!!! ରାୟଗଡ଼ା ଜିଲ୍ଲା ଗୁଣପୁର ରୁ ଉପଖଣ୍ଡ ପ୍ରତିନିଧି ବାସନ୍ତୀ କୁମାରୀ ପାଟ୍ଟଯୋଶୀ ଙ୍କ ରିପୋର୍ଟ !!!
ଏଥର ସମ୍ଭାଳ (ଗୁଣପୁର ) – କରୋନା ଦ୍ଵିତୀୟ ଲହରୀର କରାଳ ରୂପ ସମଗ୍ର ମାନବ ସମାଜକୁ କବଳିତ କରିବାରେ ଲାଗିଛି । ଏପରି ଭୟଙ୍କର ପରିସ୍ଥିତିରେ କିଏ ଅମ୍ଳଜାନ ପାଇଁ ମରୁଛି ତ ଆଉ କିଏ ଚିକିତ୍ସା ଅବହେଳାରୁ । ପ୍ରତିଦିନ କିଛି ନା କିଛି ଶୁଣିବାକୁ ମିଳୁଛି । ଗୁଣପୁର ଉପଖଣ୍ଡ ର ସମସ୍ତ ରୋଗୀ ସଦର ଠାରେ ଅବସ୍ଥିତ ଉପଖଣ୍ଡ ଚିକିତ୍ସାଳୟ ଉପରେ ନିର୍ଭର କରିବାକୁ ପଡୁଛି ।
କିନ୍ତୁ ଏଠାରେ ଆବଶ୍ୟକୀୟ ସୁବିଧା ନଥିବାରୁ ଅଞ୍ଚଳବାସୀ ଗୁଣପୁର ଠାରେ ଏକ ବେସରକାରୀ ସଂସ୍ଥା ଦ୍ୱାରା ପରିଚାଳିତ ସରକାରୀ ସ୍ଵୀକୃତି ପ୍ରାପ୍ତ ସୋମନାଥ ମେମୋରିଆଲ ହସ୍ପିଟାଲ ଉପରେ ନିର୍ଭରଶୀଳ ଅଟନ୍ତି । ଅତ୍ୟାଧୁନିକ ଯନ୍ତ୍ରାଂଶ ,ଡାକ୍ତର ଏବଂ ଅବଶ୍ୟକତା ଠାରୁ ଅଧିକ ପରିମାଣର କର୍ମଚାରୀ ଙ୍କୁ ନେଇ ବିଭିନ୍ନ କ୍ଷେତ୍ରରେ ରୋଗୀଙ୍କୁ ସେବା ଯୋଗାଇ ଦେଉଥିବା ଏହି ଚିକିତ୍ସାଳୟ ଟି କରୋନା ସଂକ୍ରମିତ ରୋଗୀ ସେବା ଯୋଗାଇ ଦେବାରେ ନାଚାର । ଫଳରେ ସମସ୍ତ ରୋଗୀ କେବଳ ସରକାରୀ ଚିକିତ୍ସାଳୟ ଉପରେ ନିର୍ଭରକରିବାକୁ ପଡୁଛି । କିନ୍ତୁ ଏଠାରେ ସେଭଳି କୌଣସି ସୁବିଧା ନଥିବାରୁ ରୋଗୀଙ୍କୁ ଏଠାରୁ ଦୀର୍ଘ ୭୦ କିମି ଦୁରତାରେ ରହିଥିବା ଜେକେପୁର ଚିକିତ୍ସାଳୟ କୁ ରୋଗୀଙ୍କୁ ସ୍ଥାନାନ୍ତରିତ କରାଯାଉଛି । କିଛି ରୋଗୀ ସେଠାରେ ପହଞ୍ଚିବା ପୂର୍ବରୁ କିମ୍ବା ପହଞ୍ଚିବା ପରେ ରୋଗୀଙ୍କ ମୃତ୍ୟୁ ହେଉଥିବା ଖବର ସାଧାରଣରେ ଅତିରଞ୍ଜିତ ହେଉଥିବାରୁ ଭୟରେ ଅନେକ ରୋଗୀ କରୋନା ପରୀକ୍ଷା କରିବା ନିମନ୍ତେ ଯିବାକୁ ପଛଘୁଞ୍ଚା ଦେଉଥିବା ସୂଚନା ମିଳୁଛି । ଏପରିକି ଗୁଣପୁର ଠାରେ ପରୀକ୍ଷଣ କିଟ ଅଭାବରୁ ପରୀକ୍ଷଣ କର୍ମଚାରୀ ଲୋକଙ୍କୁ ସୁବିଧା ଯୋଗାଇ ପାରୁନଥିବା ଦେଖାଦେଇଛି । ବିଜୁ ସ୍ୱାସ୍ଥ୍ୟ କଲ୍ୟାଣ ଯୋଜନା ବୋର୍ଡର ଉପଦେଷ୍ଟା ଭାବେ ଖୋଦ ଏହି ଉପଖଣ୍ଡର ବ୍ୟକ୍ତି ରହିଥିବାବେଳେ ଏଭଳି ସମସ୍ୟା ଦୁର୍ଭାଗ୍ୟ ଜନକ ବୋଲି ମତ ପ୍ରକାଶ ପାଇଛି ।ଏହି ସମସ୍ତ ଅସୁବିଧାକୁ କେନ୍ଦ୍ରକରି ଗୁଣପୁର ଠାରେ ଏକ କୋଭିଡ ହସ୍ପିଟାଲ ର ପ୍ରତିଷ୍ଠା ନିମନ୍ତେ ସାଧାରଣରେ ଦାବୀ ଜୋର ଧରିଛି । ଏନେଇ ସ୍ଥାନୀୟ ବୁଦ୍ଧିଜୀବୀ ମାନେ ରାୟଗଡା ଜିଲ୍ଲାପାଳ ଙ୍କୁ ୱେବମୀନାର ମାଧ୍ୟମରେ ଅନୁରୋଧ କରିବାରୁ ସେ ଏହି ବିଷୟ ସରକାରଙ୍କ ଦୃଷ୍ଟି ଆକର୍ଷଣ କରିବେ ବୋଲି ପ୍ରତିଶୃତି ଦେଇଛନ୍ତି । ଏହାପରେ ସ୍ଥାନୀୟ ଜନସାଧାରଣ ପୋଷ୍ଟକାର୍ଡ ମାଧ୍ୟମରେ ମୁଖ୍ୟମନ୍ତ୍ରୀ ଙ୍କୁ ଅନୁରୋଧ କରିବେ ବୋଲି ଅଣ୍ଟା ଭଡିଛନ୍ତି ।
ଏହି ସମସ୍ତ ଯୋଜନା ର କାର୍ଯ୍ୟକାରୀ ହେବା ମଧ୍ୟରେ ଅନେକ ବ୍ୟକ୍ତି ମୃତ୍ୟୁ ମୁଖକୁ ଠେଲି ହୋଇଯାଇଥିବେ ବୋଲି ସାଧାରଣରେ ମତପ୍ରକାଶ ପାଉଛି ।ଏହା କାର୍ଯ୍ୟକ୍ଷମ ହେବା ପୂର୍ବରୁ ଏହି ଅସୁବିଧାକୁ ନଜରରେ ରଖି ଜନସାଧାରଣ ଗୁଣପୁର ଠାରେ ଅତ୍ୟାଧୁନିକ ଯନ୍ତ୍ରାଂଶ ଓ ଅକ୍ସିଜେନ ର ସୁଵିଧାଥାଇ ରୋଗୀଙ୍କୁ ସେବା ଯୋଗାଇ ଦେଉଥିବା ସୋମନାଥ ମେମୋରିଆଲ ହସ୍ପିଟାଲକୁ କୋଭିଡ ହସ୍ପିଟାଲର ମାନ୍ୟତା ଦେଇ କୋଭିଡ ରୋଗୀସେବା ,କୋଭିଡ ଟେଷ୍ଟ ଓ କୋଭିଡ ଟୀକା ପ୍ରଦାନ କରିବା ସୁଯୋଗ ଦେଲେ ଗୁଣପୁର ଉପଖଣ୍ଡର ବିଭିନ୍ନ ବ୍ଲକରୁ ଆସୁଥିବା ରୋଗୀ ଉପକୃତ ହୋଇପାରିବେ ବୋଲି ମତପ୍ରକାଶ ପାଇ ସାଧାରଣରେ ଦାବୀ ହେଉଛି । ଏଥି ପ୍ରତି ରାଜ୍ୟ ସ୍ୱାସ୍ଥ୍ୟ ବିଭାଗ ନଜର ଦେବା ଆବଶ୍ୟକ ହୋଇପଡିଛି ।
