ଗ୍ଲୋରୀଫେଷ୍ଟ ରୌପ୍ୟ ଜୟନ୍ତୀ ଉତ୍ସବ ଉଦ୍ଯାପିତ ।
ଏଥର ସମ୍ଭାଳ ବ୍ୟୁରୋ (ଭୁବନେଶ୍ଵର) – ଶ୍ରୀକ୍ଷେତ୍ର ପୁରୀରେ ବେଳାଭୂମିର ଶୀତୁଆ ସନ୍ଧ୍ୟା ଥିଲା ରଙ୍ଗୀନ। ଆଉ ତାହାରି ଭିତରେ ଆରମ୍ଭ ହୋଇଥିଲା ସୁନ୍ଦରୀ ତରୁଣୀଙ୍କ ରାମ୍ପ। ଜଣେ ପରେ ଜଣେ ସୁନ୍ଦରୀ ନହକା ନହକା ଚାଲି ଶୀତୁଆ ସଞ୍ଜକୁ ଉଷ୍ମ କରିଥିଲା। କରତାଳିରେ ଉଛୁଳି ପଡ଼ୁଥିଲା ପେଣ୍ଡାଲ୍। ବେଳାଭୂମିରେ ଚାଲିଥିବା ଗ୍ଲୋରୀ ଫେଷ୍ଟର ଶେଷ ଦିନରେ ଥିଲା ଏମିତି ଦୃଶ୍ୟ।
ଆତ୍ମବିଶ୍ୱାସ, ରାମ୍ପ, ଦକ୍ଷତା, ଅଭିନୟ ଜରିଆରେ ଜୁରି ଓ ଦର୍ଶକଙ୍କ ହୃଦୟ ଜିତିଲେ ରାଉରକେଲା ସରକାରୀ ଅଟୋନମସ କଲେଜର ଛାତ୍ରୀ ପ୍ରତିକ୍ଷା ଆୟୁଷ ଆକାଂକ୍ଷା। ସେ ଗ୍ଳୋରୀ କୁଇନ ଭାବେ ବିଜୟୀ ହୋଇଛନ୍ତି। ପ୍ରଥମ ରନରସ୍ ଭାବେ ହାଇଟେକ ମେଡ଼ିକାଲର ଆଦ୍ୟାଶା ଆଦିଶକ୍ତି ସାହୁ, ତୃତୀୟ ରନରସ୍ ଶିବାନୀ ଭାଗଲ ସରକାରୀ ଅଟୋନମସ କଲେଜ ସମ୍ମାନିତ ହୋଇଛନ୍ତି। ଏହି ଅବସରରେ ରଙ୍ଗାରଙ୍ଗ ସାଂସ୍କୃତିକ କାର୍ଯ୍ୟକ୍ରମ ହୋଇଥିଲା। ଶୀତୁଆ ସଂଧ୍ୟାରେ ଦର୍ଶକଙ୍କ ମନ ଜିଣିଥିଲେ ଇଣ୍ଡିଆନ ଆଇଡଲ ଫେମ୍ ରିୟା ଓ ସଲମାନ। ବିଭିନ୍ନ ରୋମାଣ୍ଟିକ୍ ଗୀତ ଗାଇ ଦର୍ଶକଙ୍କ ମନକୁ ଉଷ୍ମ କରିଥିଲେ। ଗୀତ ସହିତ ତାଳ ଦେଇ ମଞ୍ଚ ତଳେ ଦର୍ଶକ ନାଚିଥିଲେ।ଉଦ୍ଯାପନୀ ଦିବସରେ ଝାଡ଼ଖଣ୍ଡ ରାଜ୍ୟପାଳ ଦ୍ରୌପଦୀ ମୁର୍ମୁ, କେନ୍ଦ୍ରମନ୍ତ୍ରୀ ଧମେନ୍ଦ୍ର ପ୍ରଧାନ, ପୁରୀ ବିଧାୟକ ଜୟନ୍ତୀ ଷଡ଼ଙ୍ଗୀ, ବ୍ରହ୍ମଗିରି ବିଧାୟକ ଲଳିତେନ୍ଦୁ ବିଦ୍ୟାଧର ମହାପାତ୍ର, ନାଲ୍କୋ ସିଏମ୍ଡି ଶ୍ରୀଧର ପାତ୍ର, ଶଙ୍କର୍ଷଣ ପରିଡା, ଅନୁଷ୍ଠାନରେ ସମ୍ପାଦକ ରାଜେଶ ମହାନ୍ତି ପ୍ରମୁଖଙ୍କ ଉପସ୍ଥିତ।
କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର କହିଛନ୍ତି-“ଗ୍ଲୋରୀ ଫେଷ୍ଟକୁ ଏହା ଭିତରେ ୨୫ ବର୍ଷ ପୂରିଛି। ଏଥିପାଇଁ ଆୟୋଜକଙ୍କୁ ଧନ୍ୟବାଦ ଦେଉଛି। ପୁରୀ ସହର ହେଉଛି ଏକ ଜାତୀୟ କେନ୍ଦ୍ର। ଏଠାରେ ଜାତୀୟ ସ୍ତରୀୟ କାର୍ଯ୍ୟକ୍ରମ ଆୟୋଜନ କରାଯାଇଛି।”ଶ୍ରୀକ୍ଷେତ୍ରର ଅଗ୍ରଣୀ ଯୁବ ସାଂସ୍କୃତିକ ଅନୁଷ୍ଠାନ ଜାତୀୟ ଯୁବ ସମନ୍ୱିତ କେନ୍ଦ୍ର ଆନୁକୂଲ୍ୟରେ ୭ ଦିନ ଧରି ଚାଲିଥିଲା ଗ୍ଲୋରୀଫେଷ୍ଟ ରୌପ୍ୟ ଜୟନ୍ତୀ ଉତ୍ସବ। ଏହି କାର୍ଯ୍ୟକ୍ରମରେ ରାଜ୍ୟ ତଥା ରାଜ୍ୟ ବାହାରୁ ୬୫୦ ପ୍ରତିଯୋଗୀ ବିଭିନ୍ନ ପ୍ରତିଯୋଗିତାରେ ଭାଗ ନେଇ ସେମାନଙ୍କ ପ୍ରତିଭା ଦେଖାଇଥିଲେ।