ଏଥର ସମ୍ଭାଳ ବ୍ୟୁରୋ(ଭୁବନେଶ୍ୱର)- ରାଜ୍ୟ କଂଗ୍ରେସରେ ଘଡ଼ିକେ ଘୋଡ଼ା ଛୁଟୁଛି। ଦଳର ନେତାଙ୍କ ସହ ପ୍ରଭାରୀଙ୍କ ରୁଦ୍ଧଦ୍ୱାର ଆଲୋଚନା ପରେ ପିସିସି ସଭାପତି ଚୟନକୁ ନେଇ ଲାଗି ରହିଛି ଟଣା ଓଟରା। କିଏ ହେବ ପରବର୍ତ୍ତୀ ପିସିସି ମୁଖିଆ, ରାଜ୍ୟରେ କିଏ ଧରିବ ବୁଡ଼ି ଯାଉଥିବା କଂଗ୍ରେସର ମଙ୍ଗ, ତାକୁ ନେଇ ଲାଗି ରହିଛି ଛକାପଞ୍ଝା। ପିସିସି ସଭାପତି ଚୟନ ପ୍ରକ୍ରିୟା ଜୋର ଧରିଥିବା ବେଳେ କଂଗ୍ରେସ ବିଧାୟକଙ୍କୁ ଦିଲ୍ଲୀ ଯିବାକୁ ମିଳିଛି ଡାକରା। ଆସନ୍ତା ୫ ତାରିଖରେ ଓଡ଼ିଶାର କଂଗ୍ରେସ ବିଧାୟକମାନେ ଦିଲ୍ଲୀରେ ପହଞ୍ଚିବାକୁ ନିର୍ଦ୍ଦେଶ ଥିବା ସୂଚନା ମିଳିଛି। ସେଠାରେ ହେବ ମାନସ ମନ୍ଥନ। ବରିଷ୍ଠ ନେତା ରାହୁଲ ଗାନ୍ଧି ସବୁ ବିଧାୟକଙ୍କୁ ଭେଟି ୱାନ୍ ଟୁ ୱାନ୍ ଆଲୋଚନା କରିବେ। ଏହାପରେ ପିସିସି ସଭାପତି ଚୟନ ନେଇ ବାଟ ଫିଟିପାରେ ବୋଲି ଅନୁମାନ କରାଯାଉଛି। ରାହୁଲ ଗାନ୍ଧୀ କଂଗ୍ରେସ ବିଧାୟକଙ୍କୁ ଡାକିଥିବା ନେଇ ଗଣମାଧ୍ୟମ ପ୍ରତିନିଧିଙ୍କୁ ସୂଚନା ଦେଇଛନ୍ତି କଂଗ୍ରେସ ବିଧାୟକ ସୁର ରାଉତରାୟ। ସୂଚନାଯୋଗ୍ୟ, କିଛି ଦିନ ପୂର୍ବେ କଂଗ୍ରେସ ପ୍ରଭାରୀ ଚେଲ୍ଲା କୁମାର ଓଡ଼ିଶା ଆସି କଂଗ୍ରେସ ବିଧାୟକ ତଥା ନେତାମାନଙ୍କ ସହ ରୁଦ୍ଧଦ୍ୱାର ବୈଠକ କରିଥିଲେ। ଜଣେ ବିଧାୟକ ହିଁ ପିସିସି ମୁଖିଆ ପଦରେ ବସନ୍ତୁ ବୋଲି କଂଗ୍ରେସ ବିଧାୟକ ଦାବି କରୁଥିବା ବେଳେ ଏନେଇ କିଛି ନିଷ୍ପତ୍ତି ନିଆଯାଇପାରିନି। କଂଗ୍ରେସର ୯ ବିଧାୟକଙ୍କ ମଧ୍ୟରେ ଗୋଷ୍ଠୀ କନ୍ଦଳ ଲାଗି ରହିଥିବା ବେଳେ ଚାଲିଛି ମତାନ୍ତର ଓ କଥା କଟାକଟି। ଏହାରି ମଧ୍ୟରେ କଂଗ୍ରେସ ବିଧାୟକ ତାରା ବାହିନୀପତି ଦଳର ମୁଖ୍ୟ ସଚେତକ ପଦରୁ ଇସ୍ତଫା ଦେଇଥିବା କହୁଥିବା ବେଳେ ଦଳର ପୁରୁଖା ନେତା ନରସିଂହ ମିଶ୍ର ବିରୋଧି ଦଳ ନେତା ପଦ ତ୍ୟାଗ କରିଥିବା ଶୁଣିବାକୁ ମିଳୁଛି। ଏହାବାଦ ପ୍ରାୟ ୨ ବର୍ଷ ହେବ ପିସିସି ସଭାପତି ପଦରୁ ଇସ୍ତଫା ଦେଇ ସାରିଥିବା କହୁଛନ୍ତି ନିରଞ୍ଜନ ପଟ୍ଟନାୟକ। ଯଦି ନିରଞ୍ଜନ ପୂର୍ବରୁ ଇସ୍ତଫା ଦେଇ ସାରିଛନ୍ତି, ଦଳ କାହିଁକି ତାହା ଗ୍ରହଣ କରୁନି, କାହିଁକି ତାଙ୍କ ବଦଳରେ ନୂଆ ମୁହଁଙ୍କୁ ସୁଯୋଗ ଦେଉନି ତାହାକୁ ନେଇ ସୃଷ୍ଟି ହୋଇଛି ପ୍ରଶ୍ନବାଚୀ। ଏହା ମଧ୍ୟରେ ଗଣମାଧ୍ୟମ ସମ୍ମୁଖରେ ଦଳର ବରିଷ୍ଠ ନେତା ସୁର ରାଉରରାୟ କହିଛନ୍ତି, ରାହୁଲ ଗାନ୍ଧୀ, ସୋନିଆ ଗାନ୍ଧୀ ଆମ ଦଳର ମୁଖିଆ। ସେମାନେ ଯାହା କହିବେ ତାହାକୁ ମାନିବୁ। ସେ ଯଦି ଦଳ ବାହାର ଲୋକଙ୍କୁ ବି ବାଛିବେ ଆମେ ତାକୁ ମାନିବୁ।
