!!! ଗଜପତି ଜିଲ୍ଲା ରୁ ପାରଳାଖେମୁଣ୍ଡି ଟାଉନ ପ୍ରତିନିଧି ଅନିତା ଅଧିକାରୀ ଙ୍କ ରିପୋର୍ଟ !!!
ଏଥର ସମ୍ଭାଳ (ପାରଳାଖେମୁଣ୍ଡି) – ଗଜପତି ଫାର୍ମାସୀ କଲେଜ ପକ୍ଷରୁ ୫୮ ତମ ଜାତୀୟ ଫାର୍ମାସୀ ସପ୍ତାହ-୨୦୧୯ ପାଳିତ ହୋଇଯାଇଛି । ସ୍ଥାନୀୟ ମହାରାଜା ଶ୍ରୀ କୃଷ୍ଣଚନ୍ଦ୍ର ଗଜପତି ମହାରାଜାଙ୍କ ରାଜାନହର ସମ୍ମୁଖରୁ ଏକ ବିରାଟ ଶୋଭାଯାତ୍ରା ଗଜପତି ଫାର୍ମାସୀ କଲେଜର ଛାତ୍ରଛାତ୍ରୀ ମାନେ ବିଭିନ୍ନ ସଚେତନତା ମୂଳକ ପ୍ଲା-କାର୍ଡ ଧରି ଏବଂ ବିଭିନ୍ନ ସ୍ଲୋଗାନ-ମାନ ଦେଇ ନଗର ପରିକ୍ରମା କରିବା ପରେ ଜିଲ୍ଲା ମୁଖ୍ୟଚିକିତ୍ସାଳୟ ଠାରେ ପହଞ୍ଚି ଥିଲେ । ବିନୋଦିନୀ ସାଇନ୍ସ କଲେଜର ରାଜନୀତି ବିଜ୍ଞାନ ବିଭାଗର ବରିଷ୍ଠ ଅଧ୍ୟାପକ ରବୀନ୍ଦ୍ର ପାଣିଗ୍ରାହୀ ମୁଖ୍ୟଅତିଥି ଭାବେ ଯୋଗଦେଇ ଏହି ଜନ-ସଚେତନତା ଶୋଭାଯାତ୍ରାଟିକୁ ସବୁଜ ପତାକା ଦେଖାଇ ଶୁଭାରମ୍ଭ କରିଥିଲେ । ଜିଲ୍ଲା ମୁଖ୍ୟ ଚିକିତ୍ସାଳୟ ଠାରେ ଥିବା ପ୍ରସୂତି କାଳୀନ ଓ ଶିଶୁ ସ୍ବାସ୍ଥ୍ୟ ବିଭାଗରେ ଥିବା ପ୍ରସୂତି , ମା ଓ ଶିଶୁ ମାନଙ୍କୁ କଲେଜ ପକ୍ଷରୁ କଲେଜର ଛାତ୍ରଛାତ୍ରୀ , ଅଧ୍ୟାପକ , ଅଧ୍ୟାପିକା ଓ କର୍ମଚାରୀ ମାନେ ଶୁଖିଲା ତଥା ହାଲୁକା ଖାଦ୍ୟ ଯଥା ବିଭିନ୍ନ ଫଳ ଓ ବିସ୍କୁଟ ସହ ଓଆର୍ ଏସ୍ ପାନୀୟ ପ୍ରଭୃତି ବଣ୍ଟନ କରିଥିଲେ ।ଏହି କାର୍ଯ୍ୟକ୍ରମ ସମୟରେ ମୁଖ୍ୟ ଚିକିତ୍ସାଳୟ ସୁପରଟେଣ୍ଡ ରମେଶ ଚନ୍ଦ୍ର ମିଶ୍ର ଉପସ୍ଥିତ ରହିଥିଲେ।
କଲେଜର ପ୍ରିନ୍ସିପାଲ ଡ଼ଃ.ସଚ୍ଚି ନନ୍ଦନ ଦାସ ଯୋଗଦେଇ କାର୍ଯ୍ୟକ୍ରମ ପାଳନର ଆଭିମୁଖ୍ୟ ସମ୍ପର୍କରେ ଆଧିକ ସୂଚନା ଦେଇ କହିଥିଲେ ଯେ , ରୋଗୀ ମାନେ କୌଣସି ପ୍ରକାର ଔଷଧ ଖାଇବା ପୂର୍ବରୁ ଡାକ୍ତର କି ଫାର୍ମାସିଷ୍ଟଙ୍କ ପରାମର୍ଶ ନେବା , ଔଷଧକୁ ଭଲଭାବେ ଜାଣି ତାକୁ କିଭଳି ଠିକ ସମୟରେ ଏବଂ ଉଚିତ ପରିମାଣର ଖାଇ ଆରୋଗ୍ୟ ହେବେ ଏହା ହିଁ ସପ୍ତାହ ପାଳନର ବାର୍ତ୍ତା ବହନ କରିଥାଏ । ପୂର୍ବରୁ ଆମେ ସତର୍କ ରହି ପ୍ରତିରୋଧ ତଥା ପ୍ରତିଷେଧକ ବ୍ୟବସ୍ଥା ଗ୍ରହଣ କରି ପାରିଲେ ତାହା ରୋଗ ଆରୋଗ୍ୟ ଠାରୁ ଆହୁରି ଅଧିକ ଉତ୍ତମ । ଏହାକୁ ସମସ୍ତେ ମାନିବା ଆବଶ୍ୟକ ଯାହାକି ଆରୋଗ୍ୟ ଜୀବନଯାପନ ପ୍ରଣାଳୀରେ ବେଶ ସୁଫଳ ମିଳିପାରିବ ବୋଲି କହିଥିଲେ ।
ଅନ୍ୟମାନଙ୍କ ମଧ୍ୟରେ ଏହି ଜନ-ସଚେତନତା ଶୋଭାଯାତ୍ରା ଓ ମୁଖ୍ୟ ଚିକିତ୍ସାଳୟରେ ପ୍ରସୂତି , ମା ଓ ଶିଶୁଙ୍କୁ ଫଳ ବଣ୍ଟନ କାର୍ଯ୍ୟକ୍ରମରେ ଗଜପତି ଫାର୍ମାସୀ କଲେଜର ଅଧ୍ୟକ୍ଷ ଡ଼ଃ ସଚ୍ଚି ନନ୍ଦନ ଦାସଙ୍କ ସମେତ ପ୍ରଶାସନିକ ଅଧିକାରୀ ବର ପ୍ରସାଦ ତ୍ରିପାଠୀ , ଅଧ୍ୟାପକ ପ୍ରବୀଣ କୁମାର ମିଶାଲ , ଅଧ୍ୟାପିକା ରଶ୍ମିତା ଦାସ , ଅଧ୍ୟାପିକା ଚଞ୍ଚଳା ଚପାଦି , ଏବଂ ଅଧ୍ୟାପିକା ନନ୍ଦିନୀ ମାଝୀ ପ୍ରମୁଖ ଯୋଗ ଦେଇ ସମସ୍ତ କାର୍ଯ୍ୟକ୍ରମରେ ସହଯୋଗ କରିଥିଲେ ।
