!!! ଗଞ୍ଜାମ ରୁ ଜିଲ୍ଲା ସ୍ଵତନ୍ତ୍ର ପ୍ରତିନିଧି ନାରାୟଣ ପରିଡ଼ା ଙ୍କ ରିପୋର୍ଟ !!!
ଏଥର ସମ୍ଭାଳ (ପୋଲସରା)- ସରକାରଙ୍କ ବିଭିନ୍ନ ଯୋଜନା ଓ ବିଭାଗୀୟ ଅଧିକାରୀ ଙ୍କ ଧୂଆଁ ବାଣରେ ବର୍ଷ ବର୍ଷ ଧରି କଷ୍ଟ ଯନ୍ତ୍ରଣା ଭୋଗୁଛନ୍ତି ନିରୀହ ଗ୍ରାମବାସୀ । ଏଭିଳି ଅବହେଳିତର ବାସ୍ତବ ଚିତ୍ର ଦେଖିବାକୁ ମିଳିଛି ପୋଲସରା ବ୍ଲକ ଅନ୍ତର୍ଗତ ବଡ଼ପଙ୍କଳବାଡି ପଞ୍ଚାୟତର ଚଣ୍ଡିରାମଚନ୍ଦ୍ରପୁର ଗ୍ରାମରେ । ଯେଉଁଠି ଗ୍ରାମ୍ୟ ଉନ୍ନୟନ ବିଭାଗର ଚରମ ଅବହେଳା ଯୋଗୁଁ ଚଣ୍ଡିରାମଚନ୍ଦ୍ରପୁର ଗ୍ରାମବାସୀ ଦିର୍ଘ ବର୍ଷ ଧରି ବାଘୁଆ ନଦୀ ଉପରେ ବାଉଁଶ ପୋଲ ନିର୍ମାଣ କରି ବିପଦ ସଂଙ୍କୁଳ ଅବସ୍ଥାରେ ଯିବା ଆସିବା କରୁଛନ୍ତି । ହେଲେ ଗ୍ରାମ୍ୟ ଉନ୍ନୟନ କେବଳ ସମୀକ୍ଷା ଆଉ ଅଟକଳ ମୂଲ୍ୟର ଧୁଆଁ ବାଣରେ ନିର୍ମାଣ ଧିନ ପୋଲ ଆଜି ନାଲି ଫିତା ତଳେ ଚାପି ହୋଇ ରହିଯାଇଛି । ଯାହାକୁ ନେଇ ଚଣ୍ଡିରାମଚନ୍ଦ୍ରପୁର ଗ୍ରାମବାସୀ ସମସ୍ୟା ର ବିକଳ୍ପ କୁ ନେଇ ବାଘୁଆ ନଦୀ ଉପରେ ବାଉଁଶ ପୋଲ ନିର୍ମାଣ କରୁଛନ୍ତି । ଜୀବନ ଜୀବିକା କୁ ନେଇ ପୁରା ପଞ୍ଚାୟତ ଏହି ବାଘୁଆ ନଦୀର ବାଉଁଶ ପୋଲ ଉପରେ ଭରସା କରି ଚାଲିଛନ୍ତି । ଗୋଟିଏ ପଟରେ ଗଞ୍ଜାମ ଜିଲ୍ଲା ପୋଲସରା ବ୍ଲକ୍ ଅନ୍ତର୍ଗତ ବଡ-ପଙ୍କଳବାଡି ପଞ୍ଚାୟତର ଚଣ୍ଡୀ ରାମଚନ୍ଦ୍ରପୁର ଗ୍ରାମ ଆର ପଟରେ ସ୍କୁଲ, ମନ୍ଦିର, ଶହ ଶହ ଏକର ଚାଷ ଜମି ଓ ପୋଲସରା ସହରକୁ ସଂଯୋଗ କରୁଥିବା ରାସ୍ତା, ଆଉ ମଝିରେ ବାଘୁଆ ନଦୀ । ମାତ୍ର ଶହେ ମିଟର ନଦୀ ପାର ହେଲେ ପୋଲସରାକୁ ରାସ୍ତା । ଅନ୍ୟ ପଟରେ ବଡ ପଙ୍କଳବାଡି ଗାଁ ଦେଇ ବୁଲିକି ଗଲେ ୪ରୁ୫ କି.