କଂଗ୍ରେସ ସହ ଡିଲ ନ ଛିଡ଼ିଲେ ବିଜୟ ସ୍ୱାଧୀନ ଲଢ଼ିବେ
ଏଥର ସମ୍ଭାଳ ବ୍ୟୁରୋ (ଭୁବନେଶ୍ୱର) –
ବରିଷ୍ଠ ନେତା ବିଜୟ ମହାପାତ୍ରଙ୍କୁ ନେଇ ଏବେ ବି ସସପେନ୍ସ ଜାରି ରହିଛି । ସେ କୁଆଡ଼େ ଯିବେ ଏପର୍ଯ୍ୟନ୍ତ ଘୋଷଣା କରୁନାହାଁନ୍ତି କି ପ୍ରକାଶ ମଧ୍ୟ କରୁନାହାଁନ୍ତି । ବିଜେପି ଛାଡ଼ିଲା ପରେ ୧୫ ଦିନ ଭିତରେ ଜଣାଇବେ ବୋଲି କହିଥିଲେ ବି ତାଙ୍କର ସମୟ ଗଡ଼ି ଚାଲିଛି । ଇତି ମଧ୍ୟରେ ଯାହା ସୂଚନା ମିଳୁଛି ସେ କଂଗ୍ରେସ ସହ ଯିବେ । ଏଥିନେଇ କଂଗ୍ରେସ ସହ ତାଙ୍କର ମୁଲଚାଲ ଚାଲିଥିବା କଥା କୁହାଯାଉଛି । ମୁଲଚାଲ ଯଦି ନ ଛିଣ୍ଡିଲା ତେବେ ବିଜୟ କଂଗ୍ରେସ ସମର୍ଥନରେ ସ୍ୱାଧୀନ ଭାବେ ନିର୍ବାଚନ ଲଢ଼ିବେ । ଆସନ୍ତା ୧୫ ଦିନ ଭିତରେ କଂଗ୍ରେସ ସହ ତାଙ୍କର ଆଲୋଚନା ସରିବ ବୋଲି କୁହାଯାଉଛି ।
ନିର୍ବାଚନ ସମୟ ଆଉ ବେଶି ନାହିଁ । ବିଜୟ ଜଣେ ପୋଖତ ରାଜନେତା । ସେ ସବୁ ଦିଗକୁ ଏବେ ଅନୁଶୀଳନ କରୁଛନ୍ତି । ବିଜେପି ଛାଡ଼ିଲା ପରେ ବିଜେଡିରେ ଯୋଗଦେବା ନେଇ ବହୁ ଆଶା କରାଯାଉଥିଲା । ତାଙ୍କ କାର୍ଯ୍ୟଧାରା ମଧ୍ୟ ତାହା ସୂଚାଉ ଥିଲା । କିନ୍ତୁ ବିଜେଡି ଭିତରେ ଏକ ଶକ୍ତିଶାଳୀ ଗୋଷ୍ଠୀର ବିରୋଧ ଯୋଗୁ ବିଜୟଙ୍କ ମିଶ୍ରଣ ସମ୍ଭବ ହେଲାନାହିଁ । ଏପରି କି ବିଜୟଙ୍କ କିଛି ବନ୍ଧୁ ତାଙ୍କୁ ବିଜେଡିକୁ ନ ଫେରିବା ପାଇଁ ମଧ୍ୟ ପରାମର୍ଶ ଦେଇଥିବା କଥା କୁହାଯାଉଛି । ଏବେ ଯାହା ଜଣାପଡୁଛି ବିଜୟଙ୍କର ଆଉ ବିଜେଡିକୁ ଯିବାର ନାହିଁ । ନୂଆ ଦଳ ଗଠନ କରି ତାହା ମାଧ୍ୟମରେ ଯିବା ପାଇଁ ମଧ୍ୟ ସେ ଚାହୁଁ ନାହାଁନ୍ତି । ଏଥିନେଇ ତାଙ୍କର ପୁରୁଣା ଓଡ଼ିଶା ଗଣପରିଷଦ ଗଠନର ଅଭିଜ୍ଞତା ରହିଛି ।
ତାଙ୍କ ପାଇଁ ବର୍ତ୍ତମାନ ଏକମାତ୍ର ବିକଳ୍ପ ରହିଛି କଂଗ୍ରେସ । ସେ କଂଗ୍ରେସରେ ଯୋଗଦେବେ ନାଁ କଂଗ୍ରେସ ସମର୍ଥନରେ ନିର୍ବାଚନ ଲଢ଼ିବେ ତାହା ଉପରେ ତାଙ୍କର ନିଷ୍ପତ୍ତି ନେବାର ଅଛି ବୋଲି ଅନେକ ମତ ରଖୁଛନ୍ତି । କୁହାଯାଉଛି କଂଗ୍ରେସ ସହ ଯିବାକୁ ବିଜୟ ଚାହୁଁଥିଲା ବେଳେ କିଛି ସର୍ତ୍ତ ରଖୁଛନ୍ତି । ତାଙ୍କ ସହ ରହିଥିବା କିଛି ନେତାଙ୍କ ପାଇଁ ମଧ୍ୟ ସେ ଆସନ ଚାହୁଁଛନ୍ତି । ତାଙ୍କ ସମର୍ଥକମାନଙ୍କ ପାଇଁ ବିଜୟ ୬/୭ଟି ବିଧାନସଭା ଆସନ ଦେବାକୁ ପ୍ରସ୍ତାବ ରଖିଛନ୍ତି । କଂଗ୍ରେସ ଯଦି ବିଜୟଙ୍କ ସହ ତାଙ୍କ ସମର୍ଥକମାନଙ୍କୁ ଆସନ ଦେବାପାଇଁ ରାଜି ହୋଇଯିବ ତେବେ ସେ ଦଳରେ ସାମିଲ ହୋଇଯିବେ । ବିଜୟଙ୍କୁ ଆଣିବା ପାଇଁ ପିସିସି ସଭାପତି ନିରଂଜନ ପଟ୍ଟନାୟକ ଜୋରଦାର ଉଦ୍ୟମ ଚଳାଇଛନ୍ତି । କିନ୍ତୁ ନିରଂଜନଙ୍କ ଏ କ୍ଷମତା ନାହିଁ ଯେ, ନିଶ୍ଚିତ ଭାବରେ ବିଜୟଙ୍କୁ ନିର୍ଭର ପ୍ରତିଶ୍ରୁତି ଦେବେ ଯାହାଦ୍ୱାରା ୬/୭ଟି ବିଧାନସଭା ଆସନ ତାଙ୍କ ସମର୍ଥକମାନେ ପାଇପାରିବେ । ବିଜୟଙ୍କୁ ଏକାକୀ ନେବା ଓ ଆସନ ଦେବାପାଇଁ କଂଗ୍ରେସର ସମସ୍ୟା ନାହିଁ । ହେଲେ ବିଜୟ ଏକାକୀ ଯିବାକୁ ଚାହୁଁନାହାଁନ୍ତି । ଏଆଇସିସିସ୍ତରରେ ନିରଂଜନ ଏ ନେଇ ଆଲୋଚନା ଚଳାଇଛନ୍ତି । ଯଦି ସଫଳ ହେବେ ତାଙ୍କ ପାଇଁ ଏହା ଗୋଟେ ବଡ଼ ସଫଳତା ହେବ । ଯେତେ ନେତା ଯାଇଛନ୍ତି ତାହା ଭରଣା ପାଇଁ ବିଜୟଙ୍କ ଭଳି ଜଣେ ନେତାଙ୍କୁ ଆଣିବା ତାଙ୍କ ନେତୃତ୍ୱର ସଫଳତା କୁହାଯିବ ।
କୁହାଯାଉଛି ଏହି ଡିଲ ଯଦି ସଫଳ ନ ହୁଏ ତେବେ ବିଜୟ କଂଗ୍ରେସ ସମର୍ଥନରେ ସ୍ୱାଧୀନଭାବେ ମହାକାଳପଡ଼ାରୁ ଲଢ଼ିବେ । ଅବଶ୍ୟ ବିଜୟ ପୂର୍ବରୁ କଂଗ୍ରେସ ସମର୍ଥନରେ ଲଢ଼ିଥିଲେ । କିନ୍ତୁ କିଛି ଫାଇଦା ହୋଇ ନ ଥିଲା । ଜାନକୀବଲ୍ଲଭ ପଟ୍ଟନାୟକ ଥିବା ବେଳେ ବିଜୟଙ୍କୁ କଂଗ୍ରେସକୁ ଆଣିବା ପାଇଁ ସେ ଚାହିଁଥିଲେ । ମାତ୍ର ବିଜୟ ସେ ସମୟରେ କିଛି ବୁଝାମଣାକୁ ନେଇ ଆସି ନ ଥିଲେ । ହେଲେ ବିଜୟ ଓଜିପିରୁ ଲଢ଼ିଥିଲା ବେଳେ କଂଗ୍ରେସ ତାଙ୍କ ବିରୋଧରେ ପ୍ରାର୍ଥୀ ନ ଦେଇ ସମର୍ଥନ କରିଥିଲା । ହେଲେ ବିଜୟ କଂଗ୍ରେସ ଭୋଟ ପାଇବାରେ ସମର୍ଥ ହୋଇ ନ ଥିଲେ । ପାଲଟା ବିଜେଡି ନେଇଗଲା କଂଗ୍ରେସ ଭୋଟକୁ ବୋଲି କୁହାଗଲା । ଏଥର କଂଗ୍ରେସ ସମର୍ଥନରେ ଲଢ଼ିଲେ କେତେଦୂର ସଫଳ ହେବେ ତାହା ମଧ୍ୟ ବଡ଼ ପ୍ରଶ୍ନ ବୋଲି କୁହାଯାଉଛି ।