ଏଥର ସମ୍ଭାଳ ବ୍ୟୁରୋ(ନୂଆଦିଲ୍ଲୀ)- ବଲିଉଡ କଣ୍ଠଶିଳ୍ପୀରୁ ରାଜନେତା ବନିଥିବା ବାବୁଲ ସୁପ୍ରିୟୋଙ୍କୁ ନେଇ ଏବେ ଚର୍ଚ୍ଚା। ସେ ବିଜେପି ଛାଡ଼ି ଟିଏମସିରେ ମିଶିବା ପରେ ମୁଖ୍ୟମନ୍ତ୍ରୀ ମମତା ବାନାର୍ଜୀଙ୍କ ସହ ମ୍ୟୁଜିକା ମିଟିଂ କରିଛନ୍ତି। ଟିଏମସିରେ ମିଶିବା ପରେ ବାବୁଲ ଓ ମମତାଙ୍କର ଏହା ପ୍ରଥମ ଭେଟଘାଟ। ମମତା ତାଙ୍କୁ ଦଳକୁ ସ୍ୱାଗତ କରିବା ସହ ବର୍ତ୍ତମାନ ଗୀତ ଗାଇବା କାମ ଜାରି ରଖିବାକୁ କହିଛନ୍ତି। ମମତାଙ୍କ ସହ ବୈଠକ କରିବା ପରେ ବାବୁଲ କହିଛନ୍ତି, “ମୁଁ ଦିଦିଙ୍କୁ ଭେଟିବା ପରେ ବହୁତ ଖୁସି। ବେଶ ଆନନ୍ଦର ସହ ସେ ମୋତେ ଟିଏମସି ପରିବାରକୁ ସ୍ୱାଗତ କରିଛନ୍ତି। ସେ ମୋତେ କାମ କରିବା ସହ ହୃଦୟରୁ ଗୀତ ଗାଇବାକୁ କହିଛନ୍ତି। ମୁଁ ଭାବୁଛି ଏହା କେକ୍ ଉପରେ କ୍ରିମର ଲେପ ସଦୃଶ। ସେ ମୋତେ କହିଛନ୍ତି ଯେ ଏବେ ପୂଜା ସମୟ ତୁମେ ଗୀତ ଗାଇବା କାମ ଜାରି ରଖ। ତାଙ୍କ କଥା ମୋତେ ବେଶ ଛୁଇଁଛି। ମୁଁ ଦଳ ପାଇଁ କାମ କରିବା ସହ ଗୀତ ମଧ୍ୟ ଗାଇବି। ଆମ ଭିତରେ ମ୍ୟୁଜିକାଲ ମିଟିଂ ହୋଇଛି। ମିଟିଂ ବେଳେ ସେ ମୋତେ ଯାହା ବି କହିଲେ, ସେସବୁ ମୋ କାନକୁ ସଂଗୀତ ଭଳି ଲାଗିଥିଲା। ମୋତେ ଦଳକୁ ସ୍ୱାଗତ କରିଥିବାରୁ ମୁଁ ଦିଦି ଓ ଅଭିଷେକ ବାନାର୍ଜୀଙ୍କୁ ଧନ୍ୟବାଦ ଜଣାଉଛି।” ଶ୍ରୀ ସୁପ୍ରିୟୋଗ ଆହୁରି କହିଛନ୍ତି, ବୁଧବାର ସେ ଦିଲ୍ଲୀ ଯାଇ ବିଜେପିର ସାଂସଦ ପଦରୁ ଇସ୍ତଫା ଦେବେ। ନିଜର ଇସ୍ତଫାପତ୍ର ସେ ବାଚସ୍ପତି ଓମ ବିର୍ଲାଙ୍କୁ ହସ୍ତାନ୍ତର କରିବେ। ତେବେ ଟିଏମସିରେ ତାଙ୍କ ଦାୟିତ୍ୱ କ’ଣ ରହିବ, ସେକଥା ଜଣାପଡ଼ିନି। ତଥାପି ବାବୁଲ କହିଛନ୍ତି, “ଦଳରେ ମୋ ଭୂମିକା କ’ଣ ରହିବ, ସେକଥା ସଂପୂର୍ଣ୍ଣ ଭାବେ ମୁଖ୍ୟମନ୍ତ୍ରୀ ମମତା ବାନାର୍ଜୀଙ୍କ ଉପରେ ରହିଛି। ସେ ଯାହା ଦାୟିତ୍ୱ ଦେବେ, ସେହି ଅନୁସାରେ ମୁଁ କାର୍ଯ୍ୟ କରିବି।”
