ଏଥର ସମ୍ଭାଳ ବ୍ୟୁରୋ (ଗୁଣପୁର) : ସ୍ଥାନୀୟ ଟାଉନ୍ ହଲ୍ ନିକଟ ସରକାରୀ ଜାଗାରେ ହେବ ନୂଆ ପୌର କାର୍ଯ୍ୟାଳୟ। ସହରରେ ମାଷ୍ଟର ଡ୍ରେନ୍ ନିର୍ମାଣ କରାଯିବ। ଭୂତେଶ୍ଵର ମନ୍ଦିର ନିକଟରେ ନୂଆ ଶ୍ମଶାନ ଘାଟ ନିର୍ମାଣ କରାଯିବ । ପାର୍ବତୀ ନଗରରେ ହେବ ନୂଆ ସ୍ମାର୍ଟ ପାର୍କ । ଆଜି ପୌର କାଉନସିଲ ବୈଠକରେ ଏଭଳି ନିଷ୍ପତ୍ତି ହୋଇଛି। ଯାହାର ଡିପିଆର୍ ପ୍ରସ୍ତୁତ କରିବା ଲାଗି ନିର୍ମାଣକାରୀ ସଂସ୍ଥାକୁ ଦାୟିତ୍ବ ଦିଆଯାଇଛି । ପୌର ଅଧ୍ୟକ୍ଷା ମମତା ଗୌଡଙ୍କ ଅଧ୍ୟକ୍ଷତାରେ ଆୟୋଜିତ ଏହି ବୈଠକରେ ଆରମ୍ଭରେ ୨୦୨୩ – ୨୪ର ଆୟବ୍ୟୟର ବିବରଣୀ ପାଠ କରାଯାଇଥିଲା। ଯେଉଁଥିରେ ବିଭିନ୍ନ ମାଧ୍ୟମରେ ୩୩ କୋଟି ୬୫ ଲକ୍ଷ ୬୫ ହଜାର ଟଙ୍କା ଆୟ ହୋଇଛି। ସେଥିରୁ ୩୧ କୋଟି ୪୪ ଲକ୍ଷ ୪୨ ହଜାର ଟଙ୍କା ଖର୍ଚ୍ଚ କରାଯାଇଥିବା ସୂଚନା ଦିଆଯିବା ପରେ ଏହାକୁ ପାରିତ କରାଯାଇଛି। ପରେ ସ୍ବୟଂ ଶାସନ ଦିବସ ପାଳନର ପ୍ରସ୍ତୁତି ସମ୍ପର୍କରେ ଆଲୋଚନା କରାଯାଇଥିଲା। ବିଶେଷକରି ଅତିଥିମାନଙ୍କୁ ନିମନ୍ତ୍ରଣ ଓ ବିଭିନ୍ନ ବର୍ଗର ପ୍ରତିଭାମାନଙ୍କୁ ସମ୍ମାନିତ କରିବା ସମ୍ପର୍କରେ ଆଲୋଚନା ହୋଇଥିଲା। ପୌର ପରିଷଦର ନୂଆ କାର୍ଯ୍ୟାଳୟ ନିର୍ମାଣ, ସହରରେ ମାଷ୍ଟର ଡ୍ରେନ୍ ନିର୍ମାଣ, ଭୁତେଶ୍ୱର ମନ୍ଦିର ନିକଟରେ ନୂଆ ଶ୍ମଶାନ ଘାଟ ନିର୍ମାଣ, ପାର୍ବତୀ ନଗରରେ ନୂଆ ସ୍ମାର୍ଟପାର୍କ ନିର୍ମାଣ ପାଇଁ ଆଲୋଚନା କରାଯାଇଥିଲା। ଏହାର ଡିପିଆର୍ ପ୍ରସ୍ତୁତ କରିବା ପାଇଁ ଏକ ନିର୍ମାଣକାରୀ ସଂସ୍ଥାକୁ ଦାୟିତ୍ବ ଦିଆଯାଇଥିଲା। ଏଥି ସହ ସହରର ଅନ୍ୟାନ୍ୟ ଉନ୍ନୟନମୂଳକ କାର୍ଯ୍ୟ ସମ୍ପର୍କରେ ବି ଆଲୋଚନା ହୋଇଥିଲା। ପୌର କାର୍ଯ୍ୟନିର୍ବାହୀ ଅଧିକାରୀ ଡ. ସତ୍ୟ ସମ୍ପୂର୍ଣ୍ଣା ରାଉତଙ୍କ ଆବାହ ନରେ ଆୟୋଜିତ ଏହି ବୈଠକରେ ଉପାଧ୍ୟକ୍ଷ ଶିବପ୍ରସାଦ ଗୌଡ଼, କାଉସିଲର ପ୍ରମୋଦ ଦାସଙ୍କ ସମେତ ବହୁ କାଉନସିଲର ଉପସ୍ଥିତ ଥିଲେ।
