!!! କେନ୍ଦୁଝର ଜିଲ୍ଲା ଯୋଡ଼ା ରୁ ରବିନ୍ଦ୍ର ଖମଣିଆ ଙ୍କ ରିପୋର୍ଟ !!!
ଏଥର ସମ୍ଭାଳ (ଯୋଡ଼ା) – ଯୋଡାଥାନା ଅନ୍ତର୍ଗତ ବିଲେଇପଦା ଫାଣ୍ଡି ଅଧିନସ୍ଥ ସିଆଳିଯୋଡା ଖେଳ ପଡିଆଠାରେ ପୁର୍ବରୁ ଗଚ୍ଛିତଥିବା ଲୁହାପଥର ଗୁଣ୍ଡକୁ କିଛି ମାଫିଆ ଜେସିବି ଲଗାଇ ମଙ୍ଗଳବାର ବିଳମ୍ବିତ ରାତିରେ ଟ୍ରକରେ ବୋଝେଇକରି ପଡୋଶୀ ଝାଡଖଣ୍ଡ ରାଜ୍ୟ ଏବଂ ଅନ୍ୟରାଜ୍ୟକୁ ଚୋରା ଚାଲାଣ କରୁଥିବାବେଳେ ପୁଲିସ ସେଠାରେ ଚଢାଉକରି ଲୁହା ପଥରଗୁଣ୍ଡ ବୋଝେଇ ହୋଇଥିବା ଗୋଟିଏ ୧୦ ଚକିଆ (ଜେଏଚ୍୦୧ଜେଡ୍୩୩୯୪) ଟ୍ରକକୁ ଜବତ କରିବା ସହ ଏହି ଟ୍ରକ ବୋଝେଇରେ ନିୟୋଜିତ ଏକ ଜେସିବି (ଜେଏଚ୍ ୦୫ ବିଏଲ୍ ୫୮୦୦)କୁ ମଧ୍ୟ ଜବତ କରିଥିବା ଜଣାପଡିଛି । ତେବେ ପୁଲିସ ଗାଡି ଦେଖି ମାଫିଆମାନେ ଅନ୍ଧାରର ସୁଯୋଗରେ ସେଠାରୁ ଖସି ପଳାଇଯାଇଛନ୍ତି ।
ସୂଚନା ଥାଉକି ପୁର୍ବରୁ ଦେଓଝର ରେଳ ସାଇଡିଂରୁ ବିଭିନ୍ନ ବନ୍ଦର ମାଧ୍ୟମରେ ବିଦେଶକୁ ଲୁହାପଥର ରପ୍ତାନୀ କରୁଥିବା କିଛି ସଂସ୍ଥା ଦେଓଝର ପଞ୍ଚାୟତର ବିଭିନ୍ନ ସ୍ଥାନ ମାନଙ୍କରେ ଖଣି ଗୁଡିକରୁ ଲୁହାପଥର ଆଣି, ଲକ୍ଷ ଲକ୍ଷ ଟନ୍ ପରିମାଣର ଗଚ୍ଛିତ ରଖି ସେଠାରୁ ରପ୍ତାନୀ ନିମନ୍ତେ ରେଳ ସାଇଡିଂକୁ ପରିବହନ କରୁଥିଲେ । ସେମାନଙ୍କ ରପ୍ତାନୀ ନିମନ୍ତେ ଅନୁମତି ରଦ୍ଦ ହୋଇ ଯିବାଫଳରେ ଗଚ୍ଛିତ ଲୁହାପଥରକୁ ନେଇ ନପାରି ବର୍ଷ ବର୍ଷ ଧରି ସେଠାରେ ପଡିରହିଛି । ଆନ୍ତର୍ଜାତିକ ବଜାରରେ ଲୁହା ପଥର ଚାହିଦା ଅହେତୁକଭାବେ ବୃଦ୍ଧି ପାଇବା ଫଳରେ ଏହାରି ସୁଯୋଗରେ ମାଫିଆମାନେ କ୍ରମାଗତଭାବେ ଉକ୍ତ ସ୍ଥାନରୁ ଜେସିବି ଓ ଟ୍ରକ ଲଗାଇ ହଜାର ହଜାର ଟନ୍ ପରିମାଣର ଲୁହାପଥର ଲୁଟି ନେଇଛନ୍ତି । କୋଟି କୋଟି ଟଙ୍କାର ମୁଲ୍ୟବାନ ଲୁହାପଥର ଲୁଟ୍ ହୋଇଥିଲେ ମଧ୍ୟ ଖଣି ବିଭାଗ କି ପୁଲିସ ବିଭାଗ ଏହାର ଟେର ପାଇପାରିନଥିଲେ । ଏବେ ପୁଲିସର ଚେତା ପଶିଛି । ଏହାର ଦାବିଦାର ନଥିବା ବିପୁଳ ପରିମାଣର ଗଚ୍ଛିତ ଲୁହାପଥରକୁ ଖଣି ବିଭାଗ ନିଜ ଅକ୍ତିଆରକୁ ନନେଇ ଯେମିତି ଚୋରଙ୍କ ପାଇଁ ମୁକୁଳା ଛାଡି ଦେଇଛନ୍ତି ।
