!!! ଗୁଣପୁର ଉପଖଣ୍ଡ ପ୍ରତିନିଧି ବାସନ୍ତୀ କୁମାରୀ ପାଟ୍ଟଜୋଶୀ ଙ୍କ ରିପୋର୍ଟ !!!
ଏଥର ସମ୍ଭାଳ ବ୍ୟୁରୋ (ଗୁଣପୁର) – ଗୁଣପୁର ଠାରେ ଲଘୁଚାପ ପ୍ରଭାବ ରୁ ଗତ ଦୁଇ ଦିନ ହେବ ଲଗାଣ ବର୍ଷା ଜାରି ରହିଛି । ଆଜି ରାୟଗଡା ଜିଲ୍ଲା ପାଇଁ ପାଣିପାଗ ବିଭାଗ ପକ୍ଷରୁ ରେଡ଼ ଆଲର୍ଟ ଜାରି କରାଯାଇଥିବା ବେଳେ ଗତ କାଲି ଠାରୁ ଗୁଣପୁର ଅଞ୍ଚଳ ରେ ତୁହାକୁ ତୁହା ବର୍ଷା ପଡୁଛି । ଏହାର ପ୍ରଭାବ ରେ ଗୁଣପୁର ର ଜୀବନଧାରା କୁହାଯାଉଥିବା ବଂଶଧାରା ନଦୀ ର ଜଳସ୍ଥର ଧୀରେ ଧୀରେ ବଢ଼ିବାରେ ଲାଗିଛି । ବର୍ତ୍ତମାନ ସତର୍କ ସଙ୍କେତ ଠାରୁ ଅଳ୍ପ ଦୂର ରେ ପ୍ରବାହିତ ହେଉଛି ନଦୀ ଜଳ । ଏଠାରେ ବିପଦ ସଙ୍କେତ ୮୪ ମିଟର , ସତର୍କ ସଙ୍କେତ ୮୩ ମିଟର ଥିବା ବେଳେ ବର୍ତ୍ତମାନ ସୁଦ୍ଧା ଜଳ ସ୍ଥର ୮୨.୧୫ ମିଟର ନିକଟ ରେ ରହିଛି । ଯଦି ଏହି ପରି ଭାବେ ଉପର ମୁଣ୍ଡ ରେ ଲଗାଣ ବର୍ଷା ଜାରି ରହେ ତେବେ ଆସନ୍ତା କାଲି ବେଳେକୁ ନଦୀ ଜଳ ସତର୍କ ସଙ୍କେତ ଛୁଇଁବା ଅନୁମାନ କରାଯାଉଛି । ବର୍ତ୍ତମାନ ବର୍ଷା ର ପରିମାଣ ୫୫.୮ ମିଲି ମିଟର ରହିଥିବା ବେଳେ ତାହାର କ୍ରମବର୍ଦ୍ଧନଶୀଳ ପରିମାଣ ୭୧୪ ମିଲି ମିଟର ରହିଛି । ଏହାକୁ ନଜର ରେ ରଖି ବଂଶଧାରା ନଦୀ ର ସମସ୍ତ ଉପକୂଳ ବର୍ତ୍ତି ଅଞ୍ଚଳ ର ତହସିଲଦାର ଓ ବିଡ଼ିଓ ମାନଙ୍କୁ ସତର୍କ ରହିବାକୁ ରାୟଗଡା ଜିଲ୍ଲାପାଳ କହିଥିବା ସୂଚନା ମିଳିଛି । ଲଗାଣ ବର୍ଷା ଫଳ ରେ ପଦ୍ମପୁର ବ୍ଲକ ର ବହୁ ଚାଷ ଜମି ଜଳମଗ୍ନ ରହିଥିବା ବେଳେ ଗୁଣପୁର ବ୍ଲକ ଟଲଣା ପଞ୍ଚାୟତ ର ତର୍ଗିସିଂ ରେ ମାଟି ଅତଡା ଧସି ଦୁଇ ଗୋଟି ଘର ଭାଙ୍ଗି ଯାଇଛି ।
