ଏଥର ସମ୍ଭାଳ ବ୍ୟୁରୋ (ଗୁଣପୁର): ରାୟଗଡା ଜିଲାର ଡାକ୍ତର ସମସ୍ୟା ସହ ମୂଖ୍ୟତଃ ଗୁଣପୁର ଉପଖଣ୍ଡ ଡାକ୍ତରଖାନାର ଖାଲିଥିବା ଭେଷଜ ଓ ଶିଶୁ ବିଶେଷଜ୍ଞ ଡାକ୍ତର ପଦବୀ ପୂରଣ, ଗୁମୁଡ଼ା ନ୍ୟୁ ପିଏଚସି ସ୍ଥାପନ ,ପୁଟାସିଂ ,ରଘୁବାରୀ , ଦିଡିମିରିଗୁଡା, ପାରଶାଳୀରେ ହେଲଥ ବେଲନେସ ସେଣ୍ଟର ସ୍ଥାପନ ଉପରେ ଆଜି ସଚିବାଳୟରେ ସ୍ବାସ୍ଥ୍ୟ ସଚିବ ଶାଳିନୀ ପଣ୍ଡିତଙ୍କ ସହ ବିଜୁ ସ୍ବାସ୍ଥ୍ୟ କଲ୍ୟାଣ ଯୋଜନା ଉପଦେଷ୍ଟା ତଥା ରାୟଗଡା ଜିଲା ବିଜେଡି ସଭାପତି ସୁଧିର କୁମାର ଦାଶ,ଗୁଣପୁର ବିଧାୟକ ରଘୁନାଥ ଗମାଙ୍ଗ, ରାୟଗଡା ବିଧାୟକ ମକରନ୍ଦ ମୁଦୁଳି ପୁଙ୍ଖାନୁପୁଙ୍ଖ ଭାବେ ଆଲୋଚନା କରିବା ସହ ଲିଖିତ ଜଣାଇଥିଲେ। ଆଗାମୀ ସେପ୍ଟେମ୍ବର ସୁଦ୍ଧା ଗୁଣପୁର ହାସପାତଳର ଡାକ୍ତର ସମସ୍ୟାର ସମାଧାନ ସହ ଅନ୍ୟାନ୍ୟ ପ୍ରସଙ୍ଗ ଉପରେ ଗୁରୁତ୍ୱ ଦିଆଯିବ ବୋଲି ସ୍ଵାସ୍ଥ୍ୟ ସଚିବ ପ୍ରତିଶ୍ରୁତି ଦେଇଛନ୍ତି।ଗୁଣପୁର ଠାରେ ୧୯ କୋଟି ଏବଂ କାଶିପୁର ଠାରେ ୯ କୋଟି ଟଙ୍କା ବ୍ୟୟରେ ନିର୍ମିତ ହେବାକୁ ଥିବା କୋଠା ପାଇଁ ଯଥାଶୀଘ୍ର ଟେଣ୍ଡର ଆହ୍ବାନ କରିବାକୁ ମଧ୍ୟ ଏହି ପ୍ରତିନିଧିଦଳ ସଚିବଙ୍କୁ ଅନୁରୋଧ କରିଥିବା ଜଣାପଡିଛି ।
ସ୍ବାସ୍ଥ୍ୟ ସଚିବଙ୍କୁ ଭେଟିଲେ ଦୁଇ ବିଧାୟକ ଓ ଜିଲ୍ଲା ବିଜେଡ଼ି ସଭାପତି ।
