!!! ପ୍ରତିନିଧି ନିରଞ୍ଜନ ତ୍ରିପାଠୀ !!!
ଅରନଦାତା, ମାଟିର ପୁଓ ଆଉ ଚାଷୀ ଏନ୍ତା ତାର କେତେନି ଟେ ନାଁ l ଲୋକ କହେସନ ଚଷା ଲକ୍ଷେ ଜୀବ ପୁଷା l ଦୁନିଆ ଯାକର ଲୋକର ମୁହେଁ ଅରନ ଟିକେ ପରଷି ଦେଇ ପାରସି ବଲି ତାର ନାଁ ଅରନ ଦାତା l ମାଏଟ୍ ସଂଗେ ମାଏଟ୍ ହେଇକରି ଚାଷ୍ କରି ଧାନ୍ ଚଉଳ୍ ତୁନଶାଗ୍, ମୁଗ୍ ବିରି,କୁଲୁଥ୍ ଫଲେଇ ପାରସି ବଲି ନାଁ ପାଇଛେ ଚାଷୀ l ଏସୁର ସାଲେ କେତେ ଆଶ ରଖିକରି ଚଷା ପୁଓ ଚାଷ କରିଥିଲା ବନେ କରି ଫସଲ ହେଲେ ତାର ଦୁଃଖ ଯାଇଥିଥା ଦୂର୍ ହେବା, ହେଲେ ଇନ୍ଦର୍ ରଜା କେ ଇ ବୁପରା ଦୁଃଖ ନାଇଁ ଦିଶଲା l କାଏଁ କରି ଦିଶବା ହେଲେ ଇ ବୁପରା କେ କିଏ ସହେସି ଯେ ଇନ୍ଦର୍ ରଜା ହେଲେ ସହେତା l ଅଷାଡ଼ ଗଲା ଶରାବନ ଗଲା, ଭୂଦୋ ବି ଗଲା ଆକାଶେ ମେଘ ର୍ ଦେଖା ନାଇଁ ଖର୍ଡ଼ି ଫସଲ କେ ମରଡି ଅସୁର୍ ଗିଲି ଦେଲା l ଯେନ ସମିଁଆ କେ ଚାଷୀ ର ଖେତେ ସୁନାର ଫସଲ ଲହଡି ମାରୁଥିତା ସେ ସମିଁଆ ଥି ଚାଷୀ ର ମୁହେଁ ପାଏନ ନାଇଁନ l ଖେତେ ଫସଲ ପୁଡିଯଉଛେ l ମନ କାନ୍ଦୁଛେ, ହୁରୁଦ କାନ୍ଦୁଛେ କେନ୍ତା କରବା କାଣା କରବା ଉପେ ନାଇଁ ଦିଶବାର୍ l ପାଠ ପଢ଼ୁଥିବା ପୁଓ ଝି ର ଖର୍ଚ୍ଚା, କୁଟୁମ ର ଲାଗି ପିନ୍ଧନ ଓଢଣ, ରୋଗ ଦୁଃଖ ଖର୍ଚ୍ଚା, ଯୁଆନ୍ ପୁଓ ଝି ର୍ ବିହା ବର୍ ଖର୍ଚ୍ଚା, ଲାଗିଥିବା ଲାଗବାଗ ସୁଝବାର୍ ସବୁ ଚିନ୍ତା ଚାଷୀ ର ମୁଡ଼ କେ ଅଥୟେ କରି ପକଉଛେ l ବୁପରା ରାହା ନାଇଁ ପାଉଛେ l ଇ ଜୀବନ ଥାଇକରି କାଏଁ ଲାଭ ବଲି ଦୁଆଁରସି, ବିଷ ବୁତଲ ଖୁଜି ବସିଲାନ l ସତେ ଯେନ୍ତା ଚାଷୀ ହଇକରି ବଢ଼େ ଟେ ପାପ୍ କରିଛେ l ପାଁଚ୍ ବଛର୍ ଲାଗି ଦୁଃଖ୍ ସୁଖ୍ ବୁଝବା ବଲି ଭୋଟ୍ ଦେଇକରି ଯେନ୍ ମାନଂକୁ ଆସନ୍ ଉପରେ ବସେଇଛେ ସେମାନଙ୍କୁ ବି ପଛ କରିଦେଇଛନ ଆଖି ଥାଇ କରି ବି ଅନ୍ଧା ହେଇ ଯାଇଛନ୍ l ନିଜର୍ ପ୍ରଚାର୍ ପ୍ରସାର୍ ଲାଗି ଯୁଜନା କରୁଛନ୍ ହେଲେ ଚାଷୀ ବୁପରା ତକ୍ ଆସଲା ବେଲ୍ କେ ଛୁଛାଫସ୍ l ଏକଲା ଲଢ଼ି କରି କେତେ ଲଢ଼ବା ବୁପରା ଚଷା l କିହେ ସାହାପଟ୍ ନାଇଁ ହେବାର୍ l ଚାଷୀ ଆରୁ କାଏଁ କରି ତାର୍ ଛୁଆ କେ ଚଷା କରବା? ବାହାଲ୍ ଜମିନ୍ ଭି ପଡିଆ ପଡିବସଲାନ l ଏନ୍ତା ଦିନ୍ ନାଇଁ ଆସୁ ମାଟିର ପୁଓ ମାଏଟ୍ ନୁ ମୁହୁଁ ନାଇଁ ମୁଡି ଦଉ l ଅରନ୍ ମୁଠେ କର ଲାଗି ପୂରଥୀ ଥି ହାହାକାର୍ ନାଇଁ ହଉ l ନେତା,ସରକାରୀବାବୁ ସତେ ଯଦି ଚାଷୀ ର ଦୁଃଖ ସୁଖ ରେ ସାଙ୍ଗେ ଅଛୁ ବଲି କହୁଛନ୍ ସେମାନେ ପ୍ରକୃତି ରାନୀ କୂଲେ ନଏଦ୍ ମାନଂକୁ ଛୋଟ୍ ଛୋଟ୍ ଆନିକଟ୍ ବନେଇ କରି ସବୁ ଖେତ୍ ମାନଂକୁ କେନାଲ୍ ପାଏନ୍ ପହଁଞ୍ଚେଇ ପାରଲେ ଚାଷୀ ର୍ ଖେତେ ଫସଲ୍ ଲହଡି ମାର୍’ତା lସରକାର୍ ଚାହେଁଲେ ଗୁଟେ ଶାଗୁଆ ବିପ୍ଳବ୍ ହେଇପାରବା l ଚାଷୀ ର୍ ହୁରୁଦ୍ ଭିତରେ ସବୁଦିନ୍ ଲାଗି ଠାଁନ ବନେଇ ପାରତେ l ନି ହେଲେ ଚାଷୀ ବି ଆଏବାର ଦିନେ ଉଚିତ୍ ଜବାବ୍ ଦେଇକରି ଆସନ୍ ନୁ ହଟେଇ ଦେବାର ଟା ବେଶୀ ଦୁରିଆ ନୁଁହେସେ l ସମକେ୍ ଚେତବାର୍ କେ ପଡବା l ମାଟିର୍ ପୁଓ ଚଷା ର୍ ଦୁଃଖ୍ ଶୁନି କରି ତାର୍ ହକ୍ ତାହାକେ ଦେବାର୍ ଲାଗି ଲଢ଼ବାର୍ ପଡବା l ଚଷା କେ କଥାଥି ଖାଲି ଦେଶର୍ ମେରୁଖୁଁଟି ଆଏ ବଲି କହିଦେଲେ ନାଇଁ ଚଲେ l ଉଚିତ୍ ସନମାନ୍ ଦେବାର୍ କେ ପଡିବା l ଜୟ କିସାନ୍ l
