!!! ଗଞ୍ଜାମ୍ ଜିଲ୍ଲା ଛତ୍ରପୁର ରୁ ଉପଖଣ୍ଡ ପ୍ରତିନିଧି ପବିତ୍ର କୁମାର ରାଉତ ଙ୍କ ରିପୋର୍ଟ୍ !!!
ଏଥର ସମ୍ଭାଳ (ବେଗୁନିଆପଡା) – ଭାରତରେ ବାଲ୍ୟବିବାହ ଭଳି କୁତ୍ସିତ ପ୍ରଥାକୁ ରୋକିବା ପାଇଁ ଭାରତ ସରକାର ‘ବାଲ୍ୟବିବାହ ନିଷେଧ ଅଧିନିୟମ ଆଇନ- ୨୦୦୬ ଲାଗୁକରିଛନ୍ତି l ଆଇନଗତ ଭାବେ ବିବାହ ବୟସ ୧୮ ବର୍ଷରୁ କମ ହେଲେ ଏହା ଆଇନ ବିରୁଦ୍ଧ ଅଟେ l କାରଣ ବାଲ୍ୟବିବାହ ଉଭୟ ପୁଅ ଓ ଝିଅ ଉପରେ କୁପ୍ରଭାବ ପକାଇଥାଏ l ବିଶେଷ କରି ଏକ୍ଷେତ୍ରରେ ଝିଅମାନେ ଅଧିକ ପ୍ରଭାବିତ ହୋଇଥାନ୍ତି l କିନ୍ତୁ ସମାଜରେ ଏଭଳି ବିବାହ ଉଭୟ ପକ୍ଷର ରାଜିନାମାରେ ପ୍ରଶାସନର ନଜର ଆଢୁଆଳରେ ହେଉ କିମ୍ବା ସଚେତନତାର ଅଭାବରୁ ହେଉ କେଉଁଠି ନା କେଉଁଠି ଚାଲିଆସୁଅଛି l ଆଜି ଏଭଳି ଏକ ବାଲ୍ୟବିବାହକୁ ରୋକିଛି ପ୍ରଶାସନ l ପ୍ରାପ୍ତ ସୂଚନା ଅନୁଯାୟୀ ଗଞ୍ଜାମ ଜିଲ୍ଲା ବେଗୁନିଆପଡା ବ୍ଲକ ଅନ୍ତର୍ଗତ ସିଦ୍ଧେଶ୍ୱର କଲୋନୀ ସାହିର ଜନୈକ ନାବାଳିକା ଝିଅ ସହିତ ଖଣ୍ଡିଆନଇ ପଞ୍ଚାୟତର ତିରିଡ଼ା ଗ୍ରାମର ଜନୈକ ପୁଅ ସହିତ ଆଜି ଅର୍ଥାତ ସୋମବାର ଦିନ ବିବାହ ପାଇଁ ସ୍ଥିର ହୋଇଥିଲା l ଏଥିପାଇଁ ଝିଅ ମଧ୍ୟ ବରଘରେ ପହଞ୍ଚିସାରିଥିଲା ଏବଂ ଆଜି ସନ୍ଧ୍ୟାରେ ବିବାହ ସମ୍ପର୍ନ୍ନ ହୋଇଥାନ୍ତା l କିନ୍ତୁ ଚାଇଲଡ ହେଲ୍ପଲାଇନରୁ ଖବରପାଇଁ ବାଲ୍ୟବିବାହ ନିରୋଧି ଅଧିକାରୀଣୀ ତଥା ସିଡିପିଓ ସନ୍ଧ୍ୟାରାଣୀ ପାଣିଗ୍ରାହୀ, ବେଗୁନିଆପଡା ପୁଲିସ, ସମନ୍ୱିତ ଶିଶୁବିକାଶ କର୍ମଚାରୀ ଆଦି ତିରିଡ଼ା ଗ୍ରାମରେ ପହଂଚି ଏହି କୁତ୍ସିତ ପ୍ରଥାକୁ ରୋକିବା ସହ ଉଭୟ ପକ୍ଷକୁ ଏହାର କୁପରିଣାମ ସମ୍ବନ୍ଧରେ ସଚେତନ କରିଥିଲେ l ଏହାକୁ ନେଇ କିଛି ଅପ୍ରୀତିକର ପରିବେଶ ସୃଷ୍ଟି ହେବାପୂର୍ବରୁ ଗ୍ରାମର ଭଦ୍ରବ୍ୟକ୍ତି, କନ୍ୟାପକ୍ଷ, ବରପକ୍ଷ ଏବଂ ପ୍ରଶାସନ ମଧ୍ୟରେ ଏକ ବୈଠକରେ ଆଲୋଚନା ହୋଇଥିଲା l ଏଥିରେ ଝିଅକୁ ୧୮ ବର୍ଷ ହେବା ପୂର୍ବରୁ ବିବାହ ନକରିବା ଏବଂ ଝିଅକୁ ୧୮ ବର୍ଷ ସମ୍ପୂର୍ଣ ହେବାପରେ ଆଇନ ଅନୁଯାୟୀ କୋର୍ଟରେ ବିବାହ କରିବା ବୈଠକରେ ନିଷ୍ପତ୍ତି ହୋଇଥିଲା l ଏନେଇ ବରପକ୍ଷରୁ ଲିଖିତ ଆକାରରେ ଏକ ସ୍ବୀକାରୋକ୍ତି ପ୍ରଶାସନକୁ ପ୍ରଦାନ କରିଥିଲେ l ଶେଷରେ ପ୍ରଶାସନ ପକ୍ଷରୁ ଝିଅକୁ ତା’ ବାପା ଘରେ ଛଡାଯାଇଥିଲା l
