ଅସରାଏ ବର୍ଷାରେ ଦାମୋଦର ବିହାରର ରାସ୍ତାଘାଟର ଅବସ୍ଥା ଶୋଚନୀୟ…!

!!! ଗଜପତି ରୁ ଜିଲ୍ଲା ପ୍ରତିନିଧି ସନ୍ତୋଷ କୁମାର ପାଟ୍ଟଜୋଶୀ ଙ୍କ ରିପୋର୍ଟ !!!

ଏଥର ସମ୍ଭାଳ (ପାରଳାଖେମୁଣ୍ଡି)- ପାରଳାଖେମୁଣ୍ଡି ସହରକୁ ଲାଗି ଗଢି ଉଠିଥିବା ଦାମୋଦର ବିହାର ବାସୀ ହନ୍ତସନ୍ତ। ଅସରାଏ ବର୍ଷାରେ ରାସ୍ତାଘାଟର ଅବସ୍ଥା ଶୋଚନୀୟ ହୋଇପଡ଼ିଛି। ଗାଡି କଥା ଛାଡ଼ନ୍ତୁ ଏଠି ଚାଲିଚାଲି ଯିବା ମଧ୍ୟ ସମ୍ଭବ ନୁହେଁ। ଆଣ୍ଠୁଏ ନର୍ଦ୍ଦମା ପାଣିରେ ସ୍ଥାନୀୟ ବାସିନ୍ଦାମାନଙ୍କୁ ବିଭିନ୍ନ କାର୍ଯ୍ୟରେ ତଥା ଛାତ୍ରଛାତ୍ରୀମାନଙ୍କୁ ବିଦ୍ୟାଳୟକୁ ଯିବାକୁ ପଡୁଛି। ସହରକୁ ଲାଗି ରହିଥିବା ଏହି ଅଞ୍ଚଳ ଆଜି ସରକାରଙ୍କର ବୈମାତୃକ ମନୋଭାବ ଯୋଗୁଁ ଘୋର ଅବହେଳାର ଶିକାର ହୋଇଛି। ନା ପୌରପରିଷଦ ନା ପଞ୍ଚାୟତ କେହି ଏହାର ଉନ୍ନତି ନିମନ୍ତେ ଚେଷ୍ଟା କରୁନାହାନ୍ତି। କିଛିଦିନ ତଳେ କେରାଣ୍ଡି ପଞ୍ଚାୟତ ପକ୍ଷରୁ ରାସ୍ତାରେ କିଛି ମୋରମ ପକାଇ ନିଜର କର୍ତ୍ତବ୍ୟ ସାରିଦେଇଛନ୍ତି। ସେହିପରି ପଞ୍ଚାୟତ ପକ୍ଷରୁ ସିମେଣ୍ଟ ରାସ୍ତାଟିଏ ହୋଇଥିଲେ ମଧ୍ଯ ରାସ୍ତା ଖାଲଢିପ ହୋଇଥିବା ଯୋଗୁଁ ଅଳ୍ପ ବର୍ଷାରେ ପାଣି ଓ ଆବର୍ଜନା ଜମି ଅସ୍ବାସ୍ଥ୍ୟକର ପରିବେଶ ସୃଷ୍ଟି ହେଉଛି। ଏଠାରେ ମଶା , ମାଛିଙ୍କ ଦ୍ବାରା ବର୍ଷାଦିନିଆ ରୋଗ ବ୍ଯାପିବାର ଭୟ ରହିଛି। ଏଣୁ ଦାମୋଦର ବିହାର ବାସୀ ଏହି ଅଞ୍ଚଳର ରାସ୍ତାଘାଟର ଉନ୍ନତି କରଣ , ରାସ୍ତା ଆଲୋକୀକରଣ , ବର୍ଜ୍ୟ ବସ୍ତୁ ଓ ମଇଳା ପାଣି ନିଷ୍କାସନ ଦିଗରେ ଦୃଷ୍ଟି ଦେବାପାଇଁ ପ୍ରଶାସନକୁ ଅନୁରୋଧ କରିଛନ୍ତି।