ଏଥର ସମ୍ଭାଳ ବ୍ୟୁରୋ (ନୂଆଦିଲ୍ଲୀ) – ଚିହ୍ନଟ ହେଲେ ଲାଲକିଲ୍ଲାରେ ପତାକା ଉଡାଇଥିବା ଯୁବକ। ତାଙ୍କ ନାଁ ଯୁଗରାଜ ସିଂହ। ବୟସ ୨୩ ବର୍ଷ। ଘର ପଞ୍ଜାବର ତରନତାରନ ଜିଲ୍ଲାର ବାନା ତାରା ସିଂହ ଗାଁରେ। ଜାନୁଆରୀ ୨୬ରେ ଚାଷୀଙ୍କ ଟ୍ରାକ୍ଟର ରାଲିରେ ଏହି ଯୁବକ ଜଣକ ଭାଗ ନେଇଥିଲେ। ଲାଲକିଲ୍ଲାରେ ଚଢ଼ି ସେ ହିଁ ପତାକା ଉଡାଇଥିଲେ। ଜାତୀୟ ପତାକା ଉଡାଇବା ସ୍ଥାନର ସେ ଖାଲସା ପତାକା ଉଡାଇଥିଲେ। ଏନେଇ ଦିଲ୍ଲୀ ପୁଲିସ ସୂଚନା ଦେଇଛି।
ପତାକା ଉଡାଇଥିବା ନେଇ ଯୁଗରାଜଙ୍କ ନାଁ ସାମ୍ନାକୁ ଆସିବା ପରେ ପୁଲିସ୍ କାର୍ଯ୍ୟାନୁଷ୍ଠାନ ଭୟରେ ତାଙ୍କ ବାପାମା’ ଗାଁରୁ ଫେରାର ହୋଇଯାଇଛନ୍ତି। ଘରେ କେବଳ ତାଙ୍କ ଜେଜେ ବାପା ଅଛନ୍ତି। ପରିବାର ଲୋକେ ଓ ଗ୍ରାମବାସୀ ଯୁଗରାଜ ଏଭଳି କାଣ୍ଡ ଘଟାଇଥିବା ଖବର ଶୁଣି ଦୁଃଖ ପ୍ରକାଶ କରିଛନ୍ତି। ଯୁଗରାଜ ଯାହା କରିଛି ତାହା ନିଶ୍ଚିତ ରୂପେ ଦୁର୍ଭାଗ୍ୟଜନ ବୋଲି ସେମାନେ କହିଛନ୍ତି। ପୁଲିସର ପଚରାଉଚରା ପରେ ଯୁଗରାଜଙ୍କ ଜେଜେ ବାପା କହିଛନ୍ତି, କେତେବେଳେ କ’ଣ ଘଟିଲା ଆମେ ଜାଣିନୁ। ଯୁଗରାଜ ଜଣେ ଶାନ୍ତଶିଷ୍ଟ ଏବଂ ପରିଶ୍ରମୀ ପିଲା। ଖଲିସ୍ତାନୀଙ୍କ ସହ ତା’ର କୌଣସି ସମ୍ପର୍କ ନାହିଁ। ଟିଭିରେ ଦେଖିବା ପରେ ସେ ପତାକା ଉଡ଼ାଇଥିବା ନେଇ ଜାଣିବାକୁ ପାଇଥିଲୁ। କିନ୍ତୁ ସେ ଯେଉଁ ପକାତା ଉଡାଇଛି ତାହା କୌଣସି ଖଲିସ୍ତାନୀଙ୍କ ନୁହେଁ ବୋଲି ତାଙ୍କ ପରିବାର ଲୋକେ କହିଛନ୍ତି। ସେପଟେ ପୁଲିସ ସମସ୍ତଙ୍କ ବୟାନ ରେକର୍ଡ କରି ତଦନ୍ତ ଜାରି ରଖିଛି।
