!!! ଗଂଜାମ ଜିଲ୍ଲା ଖଲ୍ଲିକୋଟରୁ ଅଶ୍ୱିନୀ କୁମାର ମହାନ୍ତି ଙ୍କ ରିପୋର୍ଟ୍ !!!
ଏଥର ସମ୍ଭାଳ (ଖଲ୍ଲିକୋଟ) – ଗଂଜାମ ଜିଲ୍ଲା ଖଲ୍ଲିକୋଟ ଥାନା ଅନ୍ତର୍ଗତ ଭେଜିପୁଟ ଗ୍ରାମରେ ବିଦ୍ୟୁତ ଆଘାତରେ ଜଣେ କୃଷକର ମୃତ୍ୟୁ ହୋଇଯାଇଛି । ସୂଚନା ଅନୁଯାୟୀ ଭେଜିପୁଟ ଗ୍ରାମ ଓଡ଼ିଆ ସାହିର କୃଷକ ଜଗନ୍ନାଥ ପରିଡ଼ା ଆଜି ସକାଳୁ ଚାଷ କରିବା ପାଇଁ ନିଜ ବିଲକୁ ଯାଇଥିଲେ । ବିଲରେ ପରିବା ଚାଷ କରିବା ପାଇଁ ବାଉଁଶ ମାଧ୍ୟମରେ ବାଡ଼ ତିଆରି କରୁଥିବା ସମୟରେ ହଠାତ୍ ବିଲ ଉପରେ ଯାଇଥିବା ୩୩ କେଭି ବିଦ୍ୟୁତ ତାରରେ ବାଉଁଶ ନଳ ଟି ଲାଗିଯାଇଥିଲା । ଯାହା ଫଳରେ ବାଉଁଶ ନଳ ସହ ଜଗନ୍ନାଥ ବିଲରେ ଟଳିପଡ଼ିଥିଲେ । ପାଖ ବିଲରେ କାମ କରୁଥିବା କିଛି ଚାଷୀଙ୍କ ସହାୟତାରେ ଉଦ୍ଧାର କରାଯାଇଥିଲା ହେଲେ ସେତେ ବେଳକୁ ଜଗନ୍ନାଥଙ୍କ ଉଡ଼ିଯାଇଥିଲା ପ୍ରାଣବାୟୁ । ଗ୍ରାମବାସୀଙ୍କ ସହାୟତା ଓ ୧୦୮ ଆମ୍ବୁଲାନ୍ସ ମାଧ୍ୟମରେ ଖଲ୍ଲିକୋଟ ଗୋଷ୍ଠି ସ୍ବାସ୍ଥ୍ୟ କେନ୍ଦ୍ରକୁ ନିଆଯାଇଥିଲା ସେଠାରେ ଡାକ୍ତର ମୃତ ଘୋଷଣା କରିଥିଲେ । ମୃତ୍ୟୁ ଖବର ଶୁଣି ସ୍ତ୍ରୀ ମମି ପରିଡ଼ାଙ୍କର ପାଦତଳୁ ମାଟି ଖସିଯାଇଛି । ମୃତ ଜଗନ୍ନାଥ ଙ୍କ ଦୁଈ ଝିଅ ସନ୍ତୋଷୀ, ପୁଷ୍ପା ଏଵଂ ଗୋଟିଏ ପୁଅ ବିଷ୍ଣୁ, ସୁରାଟ ରେ ଥିବାବେଳେ… ଆଉ ମାତ୍ର ୨୦ ଦିନ ପରେ ବଡ଼ଝିଅ ସନ୍ତୋଷୀ ର ବିବାହ ହୋଇଥାନ୍ତା l ହେଲେ ବାପାଙ୍କ ଏଭଳି ମୃତ୍ୟୁ ଘଟଣାକୁ ନେଇ ପରିବାର ବର୍ଗ ସମ୍ପୂର୍ଣ୍ଣ ଭାଙ୍ଗିପଡିଥିବା ବେଳେ ଗ୍ରାମବାସୀ ମୃତକ ପରିବାର କୁ କ୍ଷତିପୂରଣ ଦେବାପାଇଁ ଦାବି କରିଛନ୍ତି l
