ଏଥର ସମ୍ଭାଳ ବ୍ୟୁରୋ(ପାଟନା)- ବିଜେପି ଠାରୁ ଅଲଗା ହେବା ପରେ ନୀତୀଶ କୁମାର ଆରଜେଡିକୁ ସାଥୀ କରି ବିହାରରେ ୮ମ ଥର ପାଇଁ ମୁଖ୍ୟମନ୍ତ୍ରୀ ଭାବେ ଶପଥ ନେଇଛନ୍ତି। ଜେଡିୟୁ ତୁଳନାରେ ଆରଜେଡିର ବିଧାୟକଙ୍କ ସଂଖ୍ୟା ପ୍ରାୟ ଦୁଇ ଗୁଣ ଅଧିକ। ତଥାପି ନୀତୀଶ କୁମାର ମୁଖ୍ୟମନ୍ତ୍ରୀ ଓ ଆରଜେଡିର ତେଜସ୍ୱୀ ଯାଦବ ଉପ ମୁଖ୍ୟମନ୍ତ୍ରୀ ପଦ ପାଇଛନ୍ତି। ଏହି ରାଜନୀତିକ ହଟଚମଟ ଭିତରେ କିଏ ବେଶୀ ଲାଭରେ ରହିଲା? ଆରଜେଡି ନା ଜେଡିୟୁ? ସେହିପରି କାହାର ଲୋକପ୍ରିୟତା ବିହାରରେ ଅଧିକ ରହିଛି? ଏହି ପ୍ରଶ୍ନର ଉତ୍ତର ଜାଣିବା ପାଇଁ ସି-ଭୋଟର ପକ୍ଷରୁ ଗୋଟିଏ ସର୍ଭେ କରାଯାଇଛି। ଏହି ସର୍ଭେରୁ ସ୍ପଷ୍ଟ ହୋଇଛି ଯେ ବିହାରରେ ତେଜସ୍ୱୀ ଯାଦବଙ୍କ ଲୋକପ୍ରିୟତା ନୀତୀଶ କୁମାରଙ୍କ ଠାରୁ ଅଧିକ। ଅଧିକାଂଶ ଲୋକ ତେଜସ୍ୱୀଙ୍କୁ ହିଁ ମୁଖ୍ୟମନ୍ତ୍ରୀ ଭାବେ ଦେଖିବାକୁ ଚାହାନ୍ତି। ସେହିପରି ବିଜେପି ଏମାନଙ୍କ ଠାରୁ ମୁଖ୍ୟମନ୍ତ୍ରୀ ରେସ୍ରେ ଯଥେଷ୍ଟ ପଛରେ ରହିଛି। ସି-ଭୋଟର ସର୍ଭେ ଅନୁସାରେ, ରାଜ୍ୟର ୪୩% ଲୋକ ତେଜସ୍ୱୀ ଯାଦବଙ୍କୁ ମୁଖ୍ୟମନ୍ତ୍ରୀ ଭାବେ ଦେଖିବାକୁ ଚାହାନ୍ତି। ମାତ୍ର ୨୪% ଲୋକ ନୀତୀଶ କୁମାରଙ୍କୁ ସେମାନଙ୍କ ପ୍ରଥମ ପସନ୍ଦର ମୁଖ୍ୟମନ୍ତ୍ରୀ ଭାବେ ବାଛିଛନ୍ତି। ଏହି ରେସ୍ରେ ବିଜେପି ୧୯% ଜନମତ ପାଇଛି। ତେଜସ୍ୱୀ ଯାଦବଙ୍କ ଲୋକପ୍ରିୟତା ବଢ଼ିବା ଓ ନୀତୀଶ କୁମାରଙ୍କ ଲୋକପ୍ରିୟତା ହ୍ରାସ ପାଇବା, ଜେଡିୟୁ ମୁଣ୍ଡବିନ୍ଧାର କାରଣ ପାଲଟିଛି। ସର୍ଭେ ବେଳେ ଜଣାପଡ଼ିଛି ଯେ ସମାଜର ପ୍ରତିଟି ବର୍ଗର ଲୋକମାନଙ୍କ ମଧ୍ୟରେ ତେଜସ୍ୱୀ ଯାଦବଙ୍କ ଲୋକପ୍ରିୟତା ବୃଦ୍ଧି ପାଇଛି। ରାଜ୍ୟର ୪୧.