ସ୍ଥାୟୀ ପରିବା ବଜାର ନେଇ ବଢୁଛି ବିବାଦ ଓ ଅସନ୍ତୋଷ…!

ଏଥର ସମ୍ଭାଳ ବ୍ୟୁରୋ(ରାୟଗଡ଼)- ଫ୍ଲାଏଓଭର ମରାମତି ପାଇଁ ବନ୍ଦ ରହିଥିବା ପରିବା ଓ ଫଳ ବଜାର ର ସ୍ଥାନ ନିରୂପଣ ପାଇଁ ଦିନକୁ ଦିନ ଅସନ୍ତୋଷ ବଢିବା ସହ ବିବାଦ ବଢୁଛି I ପୌର ପ୍ରଶାସନ ବାରମ୍ବାର ତାଗିଦ ସତ୍ୱେ ପୁନର୍ବାର ପୁରୁଣା ସ୍ଥାନରେ ପରିବା ଦୋକାନ ଖୋଲିଛି। ପୌର ପରିଷଦ ପକ୍ଷରୁ ରାମକୃଷ୍ଣ ନଗର ଠାରୁ କେନ୍ଦ୍ରୀୟ ବିଦ୍ୟାଳୟ ଯିବା ରାସ୍ତାରେ ଖୋଲାଯାଇଥିବା ନୂତନ ପରିବା ବଜାର ନେଇ ବିବାଦ ସୃଷ୍ଟି ହୋଇଛି। ଏକ ନିର୍ଦିଷ୍ଟ ସମ୍ପ୍ରଦାୟ ଲୋକ ଉକ୍ତ ସ୍ଥାନକୁ ସେମାନଙ୍କ ଶ୍ମଶାନ ବୋଲି ଦାବି କରିଛନ୍ତି। ଏହାକୁ ନେଇ ଆଜି ପୁଲିସ ଓ ପୌର ପରିଷଦ କର୍ମଚାରୀ ଉକ୍ତ ସ୍ଥାନକୁ ଯାଇ ଅନୁଧ୍ୟାନ କରିଥିଲେ। ହେଲେ ଶ୍ମଶାନ ଜମି ଛାଡ଼ିବାକୁ ସେମାନେ ନାରାଜ ଥିବା ପରିଲକ୍ଷିତ ହୋଇଥିଲା। ଏଭଳିକି ପରିବା ବିକ୍ରି ପାଇଁ ଆସୁଥିବା ବ୍ୟବସାୟୀଙ୍କୁ କିଛି ଅସାମାଜିକ ବ୍ୟକ୍ତିମାନେ ଧମକ ଦେଉଥିବା ମଧ୍ୟ ଅଭିଯୋଗ ହୋଇଛି। ଫଳରେ ପରିବା ଓ ଫଳ ବ୍ୟବସାୟୀ ନିଜର ପୁରୁଣା ସ୍ଥାନରେ ପୁନର୍ବାର ଦୋକାନ ଖୋଲିବାକୁ ବାଧ୍ୟ ହୋଇଛନ୍ତି। ତେବେ ପୌର ପରିଷଦର କୌଣସି ସଠିକ୍ ନିଷ୍ପତ୍ତି ନଥିବା କାରଣରୁ ବ୍ୟବସାୟୀ ଓ ଗ୍ରାହକ ହନ୍ତସନ୍ତ ହେଉଛନ୍ତି। ଏଣେ ଏଥିପାଇଁ ଫ୍ଲାଏଓଭର ମରାମତି କାର୍ଯ୍ୟ ମଧ୍ୟ ବିଳମ୍ବ ହେବାରେ ଲାଗିଛି। ଏନେଇ ପୌର ପରିଷଦର ନିର୍ବାହୀ ଅଧିକାରୀ କୁଲଦୀପ କୁମାର ଙ୍କୁ ପଚାରିବାରୁ ଖୁବ ଶୀଘ୍ର ଏହି ସମସ୍ୟାର ସମାଧାନ ହେବ ବୋଲି କହିଛନ୍ତି ।