ଧମକାଇଲେ ମିଲର! କ୍ୱିଣ୍ଟାଲ୍ ପିଛ ୨ କେଜି ନକାଟିଲେ ଧାନ ନେବୁନି..!
ଏଥର ସମ୍ଭାଳ ବ୍ୟୁରୋ (ଭୁବନେଶ୍ୱର) – ସମବାୟ ମନ୍ତ୍ରୀଙ୍କ ନିର୍ବାଚନମଣ୍ଡଳୀରେ ମିଲରଙ୍କ ମନମାନି। ଧାନ କିଣା ଶୁଭାରମ୍ଭ କରି ଅତିଥି ଗଲା ପରେ ଚାଷୀଙ୍କୁ ନାଲି ଆଖି ଦେଖାଇଲେ ମିଲର୍। ଆଉ କହିଲେ, କ୍ୱିଣ୍ଟାଲ୍ ପିଛା ଦୁଇ କେଜି ନକାଟିଲେ ଧାନ ନେବୁନାହିଁ ବୋଲି ମିଲର ଧମକ ଦେଇଥିବା ଚାଷୀ ଅଭିଯୋଗ କରିଛନ୍ତି। ଏହାକୁ ଆଠଗଡ ବ୍ଲକ୍ ବଡଭୂଇଁ ଧାନ ମଣ୍ଡିରେ ଅସନ୍ତୋଷ ଦେଖା ଦେଇଛି। ପୂରା ଘଟଣାଟି ଏମିତି। ଆଠଗଡ଼ ବ୍ଲକ୍ ବଡ଼ଭୂଇଁରେ ଧାନ ମଣ୍ଡି ଖୋଲିଛି। ଆଜି ସକାଳେ ଏହି ଧାନମଣ୍ଡିରୁ ଧାନ କିଣା ଶୁଭାରମ୍ଭ କରିଥିଲେ କଟକ ଜିଲ୍ଲାର ଜିଲ୍ଲାପରିଷଦ ଉପାଧ୍ୟକ୍ଷ ସୁନିଲ ପରିଡା। ନେତାଙ୍କ ଯିବା ପରେ ଧାନ କଟାକଟିକୁ ନେଇ ମିଲର ଓ ଚାଷୀଙ୍କ ମଧ୍ୟରେ ଆରମ୍ଭ ହେଲା ବିବାଦ।। କ୍ୱିଣ୍ଟାଲ୍ ପିଛା ୨ କେଜି ଧାନ କିଣିବାକୁ ମିଲ୍ର ଜିଦ୍ ଧରି ବସିଥିଲେ। ହେଲେ ଚାଷୀମାନେ ଏଥିରେ ରାଜି ହୋଇନଥିଲେ। ପ୍ରତିବର୍ଷ ପରି ଏଥର କ୍ୱିଣ୍ଟାଲ୍ ପିଛା କେଜିଏ ଧାନ କାଟିବାକୁ କହିଥିଲେ। ହେଲେ ଚାଷୀଙ୍କ ଏହି ପ୍ରସ୍ତାବରେ ମିଲର୍ ରାଜି ହୋଇନଥିଲେ।ଜଣେ ଚାଷୀ କହିଛନ୍ତି-“ଧାନ ବିକ୍ରି କରିବା ପାଇଁ ଗତକାଲି ଟୋକନ୍ ମିଳିଥିଲା। ଆଜି ସକାଳେ ଚାଷୀମାନେ ଧାନ ଧରି ମଣ୍ଡିରେ ଗଦେଇଥିଲେ। ମିଲର୍ ୧୧ଟା ବେଳେ ଆସି କହିଲେ କ୍ୱିଣ୍ଟାଲ୍ ପିଛା ୨ କେଜି କାଟିବେ। ଆମେ ବିରୋଧ କଲୁ। ପ୍ରତିବର୍ଷ ପରି ଏଥର କ୍ୱିଣ୍ଟାଲ୍ ପିଛା କେଜିଏ ଲେଖାଏଁ କାଟିବାକୁ କହିଥିଲୁ। ମିଲର ରୋକ୍ଠୋକ୍ ଭାବେ ମନା କରିଦେଇଥିଲେ। ଦୁଇ ଲେଖାଏଁ ଧାନ ନକାଟିଲେ ଧାନ ନେବୁନାହିଁ।”ଆଜି ୩୭ ଜଣ ଚାଷୀଙ୍କଠାରୁ ୮୦୦ କ୍ୱିଣ୍ଟାଲ ଧାନ ମଣ୍ଡିକୁ ଆସିଥିଲା। ଗ୍ରେଡ୍ ଟେଷ୍ଟ ପରେ ଧାନର ମାନ ଏକ ନମ୍ବର ଥାଇ ମଧ୍ୟ ମିଲର କ୍ୱିଣ୍ଟାଲ୍ ପିଛା ଦୁଇ କେଜି ଧାନ କାଟିବା ପାଇଁ ଜିଦ ଧରିବାରୁ ପ୍ରଥମେ ଉତ୍ତେଜନା ଓ ପରେ ସମାଧାନ ନହେବାରୁ ଚାଷୀମାନେ ଟ୍ରକ୍ ଦୁଇଟି ଅଟକାଇ ରଖିଛନ୍ତି। ଏନେଇ ସୋସାଇଟ୍ ସେକ୍ରେଟାରି କୌଣସି ପ୍ରତିକ୍ରିୟା ମିଳିପାରିନାହିଁ ।