ଏଥର ସମ୍ଭାଳ ବ୍ୟୁରୋ(ଭୁବନେଶ୍ଵର)- ରାୟଗଡ଼ା ଜିଲ୍ଲା ଗୁଣପୁର ଅଧିନରେ ଥିବା ମୈତ୍ରୀ ଯୋଗାଣ କେନ୍ଦ୍ରରେ ହିତାଧିକାରୀଙ୍କ ଚାଉଳ ଭୂତ ଖାଇଗଲା ବୋଲି ହିତାଧିକାରୀଙ୍କ ସମ୍ପର୍କୀୟ କଟାକ୍ଷ କରି ଅଭିଯୋଗ କରିଛନ୍ତି ।ଏହି କେନ୍ଦ୍ରରୁ ଖାଉଟି ସାମଗ୍ରୀ ଉଠାଣ କରୁଥିବା ହିତାଧିକାରୀଙ୍କ ଦୀର୍ଘ ମାସର ଚାଉଳ ଏବଂ କିରୋସିନ ଉଠାଇ ନେଇଥିବା ଦର୍ଶାଇ ଦିଆଯାଇଥିବା ବେଳେ ପ୍ରକୃତ ହିତାଧିକାରୀ ଏହା ନେଇ ନଥିବା ଅଭିଯୋଗ ଆସିଛି ।କାର୍ଡ ନମ୍ବର ୨୭୧୩୧୨୨୦୮୮୦ ଧାରୀ ହିତାଧିକାରୀ ଶ୍ରୀମତୀ ସରୋଜିନୀ ପଟ୍ଟନାୟକ ଗତ ୨୦୨୦ମସିହା ପର୍ଯ୍ୟନ୍ତ ଏହି କାର୍ଡରେ ରେସନ ସାମଗ୍ରୀ ନେଇଥିଲେ । କିନ୍ତୁ ଏହାର ପରବର୍ତ୍ତୀ ସମୟରେ କୌଣସି ରାସନ ସାମଗ୍ରୀ ନେଇ ନଥିବା ସତ୍ତ୍ୱେ ତାଙ୍କ ମୋବାଇଲନଂ ୯୮୬୧୮୭୫୮୯୧ କୁ ସେ ରାସନ ସାମଗ୍ରୀ ଉଠାଇ ନେଇଥିବା ଭଳି ମେସେଜ ଆସିବା ପରେ ସେ ଆଶ୍ଚର୍ଯ୍ୟ ହୋଇ ଉକ୍ତ ମେସେଜଟିକୁ ଉଲ୍ଲେଖ କରି ଏହାର ତଦନ୍ତ କରି କାର୍ଯ୍ୟାନୁଷ୍ଠାନ ଗ୍ରହଣ କରିବା ନିମନ୍ତେ ମାନ୍ୟବର ଉପଜିଲ୍ଲା ପାଳଙ୍କୁ ଏକ ଦରଖାସ୍ତ ମାଧ୍ୟମରେ ଗତ ଅଭିଯୋଗ କରିଥିବା ସତ୍ତ୍ୱେ କୌଣସି କାର୍ଯ୍ୟାନୁଷ୍ଠାନ ଗ୍ରହଣ କରାଯାଇ ନଥିବା ସୂଚନାଦେଇ କ୍ଷୋଭ ପ୍ରକାଶ କରିଛନ୍ତି ।
ଏଥି ପୂର୍ବରୁ ଏଭଳି ଏକ ଅଭିଯୋଗ ଆସିଥିବା ବେଳେ ମଧ୍ୟ ସମ୍ପୃକ୍ତ କର୍ମଚାରୀ ଙ୍କ ବିରୁଦ୍ଧରେ କାର୍ଯ୍ୟାନୁଷ୍ଠାନ ଗ୍ରହଣ ନକରି କର୍ତ୍ତୃପକ୍ଷ ଘଣ୍ଟ ଘୋଡାଇ ରଖିଥିବା ସାଧାରଣରେ ଅସନ୍ତୋଷ ପ୍ରକାଶ ପାଇଛି । ମୈତ୍ରୀ କେନ୍ଦ୍ରର ଏଭଳି କାରନାମା ପଛରେ ଏଠାରେ କାର୍ଯ୍ୟରତ କଣ୍ଟାବାଲା ଶ୍ରୀ ମାଝି ଗୌର ପ୍ରସାଦ ଙ୍କ ପ୍ରଚ୍ଛଦ ହାତ ରହିଥିବା ଅଭିଯୋଗ ଉଠିଛି । ସେ ନିଜ କାର୍ଯ୍ୟ ସମ୍ପାଦନ ନକରି ପଞ୍ଜିକରଣ ଦାୟିତ୍ୱ ରେ ରହି କେନ୍ଦ୍ର ନିକଟରେ ଘୁରି ବୁଲୁଥିବା ଚାଉଳ ବ୍ୟବସାୟୀ ଙ୍କ ସହଯୋଗରେ ଏସବୁ କେଳେଙ୍କାରୀ କରୁଥିବା ନେଇ ଯେଉଁ ଅଭିଯୋଗ ଉଠୁଛି ଏହାର ତଦନ୍ତ କରି କାର୍ଯ୍ୟାନୁଷ୍ଠାନ ଗ୍ରହଣ କରି ଯେଉଁ ଖାଉଟି ମାନେ ରେସନ ସାମଗ୍ରୀ ପାଇ ନାହାନ୍ତି ସେମାନଙ୍କୁ ସେମାନଙ୍କ ନାଯ୍ୟ ପ୍ରାପ୍ୟ ଦେବା ନିମନ୍ତେ ଓଡିଶା ଦୁର୍ନୀତି ସଂଘର୍ଷ ମଞ୍ଚ ଗୁଣପୁର ଶାଖା ପକ୍ଷରୁ ଦାବୀ କରାଯାଇଛି ।
