!!! କଳାହାଣ୍ଡି ରୁ ଜିଲ୍ଲା ପ୍ରତିନିଧି ରଜନୀକାନ୍ତ ସମର୍ଲିଆ ଙ୍କ ରିପୋର୍ଟ !!!
ଏଥର ସମ୍ଭାଳ (କଳାହାଣ୍ଡି) – ରାଜ୍ୟରେ କୋରୋନା ମହାମାରୀ ଯୋଗୁଁ ଗ୍ରାମାଞ୍ଚଳରେ ଲୋକେ କାମଧନ୍ଦା ନ ପାଇ ଦୟନୀୟ ଅବସ୍ଥାରେ ଜୀବନ ବିତାଉଛନ୍ତି। ଏଭଳି ସମସ୍ୟାର ମୁକାବିଲା ପାଇଁ ଲୋକଙ୍କୁ ନିଜ ଗାଁ ରେ କାମ ଯୋଗାଇ ଦେବାକୁ ଏମ୍ ଜି ଏନ୍ ଆର୍ ଇ ଜି ଏସ୍ ମାଧ୍ୟମରେ ରୋଜଗାର କରି ଜୀବିକା ନିର୍ବାହ କରିବା ପାଇଁ ପଦକ୍ଷେପ ନେଇଛନ୍ତି। ହେଲେ ଏହି ଯୋଜନାରେ ଗରୀବ ଖଟିଖିଆ ମାନେ କିପରି ଉପକୃତ ହେଉଛନ୍ତି ତାହାର କିନ୍ତୁ ସରକାର କୌଣସି ନିଘା ନେଉ ନ ଥିବାରୁ ସ୍ଥାନୀୟ ଅଧିବାସୀମାନଙ୍କ ମନରେ କ୍ଷୋଭ ଜାତ ହେଉଥିବା ଘଟଣା ଦେଖିବାକୁ ମିଳିଛି। ଖବର ନେବାରୁ ଜଣାପଡିଛି ଯେ, କଳାହାଣ୍ଡି ଜିଲ୍ଲାର ଆଦିବାସୀ ଅଧ୍ୟୁଷିତ ଓ ଅନଗ୍ରସର ଅଞ୍ଚଳ ଭାବେ ପରିଚିତ ଥୁଆମୂଳ ରାମପୁର ବ୍ଲକ ଅନ୍ତର୍ଗତ ମାଳିଗାଁ ପଞ୍ଚାୟତ ରେ ଏଭଳି ଏକ ଘଟଣା ଲୋକଲୋଚନକୁ ଆସିବା ପରେ ଚର୍ଚ୍ଚା ର ବିଷୟ ହୋଇଛି। ଏହି ଯୋଜନାରେ ପ୍ରାୟ ୬ଲକ୍ଷ ଟଙ୍କାର ଦୂର୍ନୀତି ହୋଇଥିବା ଗ୍ରାମବାସୀ ଅଭିଯୋଗ କରିଛନ୍ତି। ମାଳିଗାଁ ପଞ୍ଚାୟତ ଅନ୍ତର୍ଗତ ଭାଲୁଘାଟି ଡଙ୍ଗର ରେ ୧୦ ହେକ୍ଟର ଜମିରେ ଜଳ ସଂରକ୍ଷଣ ନିମନ୍ତେ ଏକ ପ୍ରକଳ୍ପ ହାତକୁ ନିଆ ଯାଇଥିଲା।
ପ୍ରଥମ ପର୍ଯ୍ୟାୟରେ ତା ୨୯ .୧୧.୨୦୨୦ରିଖ ଠାରୁ ତା୧୨.୧୨.୨୦୨୦ ରିଖ ପର୍ଯ୍ୟନ୍ତ ୧୪ ଦିନ ପାଇଁ ୪୦ ଜଣ ଶ୍ରମିକ, ଦ୍ଵିତୀୟ ପର୍ଯ୍ୟାୟରେ ତା ୧୪.୧୨.୨୦୨୦ ରୁ ତା ୨୯.୧୨.