ସ୍ୱାସ୍ଥ୍ୟସେବା ପାଇଁ ଅକ୍ସିଜେନ୍, ସରକାର ଗଢ଼ିଲେ ରାଜ୍ୟସ୍ତରୀୟ ଟାସ୍କଫୋର୍ସ..!
ଏଥର ସମ୍ଭାଳ ବ୍ୟୁରୋ (ଭୁବନେଶ୍ୱର)- ରାଜ୍ୟରେ କରୋନା ମହାମାରୀ ସଂକ୍ରମିତଙ୍କ ମଧ୍ୟରେ ଅକ୍ସିଜେନ୍ ଆବଶ୍ୟକତାକୁ ଦୃଷ୍ଟିରେ ରଖି ସରକାର ଚିକିତ୍ସା କ୍ଷେତ୍ର ପାଇଁ ଅକ୍ସିଜେନ୍ ଉତ୍ପାଦନ, ଗଚ୍ଛିତ ଓ ଯୋଗାଣକୁ ସୁବ୍ୟବସ୍ଥିତ କରିବା ନିମନ୍ତେ ଆଜି ରାଜ୍ୟସ୍ତରୀୟ ଟାସ୍କଫୋର୍ସ ଗଠନ କରିଛନ୍ତି। ମୁଖ୍ୟମନ୍ତ୍ରୀଙ୍କ ପ୍ରମୁଖ ପରାମର୍ଶଦାତାଙ୍କ ଅଧ୍ୟକ୍ଷତାରେ ଗଠିତ ଏହି ୯ଜଣିଆ ରାଜ୍ୟସ୍ତରୀୟ ଟାସ୍କଫୋର୍ସରେ ଶିଳ୍ପ ବିଭାଗର ପ୍ରମୁଖ ସଚିବ ଓ ପୂର୍ତ୍ତ ବିଭାଗର ସଚିବ, ଓଡ଼ିଶା ମେଡିକାଲ ନିଗମର ପରିଚାଳନା ନିର୍ଦ୍ଦେଶକ, ଶିଳ୍ପ ନିର୍ଦ୍ଦେଶକ, ଡ୍ରଗ୍ସ ନିୟନ୍ତ୍ରକ, ଫିକ୍କି ପ୍ରତିନିଧି ଓ ଉତ୍କଳ ଚାମ୍ବର୍ସ ଅଫ କର୍ମସ(ୟୁସିସିଆଇ)ର ପ୍ରତିନିଧିଙ୍କୁ ସଦସ୍ୟ ଭାବେ ସାମିଲ କରାଯାଇଛି। ଏହି ଟାସ୍କଫୋର୍ସର ସଦସ୍ୟ ଆବାହକ ଭାବେ ଇପିକଲ୍ ପରିଚାଳନା ନିର୍ଦ୍ଦେଶକ କାର୍ଯ୍ୟ ତୁଲାଇବେ। ଏହି ଟାସ୍କଫୋର୍ସ ରାଜ୍ୟରେ ସ୍ୱାସ୍ଥ୍ୟସେବା ପାଇଁ ମେଡିକାଲ ଅକ୍ସିଜେନ୍ ଉପଲବ୍ଧ କରାଇବା ନିମନ୍ତେ ଦୀର୍ଘମିଆଦୀ ପଦକ୍ଷେପ ନେବେ। ଅକ୍ସିଜେନ୍ ଉତ୍ପାଦନ ଓ ଯୋଗାଣ ନିମନ୍ତେ ବିଭିନ୍ନ ଷ୍ଟେକହୋଲଡରମାନଙ୍କ ସହ ସମନ୍ୱୟ ରକ୍ଷା, ଟେକ୍ନୋଲୋଜିର ଉପଯୋଗ, ନିବେଶ ଓ ନିର୍ଦ୍ଧାରିତ ଅବଧି ମଧ୍ୟରେ ଏହା ସାରିବା ଉପରେ ଏହି ଟାସ୍କଫୋର୍ସ ଗୁରୁତ୍ୱ ଦେବ। ଟାସ୍କଫୋର୍ସ ସ୍ୱଳ୍ପ, ମଧ୍ୟମ ଓ ଦୀର୍ଘମିଆଦୀ ପଦକ୍ଷେପ ନେବେ। ରାଜ୍ୟରେ ମେଡିକାଲ ଅକ୍ସିଜେନ୍ ଉତ୍ପାଦନ ବୃଦ୍ଧି ନିମନ୍ତେ ଆବଶ୍ୟକ ପଦକ୍ଷେପ, ମେଡିକାଲ ଅକ୍ସିଜେନ୍ ଗଚ୍ଛିତ ରଖିବା ପାଇଁ ସିଲିଣ୍ଡର ଓ ଟ୍ୟାଙ୍କରର ଉପଲବ୍ଧତା ପାଇଁ ଷ୍ଟେକହୋଲଡରଙ୍କୁ ନିୟୋଜିତ, ରାଜ୍ୟରେ ଅକ୍ସିଜେନ୍ ରିଫିଲିଂ ସାମର୍ଥ୍ୟ ବୃଦ୍ଧି, ଅକ୍ସିଜେନ୍ ପରିବହନ ପାଇଁ ସୁବିଧାଜନକ ଲଜିଷ୍ଟିକ ବ୍ୟବସ୍ଥା, ଅକ୍ସିଜେନ୍ ଉତ୍ପାଦନସ୍ଥଳରୁ ସ୍ୱାସ୍ଥ୍ୟ କେନ୍ଦ୍ରଗୁଡ଼ିକୁ ପାଇପ୍ ଯୋଗେ ଅକ୍ସିଜେନ୍ ଯୋଗାଣ, ରାଜ୍ୟରେ ଅକ୍ସିଜେନର ସୁରକ୍ଷା ପାଇଁ ଦୀର୍ଘମିଆଦୀ ଯୋଜନା ଆଦି ପ୍ରସ୍ତୁତ ଦିଗରେ ଏହି ଟାସ୍କଫୋର୍ସ କାର୍ଯ୍ୟ କରିବ ବୋଲି ଆଜି ପ୍ରକାଶିତ ବିଜ୍ଞପ୍ତିରେ ଦର୍ଶାଯାଇଛି।