ପନ୍ତଙ୍କୁ ନେଇ ବଡ଼ ଭବିଷ୍ୟବାଣୀ କଲେ ଯୁବରାଜ ସିଂହ…!
ଏଥର ସମ୍ଭାଳ ବ୍ୟୁରୋ(ନୂଆଦିଲ୍ଲୀ)- ୱିକେଟକିପର ବ୍ୟାଟ୍ସମ୍ୟାନ୍ ଋଷଭ ପନ୍ତ ନିଜ ଖେଳର ଦମରେ ଅନେକ ବଡ଼ ବଡ଼ କ୍ରିକେଟରଙ୍କୁ ପ୍ରଭାବିତ କରିଛନ୍ତି। ଏହି ତାଲିକାରେ ଭାରତର ପୂର୍ବତନ ଅଲରାଉଣ୍ଡର ଯୁବରାଜ ସିଂହଙ୍କ ନାମ ମଧ୍ୟ ସାମିଲ୍ ଅଛି। ଯୁବରାଜ କହିଛନ୍ତି ଯେ ପନ୍ତ ଟିମ୍ ଇଣ୍ଡିଆର ପରବର୍ତ୍ତୀ କ୍ୟାପଟେନ୍ ହୋଇପାରନ୍ତି। ଏହା ପଛର କାରଣ ହେଉଛି ପନ୍ତ ମାନସିକ ଭାବେ ବହୁତ ମଜଭୁତ୍। ପନ୍ତ ଯେଉଁଭଳି ଭାବେ କମ୍ ବୟସରୁ ନିଜକୁ ପ୍ରମାଣିତ କରିଛନ୍ତି, ତାହା ନିଶ୍ଚିତ ପ୍ରଶଂସାଯୋଗ୍ୟ। ଯୁବରାଜ କହିଛନ୍ତି, ମୁଁ ଗର୍ବିତ ଯେ ଲୋକେ କହୁଛନ୍ତି ପନ୍ତ ବହୁତ ପରିପକ୍ୱ ଏବଂ ସେ ଭାରତ ପାଇଁ ବଡ଼ ସନ୍ଧାନ। ଗିଲଖ୍ରୀଷ୍ଟ ଟେଷ୍ଟ କ୍ରିକେଟରେ ଖେଳ ରୂପ ବଦଳାଇ ଦେଇଥିଲେ। ମୋତେ ଲାଗୁଛି ପନ୍ତ ମଧ୍ୟ ଏଭଳି କରିପାରନ୍ତି। ମୁଁ ଭବିଷ୍ୟତରେ ତାଙ୍କୁ ଭାରତୀୟ କ୍ୟାପଟେନ୍ ଭାବେ ଦେଖୁଛି। ତାଙ୍କ ପାଖରେ ଏକ ତୀକ୍ଷ୍ଣ ମୁଣ୍ଡ ଅଛି, ଯାହା ସେ ଦିଲ୍ଲୀ କ୍ୟାପିଟାଲ୍ସ ଟିମର କ୍ୟାପଟେନ୍ ଦାୟିତ୍ୱ କରୁଥିବା ବେଳେ ମୁଁ ଦେଖିଥିଲି। ଭାରତୀୟ ଦଳରେ ସ୍ଥାନ ପାଇବା ପନ୍ତଙ୍କ ପକ୍ଷେ ସହଜ ନଥିଲା। କାରଣ ପନ୍ତ ଦାୟିତ୍ୱହୀନ ଭାବେ ନିଜ ୱିକେଟ୍ ହରାଉଥିଲେ ଏବଂ କିଛି ଅନାବଶ୍ୟକ ଶଟ୍ ଖେଳି ଲଗାତର ସମାଲୋଚନାର ମଧ୍ୟ ଶିକାର ହେଉଥିଲେ। ଆଇପିଏଲ୍ ୨୦୨୦ ସଂସ୍କରଣ ତାଙ୍କ ପାଇଁ ଅଧିକ କଠିନ ସାବ୍ୟସ୍ତ ହୋଇଥିଲା। ହେଲେ ଏବେ ସେ ନିଜ ଛବିକୁ ପୂରା ବଦଳାଇ ଦେଇଛନ୍ତି। ଭାରତ ଯେତେବେଳେ ଅଷ୍ଟ୍ରେଲିଆ ଗସ୍ତରେ ଥିଲା, ସେ ଘରୋଇ ଦରର ମଜଭୁତ୍ ବୋଲିଂ ଲାଇନକୁ ନିଜ ଦମଦାର ବ୍ୟାଟିଂ ବଳରେ ଧୂଳି ଚଟାଇ ଥିଲେ। ଅଷ୍ଟ୍ରେଲିଆ ଗସ୍ତରେ ସେ ୪ଟି ଟେଷ୍ଟ ମ୍ୟାଚରେ ୫୮.୩୩ ହାରରେ ୩୫୦ ରନ କରିଥିଲେ। ପନ୍ତ ପ୍ରତିକୂଳ ପରିସ୍ଥିତି ସତ୍ତ୍ୱେ ଅଷ୍ଟ୍ରେଲିଆ ବିପକ୍ଷ ସିଡନୀ ଟେଷ୍ଟରେ ୧୧୮ ବଲରେ ୯୭ ରନ୍ କରିଥିଲେ, ଯାହା ମ୍ୟାଚରେ କୌଣସି ଭାରତୀୟ ବ୍ୟାଟ୍ସମ୍ୟାନଙ୍କ ପକ୍ଷେ ସର୍ବାଧିକ ସ୍କୋର ଥିଲା। ବ୍ରିସବେନ୍ ଟେଷ୍ଟରେ ସେ ୧୩୮ ବଲରେ ଅପରାଜିତ ୮୯ ରନ୍ କରିଥିଲେ, ଯେଉଁଥିପାଇଁ ତାଙ୍କୁ ମ୍ୟାନ୍ ଅଫ୍ ଦି ମ୍ୟାଚ୍ ବିବେଚିତ କରାଯାଇଥିଲା।