ରାମନାଗୁଡା ର ଛାତ୍ରୀ ରାଜ୍ୟରେ ପ୍ରଥମ…!

ଏଥର ସମ୍ଭାଳ ବ୍ୟୁରୋ (ଭୁବନେଶ୍ୱର)- ଓଡ଼ିଶା ସରକାରଙ୍କର ଉଚ୍ଚ ମାଧ୍ୟମିକ ଶିକ୍ଷା ବିଭାଗ ପକ୍ଷରୁ ରାଜ୍ୟ ସ୍ତରୀୟ ହାକାଥନ ଓଡ଼ିଶାପ୍ରେନ୍ୟୁୟର ପ୍ରତିଯୋଗିତା ସ୍ଥାନୀୟ IIIT କଲେଜ ପରିସରରେ ତା ୧୬ ଏବଂ ୧୭ ଫେବୃଆରୀ ଦୁଇଦିନ ଧରି ଅନୁଷ୍ଠିତ ହୋଇଯାଇଛି। ରାଜ୍ୟର ପ୍ରତ୍ୟେକ ଜିଲ୍ଲାରୁ ୯୭ ଟି ପ୍ରକଳ୍ପ ମନୋନୀତ ହୋଇ ରାଜ୍ୟ ସ୍ତରରେ ଅଂଶଗ୍ରହଣ କରିବା ପାଇଁ ଯୋଗ୍ୟ ବିବେଚିତ ହୋଇଥିଲେ। ଏହି ପ୍ରତିଯୋଗିତାରେ ଓଡ଼ିଶା ଆଦର୍ଶ ବିଦ୍ୟାଳୟ ରାମନାଗୁଡାର ଏକାଦଶ ଶ୍ରେଣୀର ଛାତ୍ରୀ ପାୟଲ ପ୍ରଧାନ ସମଗ୍ର ଓଡ଼ିଶାରେ ପ୍ରଥମ ସ୍ଥାନ ଅଧିକାର କରି ସମଗ୍ର ରାୟଗଡା ଜିଲ୍ଲା ପାଇଁ ଗୌରବ ଆଣିବା ସହିତ ଅତିଥି ମାନଙ୍କ ଗହଣରେ ଉଚ୍ଚ ପ୍ରଶଂସିତ ହୋଇପାରିଥିଲେ। ତାଙ୍କଦ୍ୱାରା ପ୍ରସ୍ତୁତ ମୋବାଇଲ ଆପ ‘ସାଥୀ’ SHG ମହିଳା ମାନଙ୍କୁ MDM ସମ୍ପର୍କିତ କାର୍ଯ୍ୟକଳାପରେ ସାହାଯ୍ୟ କରି ସେମାନଙ୍କୁ ଅତ୍ୟଧିକ କାର୍ଯ୍ୟ ଚାପରୁ ମୁକ୍ତି ଦେବାର ପ୍ରୟାସ କରୁଥିବା ପାୟଲ ବର୍ଣନା କରିଛନ୍ତି । ଏହି ସଫଳତା ପାଇଁ ଛାତ୍ରୀ ପାୟଲ ପ୍ରଧାନ ଏବଂ ମାର୍ଗ ଦର୍ଶକ ଶିକ୍ଷକ ଶ୍ରୀ ଆଶୁତୋଷ ପାତ୍ରଙ୍କୁ ବିଦ୍ୟାଳୟ ଅଧ୍ୟକ୍ଷ ଶ୍ରୀ ସିଲଭେସ୍ତର ସୋରେଙ୍ଗ ଏବଂ ଅନ୍ୟ ସମସ୍ତ ଶିକ୍ଷକ ଶିକ୍ଷୟିତ୍ରୀ ଶୁଭେଚ୍ଛା ଏବଂ ଅଭିନନ୍ଦନ ଜଣାଇଛନ୍ତି। ରାଜ୍ୟ ସ୍ତରରେ ପ୍ରଥମ ସ୍ଥାନ ଅଧିକାର କରିଥିବାରୁ ପୁରସ୍କାର ସ୍ୱରୂପ ନଗଦ ପଚାଶ ହଜାର ଟଙ୍କା ଏବଂ ଟ୍ରଫି ପ୍ରଦାନ କରାଯାଇଛି। ପାୟଲ ଭବିଷ୍ୟତ ରେ ଜଣେ ଵୈଜ୍ଞାନିକ ହେବାର ଲକ୍ଷ ରଖିଥିବା ପ୍ରକାଶ କରିଛନ୍ତି।