ତାରାତାରିଣୀଙ୍କ ପୀଠରେ ପ୍ରଶାସନ ପକ୍ଷରୁ କଟକଣା ; ମୁଣ୍ଡନ ସମ୍ପୂର୍ଣ ବନ୍ଦ l 

!!! ଗଞ୍ଜାମ୍ ଜିଲ୍ଲା ଛତ୍ରପୁର ରୁ ଉପଖଣ୍ଡ ପ୍ରତିନିଧି ପବିତ୍ର କୁମାର ରାଉତ ଙ୍କ ରିପୋର୍ଟ୍ !!!

ଏଥର ସମ୍ଭାଳ (ଗଞ୍ଜାମ) – କରୋନା ଭୟରେ ସମଗ୍ର ବିଶ୍ୱ ଏବେ  ପ୍ରମାଦ ଗଣୁଛି l ଏଥିପାଇଁ ସବୁଠି ପ୍ରତିକାର ସ୍ୱରୂପ ଯେପରି ଜନସାଧାରଣ ଅଧିକ ଗହଳି ନହେବେ ସେଥିପ୍ରତି ଗୁରୁତ୍ୱ ଦିଆଯାଉଛି l ଏହି ପରିପ୍ରେକ୍ଷୀରେ ଗଞ୍ଜାମ ଜିଲ୍ଲା ପୁରୁଷୋତ୍ତମପୁର ନିକଟସ୍ଥ ଗଞ୍ଜାମର ଆରାଧ୍ୟ ଦେବୀ ମା’ତାରାତାରିଣୀଙ୍କ ଚୈତ୍ର ମଙ୍ଗଳବାର ଯାତ୍ରା ଉପରେ ପ୍ରଶାସନ ପକ୍ଷରୁ କଟକଣା ଲଗାଯାଇଛି। ମୁଣ୍ଡନକୁ ସମ୍ପୂର୍ଣ୍ଣ ବନ୍ଦ କରାଯାଇଛି। ଏଥିସହ ପାହାଡ଼ ଉପରକୁ ବସ୍‌ ସେବା ପ୍ରତ୍ୟାହାର ହୋଇଛି। ସେଠାରେ ଥିବା କଲ୍ୟାଣ ମଣ୍ଡପ ଓ ହୋଟେଲ ବନ୍ଦ କରିବାକୁ ନିର୍ଦ୍ଦେଶ ଦିଆଯାଇଛି। ଫଳରେ ଜନସମାଗମ କମିବା ସହ ଯାତ୍ରା ରୀତିନୀତିରେ ହେବ। ଚଳିତବର୍ଷ ନ ଆସି ଆଗାମୀ ବର୍ଷକୁ ଭକ୍ତ ଆସନ୍ତୁ ବୋଲି ଗଞ୍ଜାମ ଜିଲାପାଳ ବିଜୟ ଅମୃତା କୁଲାଙ୍ଗେ କହିଛନ୍ତି। ରବିବାର ଏନେଇ ଜିଲାପାଳ ଏକ ଜରୁରୀ ବୈଠକ କରିଥିଲେ। ସେବାୟତମାନେ ମଧ୍ୟ ଏହାକୁ ସ୍ବାଗତ କରିଛନ୍ତି। ଗଞ୍ଜାମ ଏସ୍‌ପି ବ୍ରିଜେଶ କୁମାର ରୟ, ଛତ୍ରପୁର ବିଧାୟକ ସୁବାସ ଚନ୍ଦ୍ର ବେହେରା, କବିସୂର୍ଯ୍ୟନଗର ବିଧାୟିକା ଲତିକା ପ୍ରଧାନ, ଖଲିକୋଟ ବିଧାୟିକା ସୂର୍ଯ୍ୟମଣି ବୈଦ୍ୟ ପ୍ରମୁଖ ଉପସ୍ଥିତ ଥିଲେ। ଏହାକୁ ସମସ୍ତେ ସ୍ୱାଗତ କରିଥିବା ଜଣାପଡିଛି l