!!! ମୟୂରଭଞ୍ଜ ଜିଲ୍ଲା ବାରିପଦା ଟାଉନ ରୁ ଅମିତ୍ ନାୟକ ଙ୍କ ରିପୋର୍ଟ୍ !!!
ଏଥର ସମ୍ଭାଳ (ବାରିପଦା)- ଭିନ୍ନକ୍ଷମମାନଙ୍କ ସାମୂହିକ ବିକାଶ ଓ ହିତ ସାଧନ ନିମନ୍ତେ କାର୍ଯ୍ୟ କରିଆସୁଥିବା ଅଖିଳ ଭାରତୀୟ ସଙ୍ଗଠନ ‘ସକ୍ଷମ’ ପକ୍ଷରୁ ଏକ ଦିବ୍ୟାଙ୍ଗମାନଙ୍କ ଅଧିବେଶନ ମୟୂରଭଞ୍ଜ ମହାରାଣୀ ରାଜଲକ୍ଷ୍ମୀ ଭଞ୍ଜଦେଓଙ୍କ ଅଧ୍ୟକ୍ଷତାରେ ସ୍ଥାନୀୟ ମଞ୍ଚାବନ୍ଧାସ୍ଥିତ ରାଖାଲ ଚନ୍ଦ୍ର ଶିଳ୍ପ ତାଲିମ ପ୍ରତିଷ୍ଠାନ ପରିସରରେ ଆୟୋଜିତ ହୋଇଥିଲା । ପୂର୍ବତନ ସୈନିକ ସଂଘର ମୟୂରଭଞ୍ଜ ଜିଲ୍ଲା ଶାଖା ସାଧାରଣ ସମ୍ପାଦକ ଅଶୋକ କୁମାର ଦଳବେହେରାଙ୍କ ଆବାହକତ୍ୱରେ ଅନୁଷ୍ଠିତ ଉକ୍ତ କାର୍ଯ୍ୟକ୍ରମରେ ମୟୂରଭଞ୍ଜ ଲୋକସଭା ସାଂସଦ ଇଂ ବିଶେଶ୍ୱର ଟୁଡ଼ୁ ମୁଖ୍ୟ ଅତିଥି ଭାବେ ଯୋଗ ଦେଇଥିବା ବେଳେ ସମ୍ମାନୀତ ଅତିଥି ଭାବେ ‘ସକ୍ଷମ’ ଅନୁଷ୍ଠାନର ରାଷ୍ଟ୍ରୀୟ ସାଧାରଣ ସମ୍ପାଦକ କମଳାକାନ୍ତ ପାଣ୍ଡେ , ଓଡ଼ିଶା ପୂର୍ବ ପ୍ରାନ୍ତ ରାଜ୍ୟ ଶାଖା ସଭାପତି ଡ଼କ୍ଟର ସୁବ୍ରତ କୁମାର ଦାସ ଓ ରାଜ୍ୟ ସମ୍ପାଦକ ସରୋଜ କୁମାର ସାହୁ ମୁଖ୍ୟ ବକ୍ତା ଭାବେ ଯୋଗ ଦେଇ ଅଧିବେଶନରେ ଉପସ୍ଥିତ ଦିବ୍ୟାଙ୍ଗମାନଙ୍କୁ ଉଦବୋଧନ ଦେବା ସହ କେନ୍ଦ୍ର ସରକାରଙ୍କ ପକ୍ଷରୁ ସେମାନଙ୍କ ନିମନ୍ତେ କାର୍ଯ୍ୟକାରୀ କରାଯାଇଥିବା ବିଭିନ୍ନ ବିକାଶ ମୂଳକ ଯୋଜନାଗୁଡ଼ିକ ଉପରେ ବିସ୍ତୃତ ଭାବେ ଉପସ୍ଥାପନ କରାଇଥିଲେ । ସେହିପରି ଅନ୍ୟମାନଙ୍କ ମଧ୍ୟରେ ପୂର୍ଣ୍ଣଚନ୍ଦ୍ର ପାଣିଗ୍ରାହୀ, କବିବିଷ୍ଣୁ ଶତପଥୀ, ଗୀତିକୃଷ୍ଣ ତିୱାରୀ, ବଙ୍କେଶ ସେଠୀ, ଦୀପକ ବେହେରା, ହରେକୃଷ୍ଣ ମହାନ୍ତ, ଲକ୍ଷ୍ମଣ ତ୍ରିପାଠୀ, ନବୀନ କୁମାର ମହାନ୍ତ ପ୍ରମୁଖ କାର୍ଯ୍ୟକ୍ରମରେ ଯୋଗ ଦେଇଥିବା ବେଳେ ରାଜ୍ୟ କର୍ମକର୍ତ୍ତା ବୀର କିଶୋର ମହାନ୍ତ ଧନ୍ୟବାଦ ଅର୍ପଣ କରିଥିଲେ । ଉକ୍ତ ଅଧିବେଶନରେ ବିଭିନ୍ନ ଅଞ୍ଚଳରୁ ପ୍ରାୟ ୫ ଶହରୁ ଅଧିକ ଦିବ୍ୟାଙ୍ଗ ଯୋଗ ଦେଇଥିଲେ । ତେବେ ସମଗ୍ର ଭାରତରେ ଭିନ୍ନକ୍ଷମମାନଙ୍କ ସଂଖ୍ୟା ସମୂଦାୟ ଜନସଂଖ୍ୟାର ୩ ପ୍ରତିଶତ ହୋଇଥିବା ବେଳେ ମୟୂରଭଞ୍ଜ ଜିଲ୍ଲାରେ ଏମାନଙ୍କ ସଂଖ୍ୟା ପ୍ରାୟ ୮ ପ୍ରତିଶତରୁ ଅଧିକ । ତେଣୁ ଜିଲ୍ଲାରେ ଦିବ୍ୟାଙ୍ଗମାନଙ୍କ ସମର୍ପିତ ଏହି ଅଧିବେଶନ ସେମାନଙ୍କୁ ବିଶେଷ ଭାବେ ପ୍ରଭାବିତ କରାଇବ ବୋଲି ମତପ୍ରକାଶ ପାଇଛି ।