କାର୍ଯ୍ୟ ନିର୍ବାହୀ ଅଧିକାରୀ ଙ୍କ ଡିଜିଟାଲ ଦସ୍ତଖତ ଟ୍ରେଜେରି କୁ ଯିବ କେବେ ?

ଏଥର ସମ୍ଭାଳ ବ୍ୟୁରୋ (ଗୁଣପୁର) : ଗୁଣପୁର ପୌର ପରିଷଦର ସ୍ଥାୟୀ କର୍ଯ୍ୟ ନିର୍ବାହୀ ଅଧିକାରୀ ପ୍ରସୂତି ଅବକାଶ ନେଇ ଯିବା ପରେ ସେ ପୁଣି କାର୍ଯ୍ୟରେ ଯୋଗ ଦେବା ପର୍ଯ୍ୟନ୍ତ ରାମନାଗୁଡା ବିଡ଼ିଓ ଏହାର ଦାୟିତ୍ବରେ ରହିବା ନିମନ୍ତେ ରାଜ୍ୟସରକାର ଙ୍କ ପକ୍ଷରୁ ସାମୟିକ ଦାୟୀତ୍ବ ଅର୍ପଣ କରାଯାଇଛି।ଏହି ଦାୟିତ୍ବରେ ଥିବା ସୁଶ୍ରୀ ପ୍ରଭାତୀ ଝୋଡ଼ିଆ ଙ୍କ ଡିଜିଟାଲ ସ୍ୱାକ୍ଷର ଟ୍ରେଜେରିକୁ ଯାଇନଥିବାରୁ ପୌର ପରିଷଦର କର୍ମଚାରୀମାନେ ଗତ ଜାନୁୟାରୀ ମାସର ଦରମା ଏଯାବତ୍ ପାଇନଥିବା ସହ ପୂଜା ଅଗ୍ରୀମ ଏବଂ ପେନସନ ମଧ୍ୟ ପାଇନଥିବା ଅଭିଯୋଗ ହେଉଛି।ଏପରିକି ସାନିଟେସନ୍ ବାବଦ ର ବିଲ ଓ ନିର୍ମାଣଧିନ ପ୍ରକଳ୍ପ ର ବିଲ ଗୁଡ଼ିକ ଅଟକି ରହିଛି।ଯଦ୍ୱାରା କାମ ଶେଷ କରି ବସିଥିବା ମହିଳା ସଂଘ ମାନେ ସେମାନଙ୍କ ପ୍ରକଳ୍ପ କାର୍ଯ୍ୟରେ ଖଟାଇ ଥିବା ଟଙ୍କା ନପାଇ ନିରାଶ ହେବାକୁ ପଡ଼ିଛି।ଏମିତିକି କିଛି ମହିଳା ସଂଘ ସେମାନଙ୍କୁ ମେଳିଥିବା କାମ ଶେଷ କରିବା ନିମନ୍ତେ ବାହାରୁ ଚଢ଼ା ସୁଧରେ ଟଙ୍କା ଆଣି କାମ ସାରିଛନ୍ତି ।କିନ୍ତୁ ଏଯାବତ ବିଲ ହୋଇନଥିବାରୁ ସୁଧ ବାବଦରେ ଅଧିକ ଟଙ୍କା ଦେବାକୁ ପଡୁଛି ବୋଲି ଅସନ୍ତୋଷ ବ୍ୟକ୍ତ କରୁଛନ୍ତି । ଏହାକୁ ଇଙ୍ଗିତ କରି ସମାଲୋଚକ କହିଲେଣି, ‘ ଆଇ ଘୋରିବା ଚନ୍ଦନ ଅଜା ମୁଣ୍ଡକୁ ସମାନ “। ନୂତନ ପ୍ରକଳ୍ପ ନିମନ୍ତେ ଆସିଥିବା ଅର୍ଥ ମଧ୍ୟ ଖର୍ଚ୍ଚ କରାଯାଇ ପାରୁନି । ଫଳରେ ସାଧାରଣରେ ଅସନ୍ତୋଷ ବୃଦ୍ଧି ପାଉଛି।ଜିଲ୍ଲାପାଳ ଏହି ସମସ୍ୟା ଗୁଡ଼ିକ ପ୍ରତି ଦୃଷ୍ଟିଦେଇ ତୁରନ୍ତ ସୁଶ୍ରୀ ଝୋଡ଼ିଆ ଙ୍କ ଡିଜିଟାଲ ଦସ୍ତଖତ ଟ୍ରେଜେରିରେ ପହଞ୍ଚାଇବା ଦିଗରେ ନିର୍ଦ୍ଦେଶ ଦେଇ ସମସ୍ୟା ଦୂର କରିବା ନିମନ୍ତେ ଦାବୀ ହେଉଛି । ସୁଶ୍ରୀ ଝୋଡ଼ିଆ ରାୟଗଡ ଜିଲ୍ଲା ବିଜେଡି ନେତାଙ୍କ ହତବରିଶି ସାଜି ଥିବାରୁ ତାଙ୍କୁ ଗୋଟେପରେ ଗୋଟେ ଦାୟୀତ୍ବ ଲଦି ଦିଆଯାଉଛି ବୋଲି ଜନ ମତ ପ୍ରକାଶ ପାଉଛି । ସୁଶ୍ରୀ ଝୋଡ଼ିଆ ନିଯୁକ୍ତି ପାଇଥିବା ଗୋଷ୍ଠୀ ଅଧିକାରୀ ପଦବୀ ରେ ଯେତିକି ପରିମାଣର ଦାୟିତ୍ଵ ଓ କାର୍ଯ୍ୟ ଚାପ ବର୍ତ୍ତମାନ ଦାୟିତ୍ବରେ ରହିଥିବା ଅନ୍ୟ ପଦବୀ ଗୁଡିକରେ ସେତିକି । ସେ ରମନାଗୁଡା ଠାରେ ରହି କିଭଳି ଗୁଣପୁରର ଏହି ଦୁଇଟି ଦାୟୀତ୍ବ କୁ ତୁଲାଇବେ ବୋଲି ପ୍ରଶ୍ନ ଉଠୁଛି । କେବଳ ସାନ ଗୌଦଙ୍କ ଅକ୍ତିଆର ରେ ରହୁଥିବା ପୌର ପରିଷଦ ଏବଂ ଗୁଣପୁର ସମିତି ରେ ପ୍ରକଳ୍ପ କାର୍ଯ୍ୟ ତଦାରଖ କରିବା ବାହାନାରେ ସମସ୍ତ ଉନ୍ନୟନ ମୂଳକ କାର୍ଯ୍ୟ କୁ ଅଟକାଇ ସାନ ଭାଇନାଙ୍କୁ ସାଧାରଣରେ ହଟହଟା କରିବା ନେଇ ଜିଲ୍ଲା ବିଜେଡ଼ି କର୍ମକର୍ତ୍ତାଙ୍କର ଏହାଏକ ଚାଲ୍ ବୋଲି ଚର୍ଚ୍ଚା ଜୋର ଧରିଛି । ଦେଖିବାକୁ ରହିଲା ସୁଶ୍ରୀ ଝୋଡ଼ିଆ ଏସବୁକୁ କେମିତି ତୁଲାଉଛନ୍ତି ।