କରୋନା ମୁକାବିଲା ପାଇଁ ଓଡ଼ିଆ ସିନେ ତାରକା ଅର୍ଦ୍ଧେନ୍ଦୁଙ୍କ ଦାନ।

ଏଥର ସମ୍ଭାଳ ବ୍ୟୁରୋ (ଭୁବନେଶ୍ବର) – କୋଭିଡ -19 ର ଭୟାଭୟତା ଦେଶ ତଥା ରାଜ୍ୟର ମେରୁଦଣ୍ଡ ଭାଙ୍ଗିଦେଇଥିବା ବେଳେ ଭବିଷ୍ୟତରେ ଏହାର କୁପରିଣାମ ଦେଶର ଅର୍ଥନୀତି ଉପରେ ପ୍ରତିକୂଳ ପ୍ରଭାବ ପକାଇବାର ଯଥେଷ୍ଟ ସମ୍ଭାବନା ରହିଛି। ଏହାକୁ ଦୃଷ୍ଟିରେ ରଖି ବହୁ ବଦାନ୍ୟ ବ୍ୟକ୍ତି କରୋନା ମୁକାବିଲା ପାଇଁ ଦାନ କରୁଥିବାବେଳେ ଏଥିରେ ଓଡ଼ିଆ ସିନେ ତାରକା ଅର୍ଦ୍ଧେନ୍ଦୁ ସୁନ୍ଦର ସାହୁ ପ୍ରଭାବିତ ହୋଇ ଶନିବାର ମୁଖ୍ୟମନ୍ତ୍ରୀଙ୍କ ରିଲିଫ ପାଣ୍ଠିକୁ ୩ଲକ୍ଷ ଟଙ୍କା ପ୍ରଦାନ କରିଛନ୍ତି। ରାଜ୍ୟ ଲୋକସେବା ଭବନଠାରେ ମୁଖ୍ୟ ଶାସନ ସଚିବ ଅସିତ ତ୍ରିପାଠୀଙ୍କ ଉପସ୍ଥିତିରେ ଅର୍ଦ୍ଧେନ୍ଦୁ ଓ ତାଙ୍କ ପତ୍ନୀ ପଲ୍ଲବୀ ମହାରଥୀ ଏହି ଚେକ ପ୍ରଦାନ କରିଥିଲେ। ଚେକ ପ୍ରଦାନ ବେଳେ ଅର୍ଦ୍ଧେନ୍ଦୁ କହିଥିଲେ ଯେ, ଏହି ଅର୍ଥ ରାଶି ସେ ନିଜ ପରିବାର ତରଫରୁ ଦାନ କରିଛନ୍ତି । ଏବଂ ଅଦୃଶ୍ୟ ଶତୃ କରୋନା ବିପକ୍ଷ ଲଢେଇରେ ଓଡ଼ିଶା ନିଶ୍ଚୟ ବିଜୟୀ ହେବ ବୋଲି ଦୃଢ଼ ବିଶ୍ୱାସ ରହିଥିବା ପ୍ରକାଶ କରିଛନ୍ତି। ଏଥିପାଇଁ ମୁଖ୍ୟ ଶାସନ ସଚିବ ଅସିତ ତ୍ରିପାଠୀ ଉଭୟଙ୍କୁ ଧନ୍ୟବାଦ ଜଣାଇଥିଲେ।