!!! ଗଜପତି ଜିଲ୍ଲା ରୁ ପାରଳାଖେମୁଣ୍ଡି ଟାଉନ ପ୍ରତିନିଧି ଅନୀତା କୁମାରୀ ଅଧିକାରୀ ଙ୍କ ରିପୋର୍ଟ୍ !!!
ଏଥର ସମ୍ଭାଳ (ପାରଳାଖେମୁଣ୍ଡି) – ସ୍ଥାନୀୟ ବିଜୁ କଲ୍ୟାଣ ମଣ୍ଡପ ଠାରେ ସହରରେ ସଡ଼କ ସୁରକ୍ଷା ଦିଗରେ ସରକାରଙ୍କ ନୂତନ ମୋଟର-ଯାନ ଚଳାଚଳ ନୀତି-ନିୟମ ଉପରେ ଜନ-ସାଧାରଣଙ୍କୁ ସଚେତନ କରାଇବା ଉଦ୍ଦେଶ୍ୟ ନେଇ ଏକ “ସଡ଼କ ସୁରକ୍ଷା ଓ ନିୟମ ସମ୍ବନ୍ଧୀୟ ସଚେତନତା ଅଭିଯାନ–ରକ୍ଷକ” କାର୍ଯ୍ୟକ୍ରମ ଅନୁଷ୍ଠିତ ହୋଇ ଯାଇଛି । ଓଡିଶା ସରକାରଙ୍କ ରାଜ୍ୟ ଯୁବ କଲ୍ୟାଣ ପରିଷଦ ସହାୟତାରେ ଜିଲ୍ଲା ବିଜୁ ଯୁବ ବାହିନୀ ଆନୁକୂଲ୍ୟରେ ଏବଂ ସ୍ଥାନୀୟ ଆଞ୍ଚଳିକ ପରିବହନ କାର୍ଯ୍ୟାଳୟ ସହଯୋଗରେ ପାରଳାଖେମୁଣ୍ଡି ପୌର-ପରିଷଦ ଆୟୋଜନରେ ଅନୁଷ୍ଠିତ ହୋଇ ଯାଇଛି । ବିଜୁ କଲ୍ୟାଣ ମଣ୍ଡପ ଠାରେ ସଡ଼କ ସୁରକ୍ଷା ଓ ଏ ଦିଗରେ ସରକାରଙ୍କ ନୂତନ ନୀତିନିୟମ ଉପରେ ଏକ ସଚେତନତା ସଭା କାର୍ଯ୍ୟକ୍ରମ ଅନୁଷ୍ଠିତ ହୋଇଥିଲା । ଏହି କାର୍ଯ୍ୟକ୍ରମରେ ଜିଲ୍ଲା କ୍ରୀଡ଼ା ଅଧିକାରୀ ପ୍ରଭାକର ତ୍ରିପାଠୀ ସଂଯୋଜନା କରି କାର୍ଯ୍ୟକ୍ରମର ଆଭିମୁଖ୍ୟ ସମ୍ପର୍କରେ ସମ୍ୟକ ସୂଚନା ପ୍ରଦାନ କରିଥିଲେ । ଏହି କାର୍ଯ୍ୟକ୍ରମରେ ଜିଲ୍ଲାପାଳ ଅନୁପମ ଶାହା ମୁଖ୍ୟଅତିଥି ଭାବେ ଯୋଗଦେଇ ସଡ଼କ ସୁରକ୍ଷା ଜନ-ସାଧାରଣ ଙ୍କ କ୍ଷେତ୍ରରେ ଅତ୍ୟନ୍ତ ଗୁରୁତ୍ୱପୂର୍ଣ୍ଣ ବିଷୟ ଅଟେ । ନିଜର ଜୀବନ ରକ୍ଷକ ନିଜେ ହେବା , ଏମିତିକି ସଡ଼କରେ ଚାଲିଯିବା ବେଳେ ହେଉ କି ମୋଟର-ଯାନ ନିଜେ ଡ୍ରାଇଭିଙ୍ଗ କରି ଯିବାବେଳେ ସଡ଼କ ସୁରକ୍ଷାର ନିତି-ନିୟମ ପ୍ରତି ସତର୍କ ରହି ମାନି ଚଳାଇବା ଆବଶ୍ୟକ । ସଡ଼କ ସୁରକ୍ଷାର ନିତି-ନିୟମ ଉଲଂଘନ କଲେ ଫାଇନ ଟଙ୍କା ଦେବା ବଡ଼ କଥା ନୁହେଁ , ଯଦି ସଡ଼କ ଦୁର୍ଘଟଣାରେ ଥରେ ଜୀବନ ଚାଲିଯାଏ , ତାହା ହେଲେ ସେହି ଜୀବନ ଆଉ ଆସିବି ନାହି । ତେଣୁ ସଡ଼କ ସୁରକ୍ଷା ଉପରେ ସରକାରଙ୍କ ନୂତନ ମୋଟର ଯାନ ଚଳାଚଳ ନିତି-ନିୟମ ମାନି ଚାଲିବା ସହ ବାଇକ ଚଳାଇବା ବେଳେ ହେଲମେଟ୍ ପିନ୍ଧିବା ଏବଂ ୪ ଚକିଆ ଗାଡି ଚଳାଇବା ବେଳେ ସିଟ-ବେଲ୍ଟ ବ୍ୟବହାର କରିବା ଉପରେ ଗୁରୁତ୍ଵାରୋପ୍ କରିଥିଲେ । ଅନ୍ୟ ପକ୍ଷରେ ଜିଲ୍ଲା ପ୍ରଶାସନ ପକ୍ଷରୁ ମଧ୍ୟ ଚେଷ୍ଟା ଜାରୀ ରହିଛି ଯେ , କିଭଳି ଡ୍ରାଇଭିଙ୍ଗ , ପ୍ରଦୂଷଣ , ଓ ଫିଟ୍ନେସ୍ ପ୍ରଭୃତି ପ୍ରମାଣପତ୍ର ଶୀଘ୍ର ହୋଇପାରିବ । ତେଣୁ ସଡ଼କ ସୁରକ୍ଷା ନିତି-ନିୟମକୁ ମାନି ଏହାକୁ ଏକ ଅଭ୍ୟାସରେ ପରିଣତ କରିବା ସହ ଏହାକୁ ମାନିବା ପାଇଁ ବାଧ୍ୟ କରା ଯାଉଥିବା ଭଳି ଭାବନ୍ତୁ ନାହିଁ । ପ୍ରଶାସନ ସବୁବେଳେ ଚାହେଁ ଯେ , ସଡ଼କ ଦୁର୍ଘଟଣା ଓ ଏଥିରେ ମୃତ୍ୟୁ ସଂଖ୍ୟା କିଭଳି ହ୍ରାସ ପାଇବ । ଆମେ ସୁରକ୍ଷିତ ରହି ଆମେ ଆମର ଗନ୍ତବ୍ୟ ସ୍ଥଳକୁ କିଭଳି ସୁରକ୍ଷିତ ଭାବେ ପହଞ୍ଚି ପାରିବା ଏବଂ ଦୁର୍ଘଟଣା ମୁକ୍ତ ସୁସ୍ଥ ସମାଜ କିଭଳି ଏ ଦିଗରେ ଗଠନ ହୋଇ ପାରିବ ସେଥିପାଇଁ ସମସ୍ତଙ୍କ ସହଯୋଗ କାମନା କରିଥିଲେ । ଅନ୍ୟ ମାନଙ୍କ ମଧ୍ୟରେ ଏହି କାର୍ଯ୍ୟକ୍ରମରେ ଅତିରିକ୍ତ ଜିଲ୍ଲାପାଳ ସ୍ୱଧା ଦେବ ସିଂ , ଉପ-ଜିଲ୍ଲାପାଳ ତଥା ଭାରପ୍ରାପ୍ତ ଆଞ୍ଚଳିକ ପରିବହନ ଅଧିକାରୀ ରଜନୀ କାନ୍ତ ସ୍ବାଇଁ ଏବଂ ପୌର-ପରିଷଦ ନିର୍ବାହୀ ଅଧିକାରୀ ଅଶୋକ କୁମାର ରାଉତ ପ୍ରମୁଖ ମଞ୍ଚାସୀନ ଅତିଥି ଭାବେ ଯୋଗଦେଇ ସଡ଼କ ସୁରକ୍ଷା ଓ ସୁରକ୍ଷିତ ଜୀବନ ଯାତ୍ରାର ବିଭିନ୍ନ ଦିଗ ଉପରେ ଆଲୋଚନା କରିଥିଲେ । ସ୍ଥାନୀୟ ଆଞ୍ଚଳିକ ପରିବହନ କାର୍ଯ୍ୟାଳୟର ଜିଲ୍ଲା ଏମଭିଆଇ:-ବସନ୍ତ କୁମାର ମହାପାତ୍ର ଯୋଗଦେଇ ସରକାରଙ୍କ ନୂତନ ମୋଟର-ଯାନ ନୀତିନିୟମର ବିଭିନ୍ନ ଦିଗ ଉପରେ କହି ଏହି ନିତି ନିୟମର ଉଲଂଘନ କାରିଙ୍କ ନିମନ୍ତେ ରହିଥିବା ଆର୍ଥିକ ଦଣ୍ଡବିଧାନ ଉପରେ ବିସ୍ତୃତ ସୂଚନା ଦେଇ ଉପସ୍ଥିତ ଜନ-ସଧାରଣଙ୍କୁ ସଚେତନ କରାଇଥିଲେ । ଶେଷରେ ଉପସ୍ଥିତ ସମସ୍ତଙ୍କୁ ସଡ଼କ ସୁରକ୍ଷା ନୀତିନିୟମକୁ ମାନି ଚାଲିବା ସମ୍ପର୍କରେ ଶପଥ ପାଠ କରା ଯାଇଥିଲା । ଏହି ଅବସରରେ ସକାଳେ ସହରର ପେଲେସ୍ ଛକ , ହାଇସ୍କୁଲ ଛକ , ଏବଂ ଆରଟିଓ ଛକ ଠାରେ ସଡ଼କ ସୁରକ୍ଷା ଉପରେ ସଚେତନତା ଧର୍ମୀ ପଥପ୍ରାନ୍ତ ନାଚ-ଗୀତ ଜିଲ୍ଲାର ଗୋଷାଣୀ ବ୍ଲକ କତଲକଇଠା ପଞ୍ଚାୟତ ଅନ୍ତର୍ଗତ ଯାଜପୁର ଗ୍ରାମର “ମା ସଙ୍କଟ ତାରିଣୀ” ନାଟ୍ୟ ସଂଘ ପକ୍ଷରୁ ଅନୁଷ୍ଠିତ ହୋଇଥିଲା ।