୮% ପୁରୁଷ ଭୋଟର ତେଜସ୍ୱୀଙ୍କୁ ମୁଖ୍ୟମନ୍ତ୍ରୀ ଭାବେ ଦେଖିବାକୁ ଚାହୁଁଥିବା ବେଳେ ୨୩.୮% ପୁରୁଷ ନୀତୀଶ କୁମାର ଓ ୧୯.୬% ବିଜେପିର ମୁଖ୍ୟମନ୍ତ୍ରୀ ରାଜ୍ୟରେ ଚାହୁଁଛନ୍ତି। ୨୦୨୦ରେ ନୀତୀଶ କୁମାରଙ୍କ ଲୋକପ୍ରିୟତା ମହିଳାମାନଙ୍କ ମଧ୍ୟରେ ଯଥେଷ୍ଟ ଅଧିକ ଥିଲା। ହେଲେ ସେମାନେ ମଧ୍ୟ ଏବେ ନୀତୀଶ କୁମାରଙ୍କ ଠାରୁ ମୁହଁ ଫେରାଇ ନେଲେଣି। ରାଜ୍ୟର ୪୪% ମହିଳା ତେଜସ୍ୱୀଙ୍କୁ ସେମାନଙ୍କ ପ୍ରଥମ ପସନ୍ଦର ମୁଖ୍ୟମନ୍ତ୍ରୀ ଭାବେ ଦେଖିବାକୁ ମତ ରଖିଛନ୍ତି। ଏ କ୍ଷେତ୍ରରେ ନୀତୀଶ କୁମାରଙ୍କୁ ୨୩.୩ ମହିଳା ଭୋଟର ସମର୍ଥନ କରିଛନ୍ତି। ବିଜେପି ପୁଣିଥରେ ତୃତୀୟରେ ରହିଛି। ବିହାରର ୧୭.୫% ମହିଳା ବିଜେପିର ମୁଖ୍ୟମନ୍ତ୍ରୀ ରାଜ୍ୟରେ ରୁହନ୍ତୁ ବୋଲି ମତ ଦେଇଛନ୍ତି। ଯଦି ଆପଣ ଜାତିଭିତ୍ତିକ ଲୋକପ୍ରିୟତାକୁ ବିଚାର କରିବେ ଏଠାରେ ମଧ୍ୟ ତେଜସ୍ୱୀ ଠାରୁ ନୀତୀଶ କୁମାର ପଛରେ ରହିଛନ୍ତି। ଓବିସି ବର୍ଗରେ ୪୪.୬% ଲୋକ ତେଜସ୍ୱୀଙ୍କୁ ସମର୍ଥନ କରିଥିବା ବେଳେ ନୀତୀଶ କୁମାରଙ୍କ ସପକ୍ଷରେ ୨୪.୭% ଲୋକ ରହିଛନ୍ତି। ବିଜେପି ଭାଗରେ ୧୨.୪% ଓବିସି ଲୋକଙ୍କ ସମର୍ଥନ ରହିଛି। ମୁସଲିମ ସଂପ୍ରଦାୟର ୫୪% ଲୋକ ତେଜସ୍ୱୀଙ୍କୁ ଓ ୩୦% ଲୋକ ନୀତୀଶ କୁମାରଙ୍କୁ ମୁଖ୍ୟମନ୍ତ୍ରୀ ଭାବେ ଦେଖିବାକୁ ଚାହୁଁଛନ୍ତି। କେବଳ ୩.୩% ମୁସଲିମ ଭୋଟର ବିଜେପି ସପକ୍ଷରେ ରହିଛନ୍ତି।
