ମୁଖ୍ୟମନ୍ତ୍ରୀଙ୍କ ସମ୍ବର୍ଦ୍ଧନା କାର୍ଯ୍ୟକ୍ରମରେ ଧସ୍ତାଧସ୍ତି, ବିବାଦରେ ଯୁବ ବିଜେଡି ସଭାପତି…!

ଏଥର ସମ୍ଭାଳ ବ୍ୟୁରୋ (ଭୁବନେଶ୍ୱର) – ବିଜେଡି ସୁପ୍ରିମୋ ତଥା ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କୁ ସମ୍ବର୍ଦ୍ଧନା ଦେବା ପାଇଁ ଯୁବ ଓ ଛାତ୍ର ବିଜେଡି ପକ୍ଷରୁ ଆୟୋଜିତ ସମ୍ବର୍ଦ୍ଧନା କାର୍ଯ୍ୟକ୍ରମରେ ଆଜି ଧସ୍ତାଧସ୍ତି,ଗାଳିଗୁଲଜ ଓ ହାତାହାତି ହୋଇଥିବା ଜଣାପଡ଼ିଛି। ପରିସ୍ଥିତି ଏପରି ହୋଇଥିଲା ଯେ, ଦଳର ଯୁବ ସଭାପତି ତଥା ବିଧାୟକ ବ୍ୟୋମକେଶ ରାୟଙ୍କୁ ଘଟଣାସ୍ଥଳ ଛାଡ଼ି ଲୁଚି ପଳାଇବାକୁ ପଡ଼ିଥିବା ସୂଚନା ମିଳିଛି। ବିଜେଡି ସୂତ୍ରରୁ ମିଳିଥିବା ସୂଚନା ଅନୁସାରେ, ଏକ ଜାତୀୟ ଗଣମାଧ୍ୟମ ସଂସ୍ଥା ଦ୍ୱାରା ବିଜେଡି ସୁପ୍ରିମୋ ନବୀନ ପଟ୍ଟନାୟକଙ୍କୁ ଦେଶର ଏକନମ୍ବର ମୁଖ୍ୟମନ୍ତ୍ରୀ ଭାବେ ଅଭିହିତ କରାଯିବାପରେ ଆଜି ଅପରାହ୍ନ ୫ଟାରେ ଦଳର ଉଭୟ ଯୁବ ଓ ଛାତ୍ର ୱିଙ୍ଗ ପକ୍ଷରୁ ନବୀନ ନିବାସରେ ସମ୍ବର୍ଦ୍ଧନା ଦେବାର କାର୍ଯ୍ୟକ୍ରମ ରହିଥିଲା। ଦଳର ରାଜ୍ୟ ଅଫିସଠୁ ଏକ ଶୋଭାଯାତ୍ରାରେ ନବୀନ ନିବାସ ଯାଇ ଦଳର ଯୁବ ଓ ଛାତ୍ର ନେତାମାନେ ମୁଖ୍ୟମନ୍ତ୍ରୀଙ୍କୁ ସମ୍ବର୍ଦ୍ଧିତ କରିଥିଲେ। ମାତ୍ର ଏହି ସମ୍ବର୍ଦ୍ଧନା କାର୍ଯ୍ୟକ୍ରମବେଳେ କିଛି ନେତ୍ରୀଙ୍କୁ ଠେଲାପେଲା କରିବା ଘଟଣାକୁ ନେଇ ବିବାଦୀୟ ପରିସ୍ଥିତି ସୃଷ୍ଟି ହୋଇଥିଲା। ଦଳର ଯୁବ ସଭାପତି ବ୍ୟୋମକେଶ ରାୟ ଓ କିଛି ଯୁବନେତାଙ୍କ ମଧ୍ୟରେ ଧସ୍ତାଧସ୍ତି ଓ ଗାଳିଗୁଲଜ ହୋଇଥିଲା। ଏହି ଧସ୍ତାଧସ୍ତିରେ କିଛି ନେତ୍ରୀ ମଧ୍ୟ ଆହତ ହୋଇଥିବା ସୂଚନା ମିଳିଛି । ଶ୍ରୀ ରାୟ ଜଣେ-ଦୁଇଜଣ ଯୁବନେତାଙ୍କ ଉପରକୁ ହାତ ଉଠାଇବା ଘଟଣାକୁ ନେଇ କେତେକ ଯୁବନେତାମାନେ ସମସ୍ତଙ୍କ ଉପସ୍ଥିତିରେ ଅଶ୍ଲୀଳ ଭାଷାରେ ଯୁବ ସଭାପତିଙ୍କୁ ମଧ୍ୟ ଗାଳିଗୁଲଜ କରିଥିବା ଜଣାପଡ଼ିଛି। ଯୁବନେତାମାନେ ଏକଜୁଟ ହୋଇ ଯୁବ ସଭାପତି ଶ୍ରୀ ରାୟଙ୍କୁ ଉଚିତ୍ ଶିକ୍ଷା ଦେବା ପାଇଁ ସଜବାଜ ହେଉଥିବାବେଳେ ସେ ଘଟଣାସ୍ଥଳ ଛାଡ଼ି ପଳାଇଥିବା ଦଳୀୟ ସୂତ୍ରରୁ ସୂଚନା ମିଳିଛି। ସୂଚନାଯୋଗ୍ୟ, ଯୁବ ଓ ଛାତ୍ର ଶାଖାର କର୍ମକର୍ତ୍ତା ନିଯୁକ୍ତିକୁ ନେଇ ତୀବ୍ର ଅସନ୍ତୋଷ ରହିଥିବାବେଳେ ଶ୍ରୀ ରାୟଙ୍କ ମନମୁଖୀ ସାଂଗଠନିକ କାର୍ଯ୍ୟ ଏବଂ ସହକର୍ମୀମାନଙ୍କୁ କଦର୍ଯ୍ୟ ଆଚରଣ ଯୋଗୁ ଏବେ ଯୁବ ୱିଙ୍ଗରେ ବିସ୍ଫୋରକ ପରିସ୍ଥିତି ସୃଷ୍ଟି ହୋଇଛି। ଦଳର ଯୁବ ୱିଙ୍ଗ କାର୍ଯ୍ୟାଳୟ ମଧ୍ୟ କେବଳ ଗୋଟିଏ ଗୋଷ୍ଠୀ କବଜାରେ ରହିଥିବାବେଳେ ସେଠାରେ ଶ୍ରୀ ରାୟଙ୍କ ନେତୃତ୍ୱରେ ବିଭିନ୍ନ ପ୍ରକାରର ଅଣସାଂଗଠନିକ କାର୍ଯ୍ୟ ଚାଲିଛି ବୋଲି ଏହି ଗୋଷ୍ଠୀ ଅଭିଯୋଗ କରିଛି।