ଏଥର ସମ୍ଭାଳ ବ୍ୟୁରୋ – ଚିଟଫଣ୍ଡ ଦୁର୍ନୀତି ମାମଲାରେ ପଶ୍ଚିମବଙ୍ଗର ମମତା ବାନାର୍ଜୀ ସରକାର ଓ ସିବିଆଇ ମୁହାମୁହିଁ ହେବା ପରେ ବିଜେଡି ନିଜର ‘ସମଦୂରତ୍ୱ’ ଟ୍ୟାଗ୍ ଧୂମିଳ ହେବାର ଆଶଙ୍କା କରି ସୁବିଧାବାଦୀ ରଣନୀତି ଆପଣାଇଛି। ବିଜେଡି ପକ୍ଷରୁ ଗତକାଲି ସଫେଇ ଦିଆଯିବା ପରେ ଦଳର ସଭାପତି ତଥା ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଆଜି ମୁହଁ ଖୋଲି ମମତାଙ୍କ ତୃଣମୂଳ କଂଗ୍ରେସ ସହ କୌଣସି ସମ୍ପର୍କ ନଥିବାର ସନ୍ଦେଶ ଦେଇଛନ୍ତି। ମମତାଙ୍କ ସହ ପ୍ରତ୍ୟକ୍ଷ କିମ୍ବା ପରୋକ୍ଷ ସମ୍ପର୍କ ଯୋଡ଼ି କେନ୍ଦ୍ରରେ ନରେନ୍ଦ୍ର ମୋଦି ନେତୃତ୍ୱାଧୀନ ଏନଡିଏ ସରକାରକୁ ଅସନ୍ତୁଷ୍ଟ କରିବାକୁ ନବୀନ ଚାହୁଁନଥିବା ଜଣାପଡ଼ିଛି। ଯେଉଁଥିପାଇଁ ଗଣମାଧ୍ୟମରେ ନବୀନଙ୍କ ନାଁ ମମତା ଉଚ୍ଚାରଣ କରିବାର ୨ଘଣ୍ଟା ନପୁରୁଣୁ ନବୀନ ନିଜେ ପ୍ରତିକ୍ରିୟା ଦେବାକୁ ଆଗେଇ ଆସିଥିଲେ ତଥା ମମତାଙ୍କ ସହ ସମ୍ପର୍କକୁ ଖଣ୍ଡନ କରିବାକୁ ବି ପଛାଇ ନଥିଲେ।
