ଏଥର ସମ୍ଭାଳ ବ୍ୟୁରୋ (ଗୁଣପୁର) – ଗୁଣପୁର ତହସିଲ କାର୍ଯ୍ୟାଳୟ ରେ ଅପାରଗ କର୍ମଚାରୀ ଓ କଠୋର ପ୍ରଶାସନିକ ବ୍ୟବସ୍ଥା ନଥିବା ଯୋଗୁଁ ଗୁଣପୁର ତହସିଲ କାର୍ଯ୍ୟାଳୟ ରେ କୌଣସି ଜନସାଧାରଣ ଙ୍କ ସରକାରୀ କାର୍ଯ୍ୟ ହୋଇ ପାରୁ ନାହିଁ। କେବେ ଲିଙ୍କ ନାହିଁ ତ କେବେ ସର୍ଭର ଡାଉନ , କେବେ ବାବୁ ଛୁଟିରେ ଯାଇଛନ୍ତି ତ କେବେ ବାବୁ ଟ୍ରେନିଂ ରେ ଅଛନ୍ତି, କେବେ ବାବୁ ତିତିଲି ସର୍ଭେ କରୁଛନ୍ତି ତ କେବେ ଇଲେକ୍ସନ ଓ ସରକାରୀ ଡ଼ିମାର୍କେଷନ ରେ ଅଛନ୍ତି।
ଏଭଳି ଦିନକୁ ଗୋଟିଏ ବାହାନା ରେ ସାଧାରଣ ଜନତାଙ୍କ କାମ ବର୍ଷ ବର୍ଷ ସଂଖ୍ୟା ଧରି ପଡ଼ିରହୁଛି । ମ୍ୟୁଟେସନ କେସ ଗୁଡିକ 2017 ରୁ ଅଟକି ରହିଥିବା ବେଳେ ବେକ ଲୋଗ ଏଣ୍ଟ୍ରି ନାମରେ ଜନସାଧାରଣଙ୍କ ଘର ଓ ଘର ନକଲ, ଜମି ପଟା ଇତ୍ୟାଦି ନ ମିଳି ବ୍ୟାଙ୍କ ଲୋନ, ଟାଉନ ପ୍ଲାନ ଏପରୁଭାଲ ରୁ ଜନସାଧାରଣ ବଂଚିତ ହେଉଛନ୍ତି।
କର୍ମଚାରୀ ଓ ଆର ଆଇ ମାନଙ୍କ ଖାମଖିଆଲି ନୀତି ଯୋଗୁଁ ସାଧାରଣ ଜନତା ଓ ଅନେକ ଅନୁଷ୍ଠାନ ଗୁଡିକ ଜମି ଚିହ୍ନଟିକରଣ ପ୍ରକ୍ରିୟା ରୁ ବଂଚିତ ହେଉଛନ୍ତି ।
କାମ୍ପଗୁଡା ମୌଜା, ବେବର୍ତା ଢେପ ମୌଜା ମାନଙ୍କ ରେ ନାମ ମାତ୍ରକୁ ସର୍ଭେ କରି ତହସିଲ କର୍ମଚାରୀ ମାନେ ଅବହେଳା ରେ ଫାଇଲ ପକାଇ ରଖିଥିବା କାରଣରୁ ଘର ଡ଼ିହ ପଟା ନପାଇ ବିଜୁ ପକା ଘର, ପ୍ରଧାନମନ୍ତ୍ରୀ ଆବାସ ଯୋଜନାରୁ ବଂଚିତ ହେଉଛନ୍ତି ଜନସାଧାରଣ।
ଜାତି ପ୍ରମାଣ ପତ୍ର, ଆବାସ ପ୍ରମାଣ ପତ୍ର ଇତ୍ୟାଦି ରେ ଘୋର ବିଳମ୍ବ ଓ ତହସିଲ କର୍ମଚାରୀ ମାନଙ୍କର ବେପରୁଆ ମନୋଭାବ ଯୋଗୁଁ ପ୍ରବଳ ଲାଞ୍ଚ କାରବାର ହେଉଅଛି ।
ସେ ଭଳି ଗୁଣପୁର ଆର ଆଇ ଙ୍କୁ ସଂଖ୍ୟାଧିକ କେସ ରହିଥିବା ଯୋଗୁଁ ସେଠାରେ ସମସ୍ତ କାର୍ଯ୍ୟ କେବଳ ଭଗବାନ ଭରସା ରେ ଚାଲିଛି। ଅନ୍ୟପକ୍ଷରେ ଦେବୋତ୍ତର ବିଭାଗ କାର୍ଯ୍ୟ ମଧ୍ୟ ଗୁଣପୁର ଆର ଆଇ ଙ୍କ ହାତରେ ଥିବା ଯୋଗୁଁ ତାଙ୍କ ଅତ୍ୟଧିକ କାର୍ଯ୍ୟଭାର କାରଣ ରୁ ପୂଜକ ମାନେ ସେମାନଙ୍କ ପ୍ରାପ୍ୟ ନପାଇ ପାରିବା ବେଳେ ଦେବୋତ୍ତର ର ସମ୍ପତ୍ତି ଗୁଡିକୁ ଲିଜରୁ ସବ ଲିଜ କୁ ଦେଇ ଦଲାଲ ମାଲାମାଲ ହେଉଛନ୍ତି ।
ଓଡିଶା ସରକାର ଙ୍କ ସିଟିଜେନ ଚାରଟେର ପ୍ରକାରେ ନିର୍ଧାରିତ ଅବଧି ଭିତରେ ସରକାରୀ କାର୍ଯ୍ୟ ହେବାକୁ ନିୟମ ଥିଲେ ମଧ୍ଯ ଏଠାରେ କିନ୍ତୁ ଏହା ପ୍ରହସନ ପାଲଟିଛି । ଏହି ସମସ୍ତ ବିଷୟରେ କୋଠର କାର୍ଯ୍ୟାନୁଷ୍ଠାନ ଗ୍ରହଣ କରିବା ନିମନ୍ତେ ଦାବୀ କରି ଆଜି ଗୁଣପୁର ଉନ୍ନୟନ ଯୁବ ସଂଗଠନ ତରଫରୁ କାର୍ଯ୍ୟକର୍ତ୍ତା ମାନେ ମିଶି ତହସିଲଦାର ଙ୍କ ସହ ଆଲୋଚନା କରିବା ସହ ତୁରନ୍ତ ପଦକ୍ଷେପ ନେବା ନିମନ୍ତେ ଆର ଡ଼ି ସି ବ୍ରହ୍ମପୁର ଓ ଜିଲ୍ଲାପାଳ ରାୟଗଡ଼ା ଙ୍କୁ ଲିଖିତ ଆକାରରେ ଜଣା କରିଛନ୍ତି ।
