୍ ପରିଶ୍ରମ କରିଥିଲେ। ତାଙ୍କ ଦ୍ୱାରା ପ୍ରତିଷ୍ଠିତ ପ୍ରଜାତନ୍ତ୍ରରୁ ସହସ୍ରାଧିକ କଲମକାର ସୃଷ୍ଟି ହୋଇଛନ୍ତି। କିଏ ସାହିତ୍ୟକାର ହୋଇଛି ତ କିଏ ପତ୍ରକାର ହୋଇଛି ବୋଲି ଗୃହମନ୍ତ୍ରୀ ଶ୍ରୀ ଶାହ କହିଥିଲେ।