!!! ରାୟଗଡ଼ ରୁ ଜିଲ୍ଲା ପ୍ରତିନିଧି ପି॰ଦିଲ୍ଲୀପ କୁମାର ଙ୍କ ରିପୋର୍ଟ !!!
ଏଥର ସମ୍ଭାଳ (ରାୟଗଡ଼ା)- ‘କାରଖାନା ପ୍ରତିଷ୍ଠା ପାଇଁ ଆମ ଅଞ୍ଚଳବାସୀ ୧୭ ବର୍ଷ ହେଲା ଜାଗା ଦେଇଛନ୍ତି। ସେଠାରେ ନା କାରଖାନା ହେଉଛି ନା ଲୋକଙ୍କୁ ଜାଗା ଫେରସ୍ତ ମିଳୁଛି। ମାଳ ମାଳ ମନ୍ତ୍ରୀ ଆସି ଥରକୁ ଥର ନଡ଼ିଆ ଭାଙ୍ଗି କି ଯାଉଛନ୍ତି। ହେଲେ କାରଖାନାର ନାଁ ଗନ୍ଧ ନାହିଁ। ଏହାକୁ ଆଉ ବରଦାସ୍ତ କରାଯିବନି। ମାସେ ଭିତରେ ଆମକୁ ଶେଷ ନିଷ୍ପତ୍ତି ଶୁଣାଅ, ନଚେତ ଜାଗା ଫେରାଅ। ’ ଏପରି କହି ଆଜି ଜିଲ୍ଲା ପ୍ରଶାସନ ତଥା ରାଜ୍ୟ ସରକାରଙ୍କ ଉପରେ ବର୍ଷିଛନ୍ତି କୋରାପୁଟ ଏମ୍ପି ସପ୍ତଗିରି ଉଲାକା । ସୂଚନା ଅନୁଯାୟୀ, ରାୟଗଡ଼ା ଜିଲ୍ଲା କାଶୀପୁରର କଂସାରିଗୁଡ଼ାରେ ଇସ୍ପାତ କାରଖାନା ପ୍ରତିଷ୍ଠା ନିମନ୍ତେ ୨୦୦୫ ମସିହାରେ ଜମି ଅଧିଗ୍ରହଣ କରାଯାଇଥିଲା । ଏହା ବଦଳରେ ଜମିହରାଙ୍କୁ କ୍ଷତିପୂରଣ ମଧ୍ୟ ପ୍ରଦାନ କରାଯାଇଥିଲା। କାରଖାନାରେ ଚାକିରି ଖଣ୍ଡେ ପାଇବା ଆଶାରେ ନିରୀହ ଆଦିବାସୀ ସରକାରଙ୍କ ହାତକୁ ନିଜ ଜାଗା ଟେକି ଦେଇଥିଲେ। ହେଲେ ଏଯାଏ କାରଖାନା ପ୍ରତିଷ୍ଠ ହୋଇପାରିନି।ଅପରପକ୍ଷେ, ଲୋକେ ଯେଉଁ ଟଙ୍କା ସରକାରଙ୍କଠାରୁ ପାଇଥିଲେ ତାହା ସାରିଦେଲେଣି।
ଫଳରେ ଏବେ ହାତରୁ ଜମି ଚାଲିଯାଇଥିବା ବେଳେ ରୋଜଗାର କିଛି ନ ଥିବାରୁ ନିରୀହ ଆଦିବାସୀ ଭୋକ, ଉପାସରେ ଦିନ କାଟୁଛନ୍ତି। ତେଣୁ ସରକାର ଏ ଦିଗରେ ନିଜ ଶେଷ ନିଷ୍ପତ୍ତି ଜଣାଇବାକୁ ଆଜି ଶହ ଶହ ଆଦିବାସୀ କୋରାପୁଟ ସାଂସଦଙ୍କ ନେତୃତ୍ୱରେ ରାଜରାସ୍ତାକୁ ଓହ୍ଲାଇ ରାଫୁକଣା ଛକରେ ରାସ୍ତା ଅବରୋଧ କରିଛନ୍ତି । ରାସ୍ତା ଅବରୋଧ ଫଳରେ ରାୟଗଡ଼ାରୁ କୋରାପୁଟ୍ ସଂଯୋଗ କରୁଥିବା ୩୨୬ ନମ୍ବର ରାଜ୍ୟ ରାଜପଥ ଓ ରାୟଗଡ଼ାରୁ କାଶୀପୁର ଲମ୍ବିଥିବା ୪୪ ନମ୍ବର ରାଜ୍ୟ ରାଜପଥରେ ଗାଡ଼ି ଚଳାଚଳ ବନ୍ଦ ରହିଛି । ଆନ୍ଦୋଳନକାରୀଙ୍କୁ ହଟାଇବା ପାଇଁ ପୁଲିସ୍ ଉଦ୍ୟମ ଜାରି ରଖିଥିଲେ ମଧ୍ୟ କୌଣସି ସମାଧାନର ବାଟ ବାହାରୁନି। ଏନେଇ କୋରାପୁଟ ସାଂସଦ ସପ୍ତଗିରି ଉଲାକା କହିଛନ୍ତି, ସବୁଠି କାରଖାନା ପ୍ରତିଷ୍ଠା କଥା ଉଠିଲେ ଆରମ୍ଭରୁ ପ୍ରବଳ ବିରୋଧ ହେଉଛି । ହେଲେ ଏଠାରେ ଲୋକେ ରାଜି ଅଛନ୍ତି। ଲୋକେ ଚାହୁଁଛନ୍ତି ଏଠାରେ କାରଖାନା ହେଉ । କଂସାରିଗୁଡ଼ାରେ ଇସ୍ପାତ କାରଖାନା ନିମନ୍ତେ ୧୭ ବର୍ଷ ହେଲା ଜାଗା ଦେଇଇଛନ୍ତି। ହେଲେ ସରକାର ଆନ୍ତରିକତା ଦେଖାଉ ନାହାନ୍ତି। ତେଣୁ ତୁରନ୍ତ କାରଖାନା କର, ନଚେତ କ୍ଷତିପୂରଣ ସହ ଜାଗା ଫେରାଅ । ଏହା ଆମର ଶେଷ ଚେତାବନୀ। ମାସେ ଭିତରେ ଜବାବ ଦିଅ।” ନଚେତ ଜିରୋ ପଏଣ୍ଟକୁ ବନ୍ଦ କରିବୁକୁ ଧମକ ଦେଇଛନ୍ତି ଏମ୍ପି। ଏନେଇ ରାୟଗଡ଼ା ଉପଜିଲ୍ଲାପାଳ କହିଛନ୍ତି, ଲୋକଙ୍କ ଦାବି, ସମସ୍ୟା ସମ୍ପର୍କରେ ସରକାରଙ୍କୁ ଜଣାଇବୁ । ଯଥା ଶୀଘ୍ର ତାହା ଯେପରି କାର୍ଯ୍ୟକାରୀ ହେବ, ପ୍ରଶାସନ ସେ ଦିଗରେ ପଦକ୍ଷେପ ନେବ।