୨୦୨୦ରିଖ ଯାଏଁ ୧୬ ଦିନ ପାଇଁ ୭୫ ଜଣ ଶ୍ରମିକ ଓ ତୃତୀୟ ପର୍ଯ୍ୟାୟ ରେ ତା ୦୯. ୦୧.୨୦୨୧ରିଖ ରୁ ତା୨୪.୦୧.୨୦୨୧ରିଖ ଯାଏଁ ୩୪ ଜଣ ଶ୍ରମିକ ନିୟୋଜିତ କରି ସମୁଦାୟ ପ୍ରାୟ ୬ ଲକ୍ଷ ଟଙ୍କା ମଜୁରୀ ବାବଦକୁ ପୈଠ କରାଯାଇଥିବା ଜଣାପଡ଼ିଛି। ଏହି କାର୍ଯ୍ୟରେ ଗାଁ ସାଥି ଭାବେ କାର୍ଯ୍ୟ କରୁଥିବା ଜୟଗଉଡ ଓ କମ୍ୟୁନିଟି ମୋବିଲାଇଜର୍ (ସି ଏମ୍) ତିଳୋତ୍ତମା ଗଉଡ ଉଭୟେ ଚଞ୍ଚକତା କରିଥିବା ଅଭିଯୋଗ କରି ସ୍ଥାନୀୟ ଲୋକେ ଜିଲ୍ଲାପାଳ ଙ୍କ ଦ୍ଵାରସ୍ଥ ହୋଇଛନ୍ତି। ଉଭୟେ ଗାଁ ସାଥି ଓ ସିଏମ୍ ମନଇଛା ପଡୋଶୀ ନବରଙ୍ଗପୁର ଜିଲ୍ଲା ରେ ବାସ କରୁଥିବା ନିଜ ସମ୍ପର୍କୀୟ ଙ୍କ ନାମରେ ଜବ୍ କାର୍ଡ କରି ବ୍ୟାଙ୍କ ରେ ପାସବୁକ୍ ଖୋଲି ଅର୍ଥ ହରିଲୁଟ୍ କରିଥିବା ଗ୍ରାମବାସୀ ଅଭିଯୋଗ କରନ୍ତି। ଏପରିକି ଶ୍ରମିକଙ୍କ ମଧ୍ୟରୁ କିଛି ଲୋକ ମୃତ୍ୟୁବରଣ କରିଥିବା ବେଳେ ସମସ୍ତଙ୍କ ପାସବୁକ୍ ଓ ଏଟିଏମ୍ କାର୍ଡ ରଖି ମନଇଛା ଟଙ୍କା ଉଠାଉଥିବା ଅଭିଯୋଗ କରିଛନ୍ତି। ଏସଂକ୍ରାନ୍ତରେ ସ୍ଥାନୀୟ ବ୍ଳକ ପ୍ରଶାସନ, ପୋଲିସଙ୍କ ଠାରେ ଅଭିଯୋଗ କରିଥିଲେ ମଧ୍ୟ କୌଣସି ପ୍ରକାର କାର୍ଯ୍ୟାନୁଷ୍ଠାନ ଗ୍ରହଣ କରାଯାଉନାହିଁ। ଆହୁରି ମଧ୍ୟ ଆଶ୍ଚର୍ଯ୍ୟର ବିଷୟ ଯେ ସବୁବେଳେ କଥା କଥାରେ ନିଜ କାର୍ଯ୍ୟରେ ସ୍ଵଛ୍ଛତାକୁ ଅଗ୍ରାଧିକାର ଦେଉଥିବା ବ୍ୟାଙ୍କ ମଧ୍ୟ କିପରି ପାସବୁକ୍ ଖୋଲିବା ବେଳେ ଦୃଷ୍ଟି ଦେବାରେ ଅବହେଳା ଓ ବେପରୁଆ କରିଛି ତାହା ମଧ୍ୟ ସନ୍ଦେହ ଘେରରେ। ହେଲେ ଜିଲ୍ଲାରେ ଲକଡାଉନ୍ ଲାଗିରହିଥିବା ଯୋଗୁଁ ଅଭିଯୋଗ କାରୀ ଡାକଯୋଗେ ଅଭିଯୋଗ ପତ୍ର ପଠାଇଥିବା ଜଣାପଡିଛି।