ମି. ଅଧିକା ରାସ୍ତା ଯିବାକୁ ପଡେ । ବର୍ଷା ଚାରି ମାସ ଛାଡ଼ିଲେ ବାକି ସମୟ ଏହି ବାଉଁଶ ପୋଲରେ କାମ ଚଲେଇଦିଅନ୍ତି ଗ୍ରାମବାସୀ । ଏହି ବାଉଁଶ ପୋଲ ଦେଇ ସ୍କୁଲ କଲେଜ ପିଲା ଓ ଗାଁର ପିଲାରୁ ବୟସ୍କ ଲୋକ ସମସ୍ତେ ପାଦଚଲା ରାସ୍ତା ରୂପେ ବ୍ୟବହାର କରନ୍ତି । ବାଘୁଆ ଘାଇ ହେବା ପରେ ୨୦୧୧ ପରଠାରୁ ବାଘୁଆ ନଦୀରେ ଜଳସ୍ତର ମଧ୍ୟ ବୃଦ୍ଧି ପାଇଛି । ତେଣୁ ଅସ୍ଥାୟୀ ବାଉଁଶ ପୋଲ ନିର୍ମାଣ କରି ବର୍ଷ ତମାମ ବିପଦ ସଂଙ୍କୁଳ ଅବସ୍ଥାରେ ଯିବା ଆସିବା କରୁଛନ୍ତି । ଏପଟ ଗ୍ରାମବାସୀ ଆତଙ୍କିତ ଅବସ୍ଥାରେ ବାଉଁଶ ପୋଲ ଦେଇ ଯିବା ଆସିବା କରନ୍ତି । ଏନେଇ ସ୍ଥାନୀୟ ଲୋକପ୍ରତିନିଧି , ପ୍ରଶାସନ,ଓ ବିଧାୟକଙ୍କ ଦୃଷ୍ଟି ଆକର୍ଷଣ କରିଛନ୍ତି । ଏହାପରେ ଗ୍ରାମ୍ୟ ଉନ୍ନୟନ ବିଭାଗର ଯନ୍ତ୍ରୀ ଓ ଅଧିକାରୀ ମାନେ ଆସି ବଘୁଆ ନଦୀ ଉପରେ ଏକ ବ୍ରିଜ୍ ନିର୍ମାଣ ପାଇଁ ୬ କୋଟି ୫୦ ଲକ୍ଷ ଟଙ୍କାର ବ୍ୟୟ ଅଟକଳ ମଧ୍ୟ କରିଥିବା ନେଇ ଗ୍ରାମବାସୀଙ୍କୁ ଅବଗତ କରାଯାଇଛି । କିନ୍ତୁ ତାହା ଗ୍ରାମ୍ୟ ଉନ୍ନୟନ ବିଭାଗର ନାଲି ଫିତା ତଳେ ଫାଇଲ୍ ଟି ଚାପି ହୋଇ ରହିଯାଇଛି । ଏନେଇ ପୋଲସରା ଗ୍ରାମ୍ୟ ଉନ୍ନୟନ ବିଭାଗର ଅଧିକାରୀ ମାନଙ୍କ ସହ ଯୋଗାଯୋଗ କରାଯାଇଥିବା ବେଳେ ତାହା ସମ୍ଭବ ହୋଇପାରି ନାହିଁ । କାରଣ ଗ୍ରାମ୍ୟ ଉନ୍ନୟନ ବିଭାଗର କାର୍ଯ୍ୟାଳୟରେ ପ୍ରାୟତଃ ଅଧିକାରୀ ମାନଙ୍କର ଦେଖା ଦର୍ଶନ ନଥିବା ବେଳେ କାର୍ଯ୍ୟାଳୟର ଏକମାତ୍ର ପିଅନ ହିଁ ଅଫିସ୍ ଭାର ସମ୍ଭାଳୁ ଥିବା ଚର୍ଚ୍ଚା ହୋଇଛି । ବାସ୍ତବରେ ଏହି ପୋଲ ନିର୍ମାଣ ପାଇଁ ଗ୍ରାମ୍ୟ ଉନ୍ନୟନ ବିଭାଗ ପକ୍ଷରୁ ଅଟକଳ ହୋଇଛି ନା କେବଳ ସରକାରଙ୍କ ପ୍ରସ୍ତାବିତ ଧୂଆଁ ବାଣରେ ଆଗତ କରି ଗ୍ରାମବାସୀ ମାନଙ୍କୁ ଭୂଆଁ ବୁଲାଯାଉନି ତାହା ଏବେ ଚର୍ଚ୍ଚାର ବିଷୟ ପାଲଟିଛି ।
