କଂଗ୍ରେସରେ ଟଙ୍କା ଅଭାବ! ସାଂସଦମାନଙ୍କୁ ୫୦ ହଜାର ଲେଖାଏ ଦେବାକୁ କହିଲା ଦଳ….!

ଏଥର ସମ୍ଭାଳ ବ୍ୟୁରୋ(ନୂଆଦିଲ୍ଲୀ)- ଦେଶର ସର୍ବପୁରାତନ ରାଜନୀତିକ ଦଳ କଂଗ୍ରେସର ଆର୍ଥିକ ସ୍ଥିତି ବିଗିଡ଼ି ଯାଇଛି। ୨୦୧୪ରୁ କ୍ଷମତା ବାହାରେ ଥିବା କଂଗ୍ରେସ ଏବେ ଟଙ୍କା ପାଇଁ ଦଳୀୟ ଖର୍ଚ୍ଚ ତୁଲାଇବାକୁ ଅନେକ ସମସ୍ୟାର ସମ୍ମୁଖୀନ ହେଉଛି। ଏହାର ମୁକାବିଲା ପାଇଁ ଖର୍ଚ୍ଚ କାଟ କରିବାକୁ ନିଷ୍ପତ୍ତି ନେଇଛି ଦଳ ।ଆସନ୍ତାବର୍ଷ ୫ ରାଜ୍ୟରେ ବିଧାନସଭା ନିର୍ବାଚନ ହେବ। ଏହାପୂର୍ବରୁ ଦଳ ଆର୍ଥିକ ସ୍ଥିତିରେ ମଜଭୂତ ହେବାକୁ ଚାହୁଁଛି। ଗୋଟିଏ ପଟେ ବିଭିନ୍ନ ସୂତ୍ରରୁ ବିଜେପିର ଆୟ ହୁହୁ ହୋଇ ବଢ଼ୁଥିବା ବେଳେ ଅନ୍ୟପଟେ କଂଗ୍ରେସର ଆୟ ହ୍ରାସ ପାଉଛି। ଏପରି ସ୍ଥିତିରେ ଦଳ ବିଜେପି ସହ କେମିତି ଲଢ଼େଇ କରିବ, ସେ ଚିନ୍ତା ହାଇକମାଣ୍ଡଙ୍କୁ ଘାରିଛି। ଆର୍ଥିକ ସ୍ଥିତିରେ ଦୁର୍ବଳ ହୋଇ ପଡ଼ିଥିବା କଂଗ୍ରେସ ଦଳର ସାଂସଦମାନଙ୍କୁ ନିଜସ୍ୱ ଅର୍ଥରେ ବିମାନ ଯାତ୍ରା କରିବାକୁ କହିଛି। ପୂର୍ବରୁ ସାଂସଦଙ୍କ ବିମାନ ଖର୍ଚ୍ଚ ଦଳ ବହନ କରୁଥିଲା। ଏଥିସହ ସାଂସଦଙ୍କୁ ପାର୍ଟି ଫଣ୍ଡକୁ ବାର୍ଷିକ ୫୦ ହଜାର ଟଙ୍କା ଲେଖାଏ ଦାନ କରିବାକୁ ନିବେଦନ କରାଯାଇଛି। କଂଗ୍ରେସ ନିଜର ସଚିବଙ୍କ ଠାରୁ ଆରମ୍ଭ କରି ମହାସଚିବଙ୍କ ଖର୍ଚ୍ଚ କାଟ କରିବା ପାଇଁ ସ୍ୱତନ୍ତ୍ର ଗାଇଡଲାଇନ ଜାରି କରିଛି। କଂଗ୍ରେସର କୋଷାଧ୍ୟକ୍ଷ ପବନ ବଂଶଲ କହିଛନ୍ତି, “ଖର୍ଚ୍ଚକୁ ସର୍ବନିମ୍ନ ସ୍ତରରେ ରଖିବା ପାଇଁ ଏପରି ଯୋଜନା କରାଯାଇଛି। ମୁଁ ନିଜେ ଗୋଟିଏ ଗୋଟିଏ ଟଙ୍କା ସଞ୍ଚୟ କରିବାକୁ ଚେଷ୍ଟା କରୁଛି।” କଂଗ୍ରେସ ନିଜର ଆର୍ଥିକ ସ୍ଥିତିକୁ ସୁଧାରିବା ପାଇଁ ସଚିବମାନଙ୍କୁ ଟ୍ରେନ୍ ଯୋଗେ ଯାତ୍ରା କରିବାକୁ କହିଛି। ଟ୍ରେନ ଯାତ୍ରା ଯେତେବେଳେ ସମ୍ଭବ ହେଉନାହିଁ ସେତେବେଳେ ସବୁଠାରୁ କମ ଦାମର ଟିକେଟ ନେଇ ବିମାନ ଯାତ୍ରା କରିବାକୁ ପରାମର୍ଶ ଦିଆଯାଇଛି। ଦଳର ଯେଉଁ ମହାସଚିମାନେ ସାଂସଦ ଭାବେ କାର୍ଯ୍ୟ କରୁଛନ୍ତି, ସେମାନେ ବିମାନ ଯାତ୍ରାର ଅର୍ଥ ନିଜ ପକେଟରୁ ବହନ କରନ୍ତୁ। ଏଆଇସିସିର କାର୍ଯ୍ୟକର୍ତ୍ତା ଓ ସଚିବମାନଙ୍କୁ ସର୍ବାଧିକ ୧୪ଶହ କିମି ଯାଏ ଟ୍ରେନ ଯାତ୍ରା ବାବଦ ଭଡ଼ା ଦଳ ପକ୍ଷରୁ ଦିଆଯିବ। ୧୪ଶହ କିମିରୁ ଅଧିକ ଦୂରତାର ଯାତ୍ରା ପାଇଁ ସଚିବମାନଙ୍କୁ ସର୍ବନିମ୍ନ ବିମାନ ଭଡ଼ା ଦିଆଯିବ। ଯଦି ଟ୍ରେନ ଭଡ଼ା ବିମାନ ଭଡ଼ା ଠାରୁ ଅଧିକ ରହୁଛି, ତା’ହେଲେ ସେମାନେ ବିମାନରେ ଯିବା ଆସିବା କରିପାରିବେ। ଏ କ୍ଷେତ୍ରରେ ବିମାନ ଭଡ଼ା ମାସକୁ ଦୁଇ ଥର ଦିଆଯିବ। କ୍ୟାଣ୍ଟିନ, ଷ୍ଟେସନାରୀ, ବିଦ୍ୟୁତ୍, ଖବରକାଗଜ ଓ ତେଲ ଇତ୍ୟାଦି ଉପରେ ହେଉଥିବା ଖର୍ଚ୍ଚକୁ ଯଥା ସମ୍ଭବ କମ କରିବା ପାଇଁ ନିଜେ ଏଆଇସିସି କର୍ମକର୍ତ୍ତାମାନେ ଚେଷ୍ଟା କରିବେ। ଦଳ କହିଛି ଯେ ସଚିବ ଓ ମହାସଚିବଙ୍କ ପାଇଁ ଥିବା ୧୨ ହଜାର ଏବଂ ୧୫ ହଜାର ଟଙ୍କାର ଭତ୍ତା ମଧ୍ୟ କଟାଯିବ। ଏହି ଭତ୍ତାକୁ ଅଧିକାଂଶ ସଦସ୍ୟ କ୍ୱଚିତ୍ ବ୍ୟବହାର କରୁଥିବାରୁ ଏହାକୁ କାଟଛାଣ୍ଟ କରିବାକୁ ଯୋଜନା ହୋଇଥିବା ପବନ ବଂଶଲ କହିଛନ୍ତି । ସାଂସଦ ମାନେ ଦଳୀୟ ପାଣ୍ଠିକୁ ପ୍ରତିବର୍ଷ ୫୦ ହଜାର ଟଙ୍କା ଲେଖାଏ ଦେବ ଓ ଦଳର ଦୁଇ ଜଣ ସମର୍ଥକଙ୍କ ଠାରୁ ବର୍ଷକୁ ୪୦୦୦ ଟଙ୍କା ଲେଖାଏ ଆଣିବାକୁ ଚେଷ୍ଟା କରିବେ। ଏହାଦ୍ୱାରା ଦଳ ନିଜ ପାଣ୍ଠିକୁ ବୃଦ୍ଧି କରିବା ସହ ପ୍ରଚାର ପ୍ରସାର ପାଇଁ ଟଙ୍କା ଖର୍ଚ୍ଚ କରିପାରିବ ବୋଲି ଲକ୍ଷ୍ୟ ରଖିଛି। ସୂଚନାଯୋଗ୍ୟ, ୨୦୧୯-୨୦ ଆର୍ଥିକ ବର୍ଷରେ କଂଗ୍ରେସର ନିର୍ବାଚନୀ ବଣ୍ଡ ଆୟ ୧୭% ହ୍ରାସ ପାଇଛି। ୨୦୧୮-୧୯ରେ ଦଳ ନିର୍ବାଚନୀ ବଣ୍ଡରୁ ୩୮୩ କୋଟି ପାଇଥିଲା। କିନ୍ତୁ ୨୦୧୯-୨୦ରେ ମୋଟ ବଣ୍ଡ ପରିମାଣର ମାତ୍ର ୯% ଅର୍ଥ ବା ୩୧୮ କୋଟି ଟଙ୍କା ଆୟ କରିଥିଲା। ଏହି ସମୟରେ ବିଜେପି ବିକ୍ରି ହୋଇଥିବା ମୋଟ ବଣ୍ଡର ୭୬% ବା ୨୫୫୫ କୋଟି ଟଙ୍କା ଆୟ କରିଛି। ୨୦୧୯-୨୦ରେ ମୋଟ ବିକ୍ରି ହୋଇଥିବା ବଣ୍ତର ପରିମାଣ ହେଉଛି ୩୫୫୫ କୋଟି। ଗତବର୍ଷ ବିଜେପି ନିର୍ବାଚନୀ ବଣ୍ଡରୁ ୧୪୫୦ କୋଟି ଟଙ୍କା ପାଇଥିଲେ। ହେଲେ ୨୦୧୯-୨୦ରେ ଦଳ ୭୫% ଅଧିକ ଆୟ କରିଛି।