ଏଥର ସମ୍ଭାଳ ବ୍ୟୁରୋ(ଭୁବନେଶ୍ୱର)- ସ୍ମାର୍ଟ ସ୍କୁଲ୍ ସାମ୍ନାରେ ଡମ୍ପିଂୟାର୍ଡ। ଗଦା ହୋଇଛି କୁଢ଼ କୁଢ଼ ଆବର୍ଜନା। କନ୍ଧମାଳ ଜିଲ୍ଲା ରାଇକିଆ ବିଜୟ ହାଇସ୍କୁଲ ଆଗରେ ଦେଖିବାକୁ ମିଳିଛି ଏଭଳି ଚିତ୍ର, ଯାହା ସରକାରଙ୍କ ସ୍କୁଲ ରୂପାନ୍ତରିକରଣ ମିଶନକୁ ଲୋକ ଦେଖାଣିଆ ବୋଲି ପୁଣି ପ୍ରମାଣିତ କରିଛି। ସ୍କୁଲଟି ଖୁବ୍ ପୁରୁଣା। ଏଠାରେ ଷଷ୍ଠରୁ ୧୦ମ ଶ୍ରେଣୀ ପର୍ଯ୍ୟନ୍ତ ରହିଛି। ପ୍ରାୟ ୪୦୦ ପିଲା ପଢ଼ୁଛନ୍ତି। ସ୍ମାର୍ଟ ସ୍କୁଲ ଯୋଜନାରେ ଏହି ସ୍କୁଲକୁ ସ୍ୱଚ୍ଛ ଓ ସୁନ୍ଦର କରିବା ନିମନ୍ତେ ଖର୍ଚ୍ଚ ହୋଇଛି ୪୫ ଲକ୍ଷ ଟଙ୍କା। ସ୍କୁଲ ଭିତର ପରିବେଶ ଚକଚକ କରୁଛି। ସ୍ୱତନ୍ତ୍ର ଚଲାପଥ ସାଙ୍ଗକୁ ଉଦ୍ୟାନ, ବସିବା ନିମନ୍ତେ ଚେୟାର, ଷ୍ଟେନଲେସ୍ ଷ୍ଟିଲ୍ ଗେଟ୍ ଓ ଶ୍ରେଣୀଗୃହ ଗୁଡ଼ିକର ଉନ୍ନତିକରଣ କରାଯାଇଛି। କିନ୍ତୁ ସ୍କୁଲର ଭିତର ପରିବେଶ ଚିକ୍କଣ ହୋଇଥିବା ବେଳେ ବାହାରଟି ବେଶ୍ ଅପରିଷ୍କାର। ସ୍କୁଲ ସମ୍ମୁଖରେ ଅର୍ଥାତ୍ ମୁଖ୍ୟ ଫାଟକ ପାଖରେ ଗଦା ହୋଇଛି କୁଢ଼ କୁଢ଼ ଆବର୍ଜନା। ଆବର୍ଜନା ଗଦା ହେଉଥିବାରୁ ଏକ ଅସ୍ୱାସ୍ଥ୍ୟକର ପରିବେଶ ସୃଷ୍ଟି ହେଉଛି। ସବୁଦିନ ସେଠାରେ ବିଭିନ୍ନ ପ୍ରକାରର ଓଦା ଓ ଶୁଖିଲା ଆବର୍ଜନା ପଡ଼ୁଥିବାରୁ ଜାଗାଟି ସନ୍ତସନ୍ତିଆ ହୋଇ ରହୁଛି ଓ ଦୁର୍ଗନ୍ଧ ବାହାରୁଛି। ତା’ସହିତ ମଶା ଓ ମାଛି ହେଉଛନ୍ତି। ଏହି ମଶା,ମାଛି ସ୍କୁଲ୍ ପିଲାଙ୍କ ପାଇଁ ବିପଦ ହୋଇପାରନ୍ତି।ଅଭିଯୋଗ ଅନୁଯାୟୀ, ସ୍କୁଲ୍ ସାମ୍ନାରେ ସ୍ଥାନୀୟ ଦୋକାନୀମାନେ ଏହି ସବୁ ଆବର୍ଜନା ପକାନ୍ତି। ସ୍କୁଲ କର୍ତ୍ତୃପକ୍ଷ ଯେତେ ମନା କଲେ ବି ସେମାନେ ମାନୁ ନାହାନ୍ତି। ପ୍ରଧାନଶିକ୍ଷକ ନୀଳମଣି ମଣ୍ଡଳ କହିଛନ୍ତି, ସ୍ଥାନୀୟ ବଜାରର ଦୋକାନୀଙ୍କୁ ସ୍କୁଲ ଆଗରେ ଆବର୍ଜନା ନ ପକାଇବାକୁ ପୁଣି ନିବେଦନ କରାଯିବ। ସ୍କୁଲ ଆଗରେ ଏତେ ଅଳିଆ ଆବର୍ଜନା ଗଦା ହୋଇ ରହୁଥିବା ବେଳେ ସ୍କୁଲ୍ ପରିଚାଳନା କମିଟି ଓ ସ୍ଥାନୀୟ ପ୍ରଶାସନ କାହିଁକି ଚୁପ୍ ବସିଛନ୍ତି ବୋଲି ପ୍ରଶ୍ନ ଉଠିଛି।
