ଏଥର ସମ୍ଭାଳ ବ୍ୟୁରୋ (ଭୁବନେଶ୍ୱର) – କରୋନା ସଂକ୍ରମଣ ବୃଦ୍ଧି ଯୋଗୁଁ କେତେକ ସ୍ଥାନରେ ନାଇଟ୍ କର୍ଫ୍ୟୁ ଲାଗୁ ପରେ FICCI ‘ଫିକି’ର ଉଦବେଗ। ଗତବର୍ଷ କରୋନା ଯୋଗୁଁ ଅର୍ଥନୀତି ବିଗିଡ଼ିଥିବାରୁ ଏଥର ଲକଡାଉନ ଲାଗୁ ହେଲେ ପରିସ୍ଥିତି ଖରାପ ହୋଇଯିବ ବୋଲି ଫିକି ଆଶଙ୍କା କରିଛି। ବର୍ତ୍ତମାନର ଅର୍ଥନୈତିକ ପରିସ୍ଥିତିକୁ ଦେଖି ଲକଡାଉନ ଲାଗୁ ନ କରିବାକୁ ଫିକି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ସହ ଦେଶର ୨୫ ଜଣ ମୁଖ୍ୟମନ୍ତ୍ରୀଙ୍କୁ ଚିଠି ଲେଖି ନିବେଦନ କରିଛି। ଲକଡାଉନ ଲାଗୁ ହେଲେ ଅର୍ଥନୀତି ସଂପୂର୍ଣ୍ଣ ଭୂଶୁଡ଼ି ପଡ଼ିବାର ଆଶଙ୍କା ରହିଛି ବୋଲି ଫିକି କହିଛି । ମୁଖ୍ୟମନ୍ତ୍ରୀମାନଙ୍କୁ ଚିଠି ଲେଖିବା ସହ କୋଭିଡ୍ ପରିଚାଳନା ସଂପର୍କରେ କେତେକ ପରାମର୍ଶ ମଧ୍ୟ ଦେଇଛନ୍ତି ଫିକି ଅଧ୍ୟକ୍ଷ ଉଦୟ ଶଙ୍କର । ଗତବର୍ଷ ଲକଡାଉନ ଲାଗୁ ପରେ ଯେଉଁ କ୍ଷତି ହୋଇଥିଲା, ତାହା ଏବେ ଧିରେ ଧିରେ ସୁଧୁରୁଛି । ଏଣୁ ଏ ପରିସ୍ଥିତିରେ ଆଉଥରେ ସଂପୂର୍ଣ୍ଣ ଲକଡାଉନ ବା ଆଂଶିକ ଲକଡାଉନ ଲାଗୁ କରିବାରୁ ନିବୃତ୍ତ ରହିବା ଉଚିତ ବୋଲି ସେ କହିଛନ୍ତି । ଏହା ବଦଳରେ କୋଭିଡ୍ ଟେଷ୍ଟିଂ, ସଚେତନତା କାର୍ଯ୍ୟକ୍ରମ ବୃଦ୍ଧି କରିବାକୁ ଉଦୟ ଶଙ୍କର ପରାମର୍ଶ ଦେଇଛନ୍ତି । ଏସବୁ କାର୍ଯ୍ୟକ୍ରମରେ ସ୍କୁଲ, କଲେଜ ଓ ଏନ୍ଜିଓରୁ ସ୍ୱେଚ୍ଛାସେବୀଙ୍କୁ ନିୟୋଜିତ କରିବା ଉଚିତ । ତା’ଛଡ଼ା ୧୮ ବର୍ଷରୁ ଅଧିକ ବୟସର ସମସ୍ତଙ୍କୁ ଟିକାକରଣ କରିବା ଲାଗି ମଧ୍ୟ ସେ ପରାମର୍ଶ ଦେଇଛନ୍ତି ।
