ଏଥର ସମ୍ଭାଳ ବ୍ୟୁରୋ(ଭୁବନେଶ୍ଵର)- ଓଡ଼ିଶା ହାଇକୋର୍ଟର ସ୍ଥାୟୀ ବେଂଚ ସ୍ଥାପନ ପ୍ରସଙ୍ଗ ଆଜି ଏକ ନୂଆ ମୋଡ଼ ନେଇଛି । ସ୍ଥାୟୀ ବେଂଚ ସ୍ଥାପନ ପାଇଁ ହାଇକୋର୍ଟଙ୍କ ସହ ବିଚାରବିମର୍ଶ କରି ବିଧିବଦ୍ଧ ଭାବେ ପ୍ରସ୍ତାବ ପଠାଇବାକୁ କେନ୍ଦ୍ର ଆଇନ ମନ୍ତ୍ରୀ କିରନ ରିଜ୍ଜୁ ଗତ ମେ’ ମାସରେ ଚିଠି ଲେଖି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କୁ ଅନୁରୋଧ କରିଥିବା ବେଳେ ଆଜି ଆଇନ ମନ୍ତ୍ରୀ ଜଗନ୍ନାଥ ସାରକା ବିଧାନସଭାରେ ରାଜ୍ୟ ସରକାରଙ୍କ ଆଭିମୁଖ୍ୟ ସ୍ପଷ୍ଟ କରିଛନ୍ତି। ଏ ସମ୍ପର୍କରେ ନିଷ୍ପତ୍ତି ଗତ ଅଧିକାର କେନ୍ଦ୍ର ସରକାର ଓ ହାଇକୋର୍ଟଙ୍କ ପରିସରଭୁକ୍ତ ବୋଲି କହି ପରୋକ୍ଷରେ ହାଇକୋର୍ଟ ସ୍ଥାୟୀ ବେଂଚ ପ୍ରସଙ୍ଗରେ ଓଡ଼ିଶା ସରକାରଙ୍କ କିଛି ଭୂମିକା ନାହିଁ ବୋଲି ଦର୍ଶାଇବାକୁ ଚାହିଁଛନ୍ତି । ବିଧାୟକ ପ୍ରଦୀପ ପାଣିଗ୍ରାହୀ ଓ ଗଣେଶରାମ ସିଂ ଖୁଣ୍ଟିଆଙ୍କ ଏ ସଂକ୍ରାନ୍ତ ଦୁଇଟି ଭିନ୍ନ ପ୍ରଶ୍ନର ଲିଖିତ ଉତ୍ତରରେ ଆଇନ ମନ୍ତ୍ରୀ ଶ୍ରୀ ସାରକା କହିଛନ୍ତି ଯେ, କେଉଁ ହାଇକୋର୍ଟଙ୍କ ସ୍ଥାୟୀ ବେଂଚ ସ୍ଥାପନ ହେବ ତାହା ଭାରତ ସରକାର ଓ ହାଇକୋର୍ଟଙ୍କ ଅଧିକାର ପରିସରଭୁକ୍ତ । ହାଇକୋର୍ଟ ବେଂଚ ସ୍ଥାପନ କରିବା ପାଇଁ ରାଜ୍ୟ ସରକାର ରାଜ୍ୟର ବିଭିନ୍ନ ଅଂଚଳରୁ ଦାବିପତ୍ର ମାନ ପାଇଛନ୍ତି । ରାଜ୍ୟର କୌଣସି ସ୍ଥାନରେ ବା ଅଂଚଳରେ ସ୍ଥାୟୀ ବେଂଚ ଖୋଲିବା କେନ୍ଦ୍ର ସରକାର ଓ ଓଡ଼ିଶା ହାଇକୋର୍ଟଙ୍କ ନିଷ୍ପତ୍ତିଗତ ଅଧିକାର ପରିସରଭୁକ୍ତ ବୋଲି ମନ୍ତ୍ରୀ ଶ୍ରୀ ସାରକା କହିଛନ୍ତି । ଯଦିଓ ବିଧାୟକ ଶ୍ରୀ ପାଣିଗ୍ରାହୀ ସିଧାସଳଖ ବ୍ରହ୍ମପୁରରେ ସ୍ଥାୟୀ ବେଂଚ ସ୍ଥାପନ ଦିଗରେ କାହିଁକି ବିଳମ୍ବ ହେଉଛି ଓ ସରକାର କ’ଣ ପଦକ୍ଷେପ ନେଇଛନ୍ତି ତାହା ଜାଣିବାକୁ ଚାହିଁଥିବାବେଳେ ବିଧାୟକ ଶ୍ରୀ ଖୁଣ୍ଟିଆ ଲୋକଙ୍କ ସୁବିଧା ଦୃଷ୍ଟିରୁ କେଉଁ ସ୍ଥାନରେ ବେଂଚ ସ୍ଥାପନ କରିବାକୁ ରାଜ୍ୟ ସରକାର ଚିନ୍ତା କରୁଛନ୍ତି ବୋଲି ଜାଣିବାକୁ ଚାହିଁଥିଲେ । ସୂଚନାଯୋଗ୍ୟ, ରାଜ୍ୟର ବିଭିନ୍ନ ଭାଗରେ ହାଇକୋର୍ଟ ସ୍ଥାୟୀ ବେଂଚ ସ୍ଥାପନ ନିମନ୍ତେ ଦାବି ହେଉଥିବାବେଳେ ବିଜେଡି ସରକାର ଏପର୍ଯ୍ୟନ୍ତ ଏହି ପ୍ରସଙ୍ଗକୁ ଝୁଲାଇ ରଖିଛି । ସ୍ଥାୟୀ ବେଂଚ ପ୍ରସଙ୍ଗରେ ଓଡ଼ିଶା ହାଇକୋର୍ଟଙ୍କ ସହ ବିଚାରବିମର୍ଶ କରି ରାଜ୍ୟପାଳଙ୍କ ସୁପାରିଶ ଆଧାରରେ ଏକ ବିଧିବଦ୍ଧ ପ୍ରସ୍ତାବ ପଠାଇବାକୁ କେନ୍ଦ୍ର ସରକାର ବାରମ୍ବାର ଗତ ଦୁଇ ଦଶନ୍ଧି ଧରି ରାଜ୍ୟ ସରକାରଙ୍କୁ ଅନୁରୋଧ କରୁଥିଲେ ମଧ୍ୟ ଶାସକ ବିଜେଡି ନିଜର ରାଜନୀତିକ ସ୍ୱାର୍ଥକୁ ଦୃଷ୍ଟିରେ ରଖି ଏହି ପ୍ରସଙ୍ଗକୁ ବିବାଦୀୟ କରି ରଖିଥିବା ଅଭିଯୋଗ ହେଉଛି ।
