ପୁର୍ବତଟ ରେଳ ମହାପ୍ରବନ୍ଧକ ଙ୍କ ଗୁଣପୁର-ନୌପଡା ଲାଇନ୍ ପରିଦର୍ଶନ ; ମରାମତି କାର୍ଯ୍ୟ ର ତଦାରଖ କଲେ, ଲୋକଙ୍କ ଦାବି ଶୁଣିଲେ ..!
ଏଥର ସମ୍ଭାଳ ବ୍ୟୁରୋ (ଗୁଣପୁର)- ପୁର୍ବତଟ ରେଳପଥର ମହାପ୍ରବନ୍ଧକ ମନୋଜ ଶର୍ମା ଗୁରୁବାର ଗଜପତି ଜିଲ୍ଲା ର ପାରଳାଖେମୁଣ୍ଡି ଏବଂ ରାୟଗଡା ଜିଲ୍ଲା ର ଗୁଣପୁର ରେଳ ଷ୍ଟେସନ ପରିଦର୍ଶନ କରିବା ସହ ଷ୍ଟେସନ ପୁନଃନିର୍ମାଣ କାମ ତଦାରଖ କରିଛନ୍ତି । ତାଙ୍କ ସହ ୱାଲ୍ଟିୟର ଡିଭିଜନର ଡିଆରଏମ ସୌରଭ ପ୍ରସାଦ ଏବଂ ଅନ୍ୟ ବରିଷ୍ଠ ଅଧିକାରୀମାନେ ଉପସ୍ଥିତ ଥିଲେ । ଏହି ଅବସରରେ ସ୍ଥାନୀୟ ରେଳ ଅଧିକାରୀଙ୍କ ସହ ଏଠାକାର ସୁବିଧା ଅସୁବିଧା ସଂପର୍କରେ ଆଲୋଚନା କରିଥିଲେ । ଲୋକଙ୍କ ସହ ଭେଟି ବିଭିନ୍ନ ଦାବି ଶୁଣିଥିଲେ । ଆନ୍ଧ୍ର ଓଡ଼ିଶା ରେଳ ବ୍ଯବହାରିକ ସଂଘ ଓ ଗୁଣପୁର ନବ ନିର୍ମାଣ ସମିତି ପକ୍ଷରୁ ଦୁଇଟି ସ୍ମାରକପତ୍ର ଦିଆଯାଇ ଗୁଣପୁର ଠାରୁ ବିଶାଖାପାଟଣା ଯାଏଁ ଚାଲିଥିବା ପାସେଞ୍ଜର ଟ୍ରେନକୁ ବିଜୟବାଡା ଓ ଗୁଣ୍ଟୁରୁ ଜଙ୍ଗସନ୍ ଯାଏଁ ସଂପ୍ରସାରଣ କରିବା ସହ ହାଇଦ୍ରାବାଦ୍ ରୁ ଆସି ବିଶାଖାପାଟଣା ରେ ଦିନ ତମାମ ରହୁଥିବା ଗରୀବ ରଥକୁ ଗୁଣପୁର ଯାଏଁ ସଂପ୍ରସାରଣ କରିବାକୁ ଦାବି କରାଯାଇଥିଲା। ସେହିପରି କାଶୀନଗର ଓ ତେମ୍ବୁରୁ ରେ ଦୁଇଟି ଲୁପ୍ ଲାଇନ୍ ସହ ଏହି ଗୁଣପୁର ଓ ନୌପଡା ଲାଇନ୍ କରିବାକୁ ଦାବିରେ ଉଲ୍ଲେଖ କରାଯାଇଛି। ନୌପଡା ଗୁଣପୁର ମଧ୍ୟରେ ଲାଇନ୍ ମରାମତି କାର୍ଯ୍ୟ ଶିଘ୍ର ସାରି ସବୁ ଟ୍ରେନ ଚଳାଚଳ କରିବାକୁ ଦାବି କରାଯାଇଛି। ଗୁଣପୁର ଠାରେ ଦ୍ବିତୀୟ ପ୍ଲାଟଫର୍ମ କାର୍ଯ୍ଯ ତ୍ବରିତ ବେଗରେ ସାରି ଏକ ଫୁଟ୍ ଓଭର ବ୍ରିଜ୍ କରିବା ଆବଶ୍ୟକ ସମ୍ପର୍କରେ ମଧ୍ୟ ସ୍ଥାନୀୟ ଲୋକେ ଅଧିକାରୀ ଦ୍ବୟଙ୍କୁ ଜଣାଇଥିଲେ। ଗଜପତି ରାଜାଙ୍କ ଦ୍ବାରା ନିର୍ମିତ ଏହି ରେଳପଥ କୁ ଐତିହାସିକ ମାନ୍ଯତା ଦବାପାଇଁ ମଧ୍ୟ ଦାବି କରାଯାଇଥିଲା। ଏହି ଗସ୍ତବେଳେ ପାରଳାଖେମୁଣ୍ଡି ବିଧାୟକ କେ. ନାରାୟଣ ରାଓ ମହାପ୍ରବନ୍ଧକଙ୍କୁ ଭେଟି ଏହି ଲାଇନ୍ ରେ ହେଉଥିବା ସମସ୍ଯା ଗୁଡିକ ସମ୍ପର୍କରେ ଜଣାଇଥିଲେ। ସେହିପରି ଗୁଣପୁର ଠାରେ ରେଳ ବ୍ଯବହାରିକ ସଂଘର ଗଜେନ୍ଦ୍ର ପଣ୍ଡା ଓ ନବ ନିର୍ମାଣ ସମିତି ର ସଭାପତି ଅକ୍ଷୟ ଦାସ ଭେଟି ଆଲୋଚନା କରିଥିଲେ। ଲୋକଙ୍କ ସମସ୍ତ ଦାବି ଶୁଣିବା ପରେ ମହାପ୍ରବନ୍ଧକ ନିଜ ପ୍ରତିକ୍ରିୟାରେ କହିଛନ୍ତି ଯେ, ବର୍ତ୍ତମାନ ପାରଳାଖେମୁଣ୍ଡି ଓ ଗୁଣପୁର ରେଳ ଷ୍ଟେସନର ଉନ୍ନତିକରଣ କାମ ଜାରି ରହିଛି । ଏହାକୁ କିଭଳି ତୁରନ୍ତ ଶେଷ କରାଯିବ ସେଥିପ୍ରତି ପ୍ରାଥମିକତା ଦିଆଯାଉଛି । ଗୁଣପୁର-ନୌପଡା ମଧ୍ୟରେ ରେଳ ଲାଇନ ମରାମତି କାମ ମଧ୍ୟ ଜାରି ରହିଛି । ଏହା ସରିବା ପରେ ରେଳ ଚଳାଚଳ ସ୍ବାଭାବିକ ହୋଇପାରିବ । ସେହିପରି ନୂଆ ରେଳ ଚଳାଚଳ ନେଇ ବର୍ତ୍ତମାନ କୌଣସି ଯୋଜନା ନାହିଁ । ସମସ୍ତ କାମ କରିବା ପରେ ଏନେଇ ଚିନ୍ତା କରାଯିବ ବୋଲି ସେ କହିଛନ୍ତି ।